WHO ຊີ້ປະຊາກອນ 1 ໃນ 4 ຂອງໂລກ ສ່ຽງ “ມີບັນຫາການໄດ້ຍິນ” ພາຍໃນປີ 2050
ວັນທີ 3 ມີນາ 2021, ອົງການອະນາໄມໂລກ (WHO) ລະບຸໃນລາຍງານວ່າ: ພາຍໃນປີ 2050 ຈະມີ 1 ໃນ 4 ຂອງປະຊາກອນທົ່ວໂລກ ລວມແລ້ວເກືອບ 2,5 ພັນລ້ານຄົນ ທີ່ອາດມີບັນຫາດ້ານການໄດ້ຍິນໃນລະດັບຕ່າງໆ ແລະ ຢ່າງໜ້ອຍຈະມີ 700 ລ້ານຄົນທີ່ຕ້ອງເຂົ້າຮັບການປິ່ນປົວດ້ານການໄດ້ຍິນ ຫລື ບໍລິການຟື້ນຟູປະເພດອື່ນ ຖ້າບໍ່ມີການການແກ້ໄຂບັນຫານີ້.
WHO ເຜີຍແຜ່ລາຍງານລະດັບໂລກວ່າດ້ວຍການໄດ້ຍິນ (World Report on Hearing) ສະບັບທຳອິດ ກ່ອນຈະຮອດວັນການໄດ້ຍິນໂລກ (World Hearing Day) ເຊິ່ງກົງກັບວັນທີ 3 ມີນາ ໂດຍເນັ້ນເຖິງຄວາມສຳຄັນໃນການຍົກລະດັບການດຳເນີນງານເພື່ອປ້ອງກັນ ແລະ ແກ້ໄຂບັນຫາສູນເສຍການໄດ້ຍິນ ດ້ວຍການລົງທຶນ ແລະ ຂະຫຍາຍການເຂົ້າເຖິງບໍລິການທາງສຸຂະພາບກ່ຽວກັບຫູ ແລະ ການໄດ້ຍິນ.
ລາຍງານລະບຸວ່າ: ພວກເຮົາສາມາດປ້ອງກັນບັນຫາການສູນເສຍການໄດ້ຍິນຂອງເດັກນ້ອຍເກືອບ 60% ໄດ້ດ້ວຍມາດຕະການຕ່າງໆເຊັ່ນ: ສັກວັກຊີນຕ້ານພະຍາດຫັດເຢຍລະມັນ ແລະ ພະຍາດເຍື່ອຫຸ້ມສະໝອງອັກເສບ, ພັດທະນາບໍລິການເບິ່ງແຍງມານດາ ແລະ ເດັກເກີດໃໝ່ ລວມທັງຄັດກອງ ຫລື ແກ້ໄຂສະພາບຫູຊັ້ນກາງອັກເສບຢ່າງທ່ວງທັນ.
ສຳລັບຜູ້ໃຫຍ່ ຄວນມີການຄວບຄຸມລະດັບສຽງ, ປຸກລະດົມການຟັງຢ່າງປອດໄພ, ຄວບຄຸມເບິ່ງແຍງການໃຊ້ຢາທີ່ມີພິດຕໍ່ປະສາດຫູ ແລະ ຮັກສາຄວາມສະອາດຫູ ເພື່ອໃຫ້ປະສິດທິພາບການໄດ້ຍິນຢູ່ໃນລະດັບດີ ແລະ ຫລຸດໂອກາດຈະສູນເສຍການໄດ້ຍິນ.
ເຖິງຢ່າງໃດກໍຕາມ, ບັນຫາຂາດເຂີນຂໍ້ມູນທີ່ຖືກຕ້ອງ ແລະ ການຕຳໜິຜູ້ທີ່ເປັນພະຍາດກ່ຽວກັບຫູ ຫລື ຜູ້ສູນເສຍການໄດ້ຍິນ ມັກຈະສົ່ງຜົນໃຫ້ຄົນເຂົ້າເຖິງບໍລິການທີ່ກ່ຽວຂ້ອງໄດ້ບໍ່ເຕັມສ່ວນ. ສະຖິຕິຂອງ WHO ເຜີຍວ່າ: ລະບົບສຸຂະພາບແຫ່ງຊາດຂອງປະເທດສ່ວນຫລາຍບໍ່ມີບໍລິການປິ່ນປົວຫູ ຫລື ການໄດ້ຍິນ, ຜູ້ທີ່ເປັນພະຍາດກ່ຽວຂ້ອງຈຶ່ງຜະເຊີນຄວາມທ້າທາຍໃນການເຂົ້າເຖິງບໍລິການປິ່ນປົວ.
ບັນຫາໃຫຍ່ທີ່ສຸດໃນລະບົບສຸຂະພາບ ຄືບັນຫາບຸກຄະລາກອນ ໂດຍ 78% ຂອງປະເທດລາຍໄດ້ຕໍ່າມີຜູ້ຊ່ຽວຊານດ້ານຫູ-ຄໍ-ດັງໜ້ອຍກວ່າ 1 ຄົນຕໍ່ປະຊາກອນ 1 ລ້ານຄົນ ເຊິ່ງບັນຫານີ້ສາມາດແກ້ໄຂໄດ້ດ້ວຍຍຸດທະສາດຕ່າງໆ ທີ່ຈະປະສົມບໍລິການປິ່ນປົວຫູ ແລະ ການໄດ້ຍິນໄວ້ໃນລະບົບສຸຂະພາບຂັ້ນພື້ນຖານຂອງປະເທດ.
