ສ.ເກົາຫລີ ບໍ່ພົບຫລັກຖານເຊື່ອມໂຍງການເສຍຊີວິດຂອງຄົນ 8 ຄົນກັບການຮັບວັກຊີນຕ້ານໂຄວິດ-19 ຂອງ Oxford-AstraZeneca
ສ.ເກົາຫລີ ລະບຸຜົນການສອບສວນວ່າ: ບໍ່ພົບຫລັກຖານທີ່ສະແດງເຖິງການເຊື່ອມໂຍງລະຫວ່າງການເສຍຊີວິດຂອງຄົນຈຳນວນ 8 ຄົນ ກັບການສັກວັກຊີນຕ້ານໂຄວິດ-19 ໂດຍທັງ 8 ຄົນດັ່ງກ່າວເປັນຜູ້ທີ່ມີພະຍາດປະຈຳຕົວ ແລະ ສະແດງອາການບໍ່ເພິ່ງປະສົງຫລັງໄດ້ຮັບວັກຊີນຂອງ Oxford-AstraZeneca.
ສ.ເກົາຫລີ ເລີ່ມສັກວັກຊີນໃຫ້ປະຊາຊົນ, ຜູ້ປະຕິບັດງານໃນສະຖານທີ່ເບິ່ງແຍງຜູ້ເຖົ້າ ຫລື ຄົນບໍ່ແຂງແຮງ ລວມທັງບຸກຄົນທີ່ມີຄວາມສ່ຽງອື່ນໆ ນັບແຕ່ທ້າຍເດືອນກຸມພາຜ່ານມາ ແລະ ຈົນຮອດວັນທີ 7 ມີນາຜ່ານມາ ມີຜູ້ໄດ້ຮັບວັກຊີນໂດສທຳອິດແລ້ວ 316.865 ຄົນ.
ຜ່ານມາ, ຊາວ ສ.ເກົາຫລີ ທີ່ມີອາຍຸ 65 ປີຂຶ້ນໄປຈະບໍ່ໄດ້ຮັບວັກຊີນຂອງ Oxford-AstraZeneca ເພາະໜ່ວຍງານເບິ່ງແຍງດ້ານສຸຂະພາບສະຫລຸບວ່າ: ຈຳເປັນຕ້ອງມີຂໍ້ມູນເພີ່ມຕື່ມຫລາຍກວ່ານີ້ ເພື່ອຢືນຢັນປະສິດທິພາບຂອງວັກຊີນຕໍ່ບຸກຄົນໃນກຸ່ມອາຍຸດັ່ງກ່າວ, ແຕ່ໃນວັນທີ 8 ມີນາຜ່ານມາ, ອີນເຄຍອງ ລະບຸວ່າ: ປັດຈຸບັນ ຄະນະຜູ້ຊ່ຽວຊານໄດ້ແນະນຳໃຫ້ສັກວັກຊີນຂອງ Oxford-AstraZeneca ໃຫ້ຜູ້ສູງອາຍຸໄດ້ແລ້ວ ແລະ KCDA ຈະຕັດສິນໃຈຂັ້ນສຸດທ້າຍກ່ຽວກັບເລື່ອງດັ່ງກ່າວມໍ່ໆນີ້.
ການລະບາດຫລາຍຄັ້ງໃນໂຮງງານ ແລະ ເຮັດວຽກທາງອຸດສາຫະກຳອື່ນໆ ເຮັດໃຫ້ທາງການຕ້ອງເລີ່ມກວດສອບສະຖານທີ່ເຮັດວຽກ 12.000 ກວ່າແຫ່ງ ພ້ອມພະນັກງານຕ່າງປະເທດ. ຂະນະທີ່ລັດຖະບານທ້ອງຖິ່ນຫລາຍແຫ່ງສັ່ງໃຫ້ແຮງງານຕ່າງປະເທດຕ້ອງເຂົ້າຮັບການກວດຫາໂຄວິດ-19.
