ລາວທ່ຽວລາວນັບມື້ມີຜົນຕອບຮັບ ບັນຍາກາດຄຶກຄັກ
ໂດຍ: ທິດກໍ່າ
ນັບແຕ່ພະຍາດໂຄວິດ-19 ເລີ່ມແຜ່ລະບາດໄປທົ່ວໂລກ, ສປປ ລາວ ພວກເຮົາ ກໍມີຜົນກະທົບຢ່າງໃຫຍ່ຫລວງຕໍ່ລະບົບເສດຖະກິດ-ສັງຄົມຂອງປະເທດ. ບັນຫາທີ່ຖືກຜົນກະທົບໜັກກວ່າໝູ່ກໍແມ່ນພາກອຸດສາຫະກຳການທ່ອງທ່ຽວ ເຊິ່ງແຕ່ລະປີນັບແຕ່ມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ ລັດຕ້ອງເສຍລາຍຮັບໄປຫລາຍຮ້ອຍລ້ານໂດລາສະຫະລັດ. ສະເພາະໃນປີ 2019 ລາວເຮົາເສຍລາຍຮັບຈາກການທ່ອງທ່ຽວຫລາຍກວ່າ 500 ລ້ານໂດລາສະຫະລັດ ແລະ ຖ້າຈະຄິດໄລ່ມາຮອດປີ 2020 ຫາຕົ້ນປີ 2021 ກໍອາດຈະເພີ່ມຂຶ້ນເປັນຕື້ໆໂດລາສະຫະລັດ.
ມາຮອດປັດຈຸບັນ, ສະພາບການແຜ່ລະບາດຂອງພະຍາດໂຄວິດ-19 ກໍຍັງບໍ່ທັນມີທ່າທີຫລຸດໜ້ອຍຖອຍລົງ ແລະ ໝົດໄປຈາກໂລກໃບນີ້ເທື່ອ. ຫລ້າສຸດຈາກສະຖິຕິມາຮອດວັນທີ 10 ມີນາ 2021 ມີຜູ້ຕິດເຊື້ອໃນທົ່ວໂລກເຖິງ 115.763.495 ຄົນ, ເສຍຊີວິດໄປແລ້ວ 2.571.666 ຄົນ, ປິ່ນປົວດີ 91.465.524 ຄົນ, ພວມນອນປິ່ນປົວຢູ່ໂຮງໝໍ 21.726.305 ຄົນ ແລະ ປະເທດທີ່ມີຄົນຕິດເຊື້ອຫລາຍກວ່າໝູ່ຍັງແມ່ນສະຫະລັດອາເມລິກາມີເຖິງ 29.456.377 ຄົນ. ສ່ວນ ສປປ ລາວພວກເຮົາ ມາຮອດປັດຈຸບັນມີຜູ້ຕິດເຊື້ອທັງໝົດ 48 ຄົນ, ຍັງນອນປິ່ນປົວຢູ່ໂຮງໝໍ 6 ຄົນ ແລະ ຍັງບໍ່ທັນມີຜູ້ໃດເສຍຊີວິດຍ້ອນ.
