ອິນເດຍປ່ຽນຊື່ເອີ້ນ “ໝາກມັງກອນ” ເພາະຊື່ເຮັດໃຫ້ຄິດຮອດຈີນ ຫລັງການພົວພັນ ຈີນ-ອິນເດຍ ເຄັ່ງຕຶງ
ອິນເດຍປ່ຽນຊື່ເອີ້ນໝາກມັງກອນ ຫລັງຊື່ເຮັດໃຫ້ຄິດຮອດປະເທດຈີນ ເຊິ່ງກຳລັງມີຄວາມຂັດແຍ່ງກັບອິນເດຍ. ຂະນະທີ່ຜູ້ຊ່ຽວຊານຢືນຢັນວ່າ: ຊື່ເອີ້ນ “ໝາກມັງກອນ” ບໍ່ໄດ້ມີທີ່ມາຈາກປະເທດຈີນ.
ວັນທີ 27 ກຸມພາ 2021, ເວັບໄຊນິກເຄອິ ເອເຊຍ ສື່ຍີ່ປຸ່ນລາຍງານວ່າ: ເຈົ້າຄອງລັດຄຸຊະຣາດຂອງອິນເດຍ ປະກາດປ່ຽນຊື່ເອີ້ນໝາກມັງກອນໃໝ່ ໂດຍໃຫ້ຄົນອິນເດຍເອີ້ນໝາກໄມ້ຊະນິດນີ້ວ່າ: “ກາມາລໍາ” ເຊິ່ງມີຄວາມໝາຍວ່າ: ດອກບົວໃນພາສາສັນສະກິດແທນ.
ສຳລັບສາເຫດການປ່ຽນຊື່ໝາກມັງກອນ ມີເຫດຜົນມາຈາກການພົວພັນລະຫວ່າງຈີນກັບອິນເດຍທີ່ເຄັ່ງຕຶງໜັກ ໂດຍສະເພາະການປະທະກັນຢູ່ຕາມຊາຍແດນທີ່ເຮັດໃຫ້ມີທະຫານເສຍຊີວິດ ເຊິ່ງເຈົ້າຄອງລັດຄຸຊະຣາດລະບຸວ່າ: ຊື່ພາສາອັງກິດຂອງໝາກໄມ້ຊະນິດນີ້ທີ່ມີຄຳວ່າ: ມັງກອນ ປາກົດຢູ່ (Dragon Fruit) ອາດເຮັດໃຫ້ຄົນຄິດຮອດປະເທດຈີນໄດ້.
ເຖິງຢ່າງໃດກໍຕາມ, ການຕັດສິນໃຈນີ້ພັດຖືກວິຈານຢ່າງໜັກວ່າ: ໄຮ້ສາລະ ເນື່ອງຈາກໝາກມັງກອນບໍ່ໄດ້ມີການເຊື່ອມໂຍງໃດໆກັບຈີນ ໂດຍບາງສ່ວນວິຈານວ່າ: ຖ້າໃຊ້ຫລັກຄິດແບບນີ້ ແມ່ນຫຍັງກໍຕາມທີ່ຖືກເອີ້ນວ່າມັງກອນກໍຄວນປ່ຽນຊື່ທັງໝົດ. ຂະນະທີ່ປະຫວັດຂອງໝາກໄມ້ຊະນິດນີ້ມີຕົ້ນກຳເນີດມາຈາກເມັກຊິໂກ ແລະ ປະເທດເຂດອາເມລິກາກາງ ແລະ ອາເມລິກາໃຕ້ ບໍ່ມີການກ່ຽວຂ້ອງກັບຈີນ.
ເຊັ່ນດຽວກັບຜູ້ຊ່ຽວຊານທີ່ຢືນຢັນວ່າ: ການເອີ້ນຊື່ໝາກໄມ້ຊະນິດນີ້ວ່າ: “ໝາກມັງກອນ” ບໍ່ໄດ້ມີສ່ວນກ່ຽວຂ້ອງກັບຈີນ, ແຕ່ມີຈຸດເລີ່ມຕົ້ນມາຈາກການເອີ້ນຂອງຄົນໃນອາຊີຕາເວັນອອກສຽງໃຕ້ຫລາຍກວ່າ ເຊິ່ງໝາກມັງກອນຍັງມີຊື່ເອີ້ນທີ່ຫລາກຫລາຍຂຶ້ນຢູ່ກັບແຕ່ລະພື້ນທີ່ນຳອີກ.
