ຟີລິບປິນເດີນໜ້າຂໍ້ຕົກລົງເພີ່ມກັບອາຊຽນຮ່ວມມືຂະແໜງທະນາຄານ

    ທະນາຄານແຫ່ງຊາດຟີລິບປິນກຽມລົງນາມກັບອີກ 2 ປະເທດສະມາຊິກອາຊຽນ ເພື່ອເປີດທະນາຄານ.

ທ່ານ ອາມານໂດ ເທທັງໂດ ຈູເນຍ ຜູ້ວ່າການທະນາຄານກາງຟີລິບປິນ (BSP) ເປີດເຜີຍວ່າ: ຟີລິບປິນຈະເຊັນຂໍ້ຕົກລົງເປີດທະນາຄານທີ່ມີຄຸນສົມບັດຕາມມາດຕະຖານທະນາຄານອາຊຽນ ຫລື QAB ກັບປະເທດສະມາຊິກອາຊຽນອີກຢ່າງໜ້ອຍ 2 ປະເທດພາຍໃນຕົ້ນເດືອນໜ້າ ເພື່ອໃຫ້ເປັນໄປຕາມຂອບຂໍ້ຕົກລົງ ABIF ຂອງປະຊາຄົມອາຊຽນ ທີ່ມຸ່ງຈະລວມລະບົບການເງິນໃນພາກພື້ນອາຊີຕາເວັນອອກສຽງໃຕ້ໃຫ້ເປັນຖານເສດຖະກິດດຽວ ແລະ ມີກົນໄກທີ່ເປັນລະບົບລະບຽບຫລາຍຂຶ້ນ.

ທັງນີ້, ທະນາຄານກາງຟີລິບປິນໄດ້ຮ່ວມລົງນາມຂໍ້ຕົກລົງທີ່ຈະເປີດທະນາຄານໃນປະເທດໃກ້ຄຽງອາຊຽນ ຄືມາເລເຊຍເປັນແຫ່ງທຳອິດ ໂດຍມາເລເຊຍອະນຸຍາດໃຫ້ຟີລິບປິນເປີດດຳເນີນການທະນາຄານທີ່ໄດ້ມາດຕະຖານອາຊຽນ 3 ແຫ່ງ. ນອກຈາກນີ້ ຍັງໄດ້ເລີ່ມຂັ້ນຕອນການເຈລະຈາກັບອິນໂດເນເຊຍ ແລະ ໄທໃນເດືອນພະຈິກປີຜ່ານມາ ເພື່ອດຳເນີນງານແບບດຽວກັນ ເນື່ອງຈາກຟີລິບປິນເບິ່ງວ່າ: ອິນໂດເນເຊຍ, ມາເລເຊຍ ແລະ ໄທ ເປັນຕະຫລາດເປົ້າໝາຍເງິນຝາກປະຢັດທີ່ສຳຄັນໃນອາຊຽນ.