ແຕ່ແນວໃດກໍຕາມ, ອີງໃສ່ສະພາບການແຜ່ລະບາດຂອງພະຍາດໂຄວິດ-19 ໃນທົ່ວໂລກຍັງບໍ່ທັນມີທ່າທີຫລຸດຜ່ອນ ແລະ ໝົດໄປໂດຍຊິ້ນເຊີງ, ຫລາຍປະເທດກໍຍັງໃຊ້ມາດຕະການຜ່ອນຜັນຫລາຍຢ່າງ ເພື່ອປ້ອງກັນສະກັດກັ້ນບໍ່ໃຫ້ເຊື້ອພະຍາດຊະນິດນີ້ແຜ່ລາມ ດ້ວຍຮູບການປິດປະເທດ, ປິດການສັນຈອນທ່ອງທ່ຽວ, ປິດການໄປມາຫາສູ່ກັນລະຫວ່າງປະເທດເປັນການຊົ່ວຄາວຈົນກວ່າການແຜ່ລະບາດພະຍາດດັ່ງກ່າວຈະຫລຸດໜ້ອຍຖອຍລົງ ແລະ ໝົດໄປເທື່ອລະກ້າວ. ນອກຈາກນັ້ນ ມາຮອດປັດຈຸບັນກໍມີຫລາຍປະເທດໄດ້ຮັບຢາວັກແຊງ ແລະ ເລີ່ມສັກໃຫ້ກຸ່ມເປົ້າໝາຍໄປແລ້ວເປັນສ່ວນໃຫຍ່. ໃນເມື່ອແຕ່ລະປະເທດໄດ້ເຂົ້າເຖິງຢາວັກແຊງເປັນທີ່ຮຽບຮ້ອຍແລ້ວ, ຄາດວ່າອີກບໍ່ດົນ ການແຜ່ລະບາດຂອງພະຍາດໂຄວິດ-19 ກໍຈະຖືກຕ້ານ ແລະ ຕີຖອຍຢ່າງແຂງແຮງ ໃນທີ່ສຸດພະຍາດດັ່ງກ່າວກໍຈະຫລຸດໜ້ອຍຖອຍລົງ ແລະ ມະຫັບມະຫາຍໄປຕາມການເວລາ.
ສະເພາະ ສປປ ລາວ ຂອງພວກເຮົາ ອີງໃສ່ເງື່ອນໄຂການແຜ່ລະບາດຂອງພະຍາດດັ່ງກ່າວ ຍັງມີຄົນຕິດເຊື້ອເພີ່ມຂຶ້ນ ໂດຍແມ່ນແຮງງານລາວທີ່ມາຈາກປະເທດໄທ ຈຶ່ງຢູ່ໃນຂັ້ນຕອນປະຕິບັດບັນດາມາດຕະການຜ່ອນຜັນຢ່າງເຄັ່ງຂັດ ເຊິ່ງໃນນີ້ກໍບໍ່ທັນສາມາດເປີດຊາຍແດນໃຫ້ນັກທ່ອງທ່ຽວເຂົ້າ-ອອກໄດ້ຢ່າງເປັນທາງການ ແຕ່ກໍລະນີຈຳເປັນກໍສາມາດເຂົ້າ-ອອກຕາມຂັ້ນຕອນຢ່າງເຂັ້ມງວດ ແລະ ຍັງບໍ່ຮູ້ວ່າຍັງອີກຈັກເດືອນ, ຈັກປີມາດຕະການຜ່ອນຜັນຈຶ່ງຈະຖືກຍົກເລີກໄປພ້ອມກັບການຫາຍຍານະຂອງໂຄວິດ-19.
ແຕ່ເຖິງຢ່າງໃດກໍດີ, ເພື່ອເຮັດໃຫ້ການທ່ອງທ່ຽວໄດ້ຫວນກັບຄືນມາມີບັນຍາກາດອີກຄັ້ງ, ພັກ ແລະ ລັດຖະບານເຮົາຈຶ່ງຫັນມາຊຸກຍູ້ສົ່ງເສີມການທ່ອງທ່ຽວຢູ່ພາຍໃນປະເທດໃຫ້ຫລາຍຂຶ້ນ. ສຳລັບຮູບແບບການຊຸກຍູ້ສົ່ງເສີມກໍແມ່ນພາຍໃຕ້ຄຳຂວັນ “ລາວທ່ຽວລາວ” ເຊິ່ງໄດ້ເລີ່ມຕົ້ນມາແຕ່ປີ 2020 ເຫັນວ່າໄດ້ມີການຕອບຮັບເປັນຢ່າງດີ.
