ທ່ານນາງ ວຽງທອງ ສີພັນດອນ ຮັບໜ້າທີ່ເປັນຮັກສາການປະທານສານປະຊາຊົນສູງສຸດຜູ້ໃໝ່

ວັນທີ 10 ມີນາ 2021 ໄດ້ມີພິທີມອບຮັບໜ້າທີ່ເລຂາຄະນະພັກ,​ ຮັກສາການປະທານສານປະຊາຊົນສູງສຸດ ລະຫວ່າງ ທ່ານ ຄຳພາ ແສງດາຣາ ເລຂາຄະນະບໍລິຫານງານພັກ, ປະທານສານປະຊາຊົນສູງສຸດ(ຜູ້ເກົ່າ) ແລະ ທ່ານ ນາງ ວຽງທອງ ສີພັນດອນ ເລຂາທິການສູນກາງພັກ, ຮັກສາການປະທານສານປະຊາຊົນສູງສຸດ(ຜູ້ໃໝ່).

ໂດຍການເຂົ້າຮ່ວມຂອງ ທ່ານ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ການມອບ-ຮັບຄັ້ງນີ້ແມ່ນອີງຕາມມະຕິຕົກລົງຂອງກົມການເມືອງສູນກາງພັກ ລກທີ 08/ກມສພ ວັນທີ 03 ມີນາ 2021 ວ່າດ້ວຍການແຕ່ງຕັ້ງ ເລຂາຄະນະບໍລິຫານງານພັກ ສານປະຊາຊົນສູງສຸດ, ໃນພິທີດັ່ງກ່າວ ໄດ້ສັງລວມຫຍໍ້ຜົນສໍາເລັດໃນການເຄື່ອນໄຫວວຽກງານຜ່ານມາ ແລະ ທິດທາງແຜນການທີ່ສຳຄັນ ເພື່ອສືບຕໍ່ຊີ້ນໍາ-ນຳພາໃນຕໍ່ໜ້າ.