ກອງປະຊຸມວຽກງານຍຸຕິທໍາທົ່ວປະເທດປະຈໍາປີ 2020
ກອງປະຊຸມວຽກງານຍຸຕິທໍາທົ່ວປະເທດ ປະຈໍາປີ 2020 ໄດ້ໄຂຂຶ້ນໃນລະຫວ່າງ ວັນທີ 10-11 ມີນາ 2021 ທີ່ກະຊວງດັ່ງກ່າວ, ໂດຍມີ ທ່ານ ໄຊສີ ສັນຕິວົງ ລັດຖະມົນຕີ ກະຊວງຍຸຕິທໍາ, ມີບັນດາ ຮອງລັດຖະມົນຕີ, ຫົວໜ້າກົມ-ຮອງກົມ, ຫົວໜ້າພະແນກຍຸຕິທໍາແຂວງ-ນະຄອນຫລວງ ເຂົ້າຮ່ວມ.
ທ່ານ ໄຊສີ ສັນຕິວົງ ໄດ້ກ່າວວ່າ: ເພື່ອເປັນການສະຫລຸບຕີລາຄາຄືນການຊີ້ນຳ-ນຳພາ ແລະ ຈັດຕັ້ງປະຕິບັດໜ້າທີ່ການເມືອງຂອງຂະແໜງການຍຸຕິທຳ ປະຈຳປີ 2020 ທີ່ຜ່ານມາແລະ ວາງທິດທາງໜ້າທີ່ວຽກງານຈຸດສຸມສຳລັບປີ 2021 ໂດຍຈະລົງເລິກສຸມໃສ່ບາງວຽກງານຈໍານວນໜຶ່ງ. ພ້ອມນີ້, ໃນກອງປະຊຸມຍັງຈະໄດ້ຮັບຟັງບົດສະຫລຸບ ການຈັດຕັ້ງປະຕິບັດວຽກງານກົດໝາຍ ແລະ ຍຸຕິທໍາປະຈໍາປີ 2020 ແລະ ທິດທາງແຜນການຈຸດສຸມວຽກງານກົດໝາຍ ແລະ ຍຸຕິທໍາ ປະຈໍາປີ 2021 ສະ ເໜີໂດຍ ທ່ານ ໄພວີ ສີບົວລິພາ ຮອງລັດຖະມົນຕີ ກະຊວງຍຸຕິທໍາ, ເຊິ່ງຍົກໃຫ້ເຫັນສະພາບທີ່ພົ້ນເດັ່ນໃນໄລຍະໜຶ່ງປີຜ່ານມາ ເປັນຕົ້ນ: ວຽກງານສຶກສາອົບຮົມການເມືອງແນວຄິດ, ວຽກງານວິຊາສະ ເພາະຕາມພາລະບົດບາດ, ວຽກງານສ້າງ, ປັບປຸງກົດໝາຍ ແລະ ກວດກາ, ປະເມີນຜົນນິຕິກໍາໃຕ້ກົດໝາຍ, ວຽກງານໂຄສະນາເຜີຍແຜ່ກົດໝາຍ, ວຽກງານການຈັດຕັ້ງປະຕິບັດຄໍາຕັດສີນຂອງສານ, ວຽກງານທະບຽນສານ, ວຽກງານສົ່ງເສີມລະບົບຍຸຕິທໍາ, ວຽກງານແກ້ໄຂຂໍ້ຂັດແຍ່ງທາງດ້ານເສດຖະກິດ, ວຽກງານສ້າງບຸກຄະລາກອນກົດໝາຍ, ວຽກງານຮ່ວມມືສາກົນ, ວຽກງານຫ້ອງການ ແລະ ວຽກງານກົງຈັກການຈັດຕັ້ງ ແລະ ກວດກາ, ເຊິ່ງມີທາງດ້ານດີ ແລະ ດ້ານອ່ອນ ຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ ແລະ ທິດທາງແຜນການຈຸດສຸມວຽກງານກົດໝາຍ ແລະ ຍຸຕິທໍາປະຈໍາປີ 2021.
ພ້ອມດຽວກັນນັ້ນ, ຍັງໄດ້ຮັບຟັງການປະກອບຄໍາເຫັນ ຂອງບັນດາທ່ານຜູ້ຊີ້ນໍາວຽກງານຍຸຕິທໍານະຄອນຫລວງ-ແຂວງ ເພື່ອສະຫລຸບຖອດຖອນບົດຮຽນຮ່ວມກັນ.