ໂດຍອີງໃສ່ຈຸດພິເສດທ່າແຮງທາງດ້ານພູມີປະເທດຢູ່ບ້ານເຮົາມີທຳມະຊາດ, ພູຜາປ່າໄມ້, ຫ້ວຍນ້ຳລຳເຊອັນສວຍສົດງົດງາມ ປະສົມປະສານກັບຮີດຄອງປະເພນີ, ວິຖີຊີວິດ, ວັດທະນະທຳທີ່ຍັງຄົງເປັນເອກະລັກສະເພາະຂອງຊາດ ການຫັນທິດເພື່ອສົ່ງເສີມການທ່ອງທ່ຽວພາຍໃນໃຫ້ມີບັນຍາກາດດ້ວຍການປຸກລະດົມຄົນໃນຊາດຫັນມາສົນໃຈລາວທ່ຽວລາວໃຫ້ຫລາຍຂຶ້ນນັ້ນ ເປັນການສອດຄ່ອງກັບເງື່ອນໄຂ ແລະ ຈຸດພິເສດທາງດ້ານວັດທະນະທຳ ວິຖີຊີວິດທີ່ໂອບເອື້ອຄວາມເປັນທໍາມະຊາດໄດ້ຢ່າງລົງຕົວ ເຮັດໃຫ້ບັນຍາກາດການທ່ອງທ່ຽວໃນທົ່ວປະເທດຄຶກຄັກພໍສົມຄວນ.
ຈາກພຶດຕິກຳຕົວຈິງມາຮອດປັດຈຸບັນເຫັນວ່າໄດ້ມີການຕອບຮັບໂຄງການ “ລາວທ່ຽວລາວ” ໄດ້ສະແດງໃຫ້ເຫັນຢ່າງຊັດເຈນ ກໍຄືນັບແຕ່ເສັ້ນທາງດ່ວນວຽງຈັນ-ວັງວຽງໄດ້ເປີດນຳໃຊ້ບໍລິການໄດ້ມີຊາວນະຄອນຫລວງວຽງຈັນ ກໍຄືຊາວລາວໃນທົ່ວປະເທດໄດ້ອວ່າຍໜ້າໄປທ່ຽວເມືອງວັງວຽງ ແລະ ບ່ອນອື່ນໆບໍ່ໄດ້ຂາດໄລຍະ ໂດຍສະເພາະແມ່ນວັນເສົາວັນທິດ ແລະ ວັນສຳຄັນທາງປະຫວັດສາດຂອງຊາດ ແລະ ສາກົນ. ໃນບາງອາທິດ ເຮືອນພັກໂຮງແຮມຢູ່ວັງວຽງເຕັມລົ້ນ, ບັນດາຮ້ານອາຫານ, ຮ້ານກິນດື່ມທີ່ເຄີຍບໍລິການນັກທ່ອງທ່ຽວຕ່າງຊາດໄດ້ຫັນການບໍລິການແບບລາວໆໃຫ້ຄົນລາວເຮົາເອງ ດ້ວຍບັນຍາກາດຄຶກຄັກ. ນອກຈາກນັ້ນ ຢູ່ແຂວງຕ່າງໆທີ່ມີແຫລ່ງທ່ອງທ່ຽວກໍໄດ້ມີຄົນລາວໄປທ່ຽວຢ່າງຫລວງຫລາຍ ຈຸດໜັກແມ່ນແຫລ່ງທ່ອງທ່ຽວທຳມະຊາດ ເຫັນວ່າມີບັນຍາກາດຄຶກຄັກຟົດຟື້ນເປັນຢ່າງດີ. ລາວທ່ຽວລາວເງິນຕາບໍ່ຮົ່ວໄຫລ, ເງິນອອກຈາກຖົງຊ້າຍເຂົ້າຖົງຂວາ ລາວຈະຮັ່ງມີໃນອະນາຄົດ ຖ້າເຮົາປຸ້ມລຸມກັນຮັກຊາດຮັກແຜ່ນດິນ.
