ປັບປຸງເສັ້ນທາງເລກທີ 13 ໃຕ້ກິໂລແມັດທີ 77-111 ຄວາມຍາວ 40 ກິໂລແມັດ ມູນຄ່າ 17,5 ລ້ານໂດລາ

ທ່ານ ສີສົມພັນ ພິມສີປະສົມ ຫົວໜ້າໂຄງການປັບປຸງ ແລະ ສ້ອມແປງທາງ 13 ໃຕ້ ໃຫ້ຮູ້ວ່າ: ວັນທີ 11 ມີນາ 2021 ນີ້ ກົມຂົວ​ທາງ ກະຊວງໂຍທາທິການ ແລະ ຂົນສົ່ງ ເຊັນສັນຍາກັບບໍລິສັດ ສຳຫຼວດ-ອອກແບບ ເຊິ່ງໂຄງການປັບປຸງ ແລະ ສ້ອມແປງທາງ 13 ໃຕ້ (ໄລ​ຍະສັນຍາ 1) ກິໂລແມັດທີ 71 ຫາ ກມ 111 ມີ ຄວາມຍາວ 40 ກມ ມູນຄ່າຂອງສັນຍາຜ່ານການປະມູນ ສໍາລັບສັນຍານີ້ແມ່ນ 17,5 ລ້ານໂດລາ ເຊິ່ງເປັນໜຶ່ງຂອງໂຄງການປັບປຸງ ແລະ ສ້ອມແປງທາງ 13 ໃຕ້ ແຕ່ ກມ 71 (ແຂວງບໍລິຄໍາໄຊ) ຫາ ກມ 346 (ແຂວງຄໍາມ່ວນ) ມີຄວາມຍາວທັງໝົດ 275 ກມ, ຊຶ່ງໄດ້ແບ່ງອອກເປັນ 4 ໄລ​ຍະສັນຍາ.

ການປັບປຸງຄັ້ງນີ້ໄດ້ຮັບການສະໜັບສະໜູນເງິນກູ້ດອກເບ້ຍຕ່ຳ ຈາກສາມສະຖາບັນຄື: ທະນາຄານໂລກ (WB), ທະນາຄານລົງທຶນເອີຣົບ (EIB), ທະນາຄານການລົງທຶນໂຄງລ່າງ ພື້ນຖານອາຊີ (AIB) ແລະ ງົບປະມານຈາກກອງທຶນທາງລວມທັງໝົດ 157,5 ລ້ານໂດລາ, ໃນນີ້ຄ່າກໍ່ສ້າງ ແລະ ປັບປຸງເສັ້ນທາງ 275 ກມ ຈໍານວນ 125 ລ້ານໂດລາ, ຄ່າຊົດເຊີຍສິ່ງກີດຂວາງ ແລະ ເວນຄືນທີ່ດິນ 1,7 ລ້ານໂດລາ, ຄ່າວ່າຈ້າງທີ່ປຶກສາ 5 ລ້ານໂດລາ ແລະ ຄ່າບູລະນະຮັກສາ 25,8 ລ້ານໂດລາ, ໄລຍະປະຕິບັດໂຄງການແມ່ນ 10 ປີ ແຕ່ປີ 2021-2031, ໃນນີ້ ໄລຍະກໍ່ສ້າງ 2-3 ປີ ແລະ ບູລະນະຮັກສາ 7-8 ປີ.

ເພື່ອປັບປຸງ ແລະ ຍົກລະດັບຕອນທາງດັ່ງກ່າວໃຫ້ສາມາດຮັບນ້ຳໜັກ ບັນທຸກ ໄດ້ 11 ໂຕນ/ເພົາ ໂດຍການຍົກລະດັບໂຄງສ້າງຂອງທາງໄລ​ຍະທີ່ຕໍ່​າທີ່ມີນໍ້າຖ້ວມ, ຂະຫຍາຍໜ້າທາງເກົ່າໃຫ້ກວ້າງອອກຕື່ມ, ເສີມຄວາມແຂງແກ່ນ ໂດຍການເສີມຊັ້ນພື້ນທາງອີກ 10-20 ຊມ ແລະ ປູທັບໜ້າທາງດ້ວຍຢາງຂົວ.

ສໍາລັບໄລຍະສັນຍາ 1 ນໍາໃຊ້ທຶນກູ້ຢືມຈາກທະນາຄານໂລກ ເພື່ອປັບປຸງຍົກລະດັບຈຸດນ້ຳຖ້ວມ ແລະ ຂະຫຍາຍໜ້າທາງເກົ່າ ຈາກ 9 ແມັດ ເປັນ 12 ແມັດ, ມີ 2 ຊ່ອງທາງຈາລະຈອນ (2X3,5 ມ) ແລະ ບ່າທາງເບື້ອງລະ 2,5 ມ ພ້ອມທັງກໍ່ສ້າງຂົວໃໝ່ 2 ແຫ່ງ ແທນໃສ່ຈຸດເກົ່າ ລວງຍາວແຫ່ງລະປະ ມານ 25 ມ, ກ້ວາງ 12 ມ, ໂຄງສ້າງທາງ ແມ່ນໄດ້ອອກແບບເປັນໜ້າທາງແບບປູຢາງຂົ້ວ (ເບຕົງອັສ ຟານ)

ສ່ວນຮູບການຊໍາ ລະໃຫ້ແກ່ໂຄງການແບ່ງອອກເປັນ 2 ໄລຍະຄື: ໄລຍະທີ 1: ແມ່ນໄລຍະດໍາເນີນການກໍ່ສ້າງ 2 ປີ, ມີມູນ ຄ່າປະມານ 14 ລ້ານໂດລາ ໂດຍແມ່ນທະນາຄານໂລກເປັນຜູ້ຊຳລະ, ໄລຍະທີ 2: ແມ່ນໄລຍະການນໍາ ໃຊ້ ແລະ ບູລະນະຮັກສາເສັ້ນທາງ 8 ປີ, ແບ່ງຈ່າຍເປັນງວດໆ ໂດຍນໍາໃຊ້ເງິນຈາກກອງທຶນທາງ (ຂອງ ລັດຖະບານລາວ) ຈໍານວນ 3,5 ລ້ານໂດລາ.