ໂຄວິດ-19 ສົ່ງຜົນໃຫ້ລາວເຮົາມີຜູ້ຫ່ວາງງານຫລາຍຂຶ້ນ
ກະຊວງແຮງງານ ແລະ ສະຫວັດດີການສັງຄົມໃຫ້ຮູ້ວ່າ: ເນື່ອງຈາກການແຜ່ລະບາດຂອງພະຍາດໂຄວິດ-19 ໄດ້ສົ່ງຜົນກະທົບໃຫຍ່ຫລວງຕໍ່ການພັດທະນາເສດຖະກິດ-ສັງຄົມ ແລະ ຊີວິດການເປັນຢູ່ຂອງປະຊາກອນໂລກ ເນື່ອງຈາກຫົວໜ່ວຍທຸລະກິດຕ່າງໆໄດ້ໂຈະ ແລະ ປິດກິດຈະການເປັນຈຳນວນຫລາຍ ແລະ ໄດ້ຢຸດການຈ້າງງານຢ່າງຖາວອນເປັນຈຳນວນບໍ່ຫນ້ອຍ. ຕາມການຄາດຄະເນຂອງອົງການແຮງງານສາກົນວ່າ: ປັດຈຸບັນໃນທົ່ວໂລກມີຜູ້ຫວ່າງງານສູງເຖິງ 25 ລ້ານຄົນ ຊຶ່ງຈະສູນເສຍລາຍຮັບປະມານ 34.000 ຕື້ໂດລາສະຫະລັດ. ສຳລັບລາວເຮົາກໍເຫັນວ່າມີຜູ້ຫວ່າງງານທີ່ກັບມາຈາກຕ່າງປະເທດ ແລະ ພາຍໃນອາດຈະຫລາຍກວ່າ 63.000 ຄົນ.
ຫົວໜ້າພະແນກສົ່ງເສີມການຈັດຫາງານ ກົມພັດທະນາສີມືແຮງງານ ແລະ ຈັດຫາງານ ໄດ້ລາຍງານໃນກອງປະຊຸມສົນທະນາສາມຝ່າຍ ຮ່ວມກັບສູນບໍລິການຈັດຫາງານ ແລະ ບໍລິສັດຈັດຫາງານ ເຊິ່ງໄດ້ຈັດຂຶ້ນໃນວັນທີ 3 ມີນານີ້ ທີ່ໂຮງແຮມເດີນິວໂຣສ ນະຄອນຫລວງວຽງຈັນວ່າ: ໃນໄລຍະການແຜ່ລະບາດຂອງພະຍາດໂຄວິດ-19 ສໍາລັບປະເທດເຮົາກໍໄດ້ໂຈະ ແລະ ປິດກິດຈະການຂອງໂຮງຈັກໂຮງງານຫລາຍແຫ່ງເຊັ່ນກັນ ສົ່ງຜົນກະທົບຕໍ່ຜູ້ອອກແຮງງານໃນລະບົບ, ນອກລະບົບ ລວມເຖິງຜູ້ປະກອບອາຊີບອິດສະຫລະຫລາຍສົມຄວນ ຊຶ່ງຄາດວ່າອັດຕາການຫວ່າງງານໃນປະເທດເຮົາຈະເພີ່ມຂຶ້ນປະມານ 20%. ຄຽງຄູ່ກັນນັ້ນ, ປະຊາຊົນລາວທີ່ອອກແຮງງານຢູ່ປະເທດໄທແບບຖືກຕ້ອງ ແລະ ບໍ່ຖືກຕ້ອງຕາມກົດໝາຍໄດ້ຫລັ່ງໄຫລກັບຄືນປະເທດເປັນຈຳນວນຫລວງຫລາຍ ມາເຖິງປັດຈຸບັນອາດມີຫລາຍກວ່າ 147.000 ຄົນແລ້ວ, ໃນນັ້ນ ມາຈາກປະເທດມາເລເຊຍມີ 456 ຄົນ. ພ້ອມນີ້ ຍັງມີແຮງງານລາວທີ່ຍັງຄ້າງຢູ່ຕ່າງປະເທດ ໂດຍສະເພາະໄທ ມີປະມານ 115.993 ຄົນ, ຢູ່ປະເທດຍີປຸ່ນ 235 ຄົນ, ສ.ເກົາຫລີ 320 ຄົນ ແລະ ຢູ່ປະເທດມາເລເຊຍ 1.544 ຄົນ.
ຫົວຫນ້າພະແນກການດັ່ງກ່າວໃຫ້ຮູ້ຕື່ມວ່າ: ເພື່ອຊ່ວຍໃຫ້ຜູ້ອອກແຮງງານທີ່ກັບຈາກຕ່າງປະເທດ ແລະ ຜູ້ຫວ່າງງານຢູ່ໃນປະເທດໄດ້ມີວຽກເຮັດງານທຳຕາມເງື່ອນໄຂ ແລະ ຄວາມຕ້ອງການຂອງຫົວໜ່ວຍແຮງງານ ແລະ ເພື່ອເຮັດໃຫ້ແຮງງານເຄື່ອນຍ້າຍຖືກຈັດຕັ້ງປະຕິບັດໃຫ້ສອດຄ່ອງກັບສະພາບ ແລະ ເງື່ອນໄຂປັດຈຸບັນ, ຕອບສະໜອງກັບຈຸດປະສົງນັ້ນ ລັດຖະບານໄດ້ຕັ້ງໜ່ວຍງານສະເພາະກິດຂັ້ນສູນກາງ, ຂັ້ນກະຊວງ, ຂັ້ນແຂວງ ແລະ ຂັ້ນເມືອງ ໂດຍປະກອບມີຂະແໜງການຕ່າງໆທີ່ກ່ຽວຂ້ອງ ເພື່ອໃຫ້ການຊ່ວຍເຫລືອແກ່ເຂົາເຈົ້າໃນສະເພາະໜ້າ ແລະ ຍາວນານ. ພ້ອມໄດ້ເອົາໃຈໃສ່ປະສານງານກັບປະເທດຕ່າງໆ ທີ່ຮັບແຮງງານລາວ ເພື່ອຕິດຕາມດ້ານນະໂຍບາຍຕໍ່ຜູ້ອອກແຮງງານເປັນແຕ່ລະໄລຍະ ແລະ ໃຫ້ການຊ່ວຍເຫລືອເຂົາເຈົ້າສາມາດເດີນທາງກັບບ້ານຂອງເຂົາເຈົ້າໄດ້.
