ແມ່ຫວຍຖືກຈັບຖານສໍ້ໂກງ ແລະ ຫລອກລວງຊັບພົນລະເມືອງ

ເຈົ້າໜ້າທີ່ໜ່ວຍງານສືບສວນ-ສອບສວນເສດຖະກິດ ປກສ ເມືອງໄຊເສດຖາ ນວ ໃຫ້ຮູ້ວ່າ: ວັນທີ 25 ພະຈິກ 2020, ໄດ້ຮັບ ແຈ້ງຄວາມຈາກ ນາງ ບຸນສີ ສອນປະດິດ ແລະ ນາງ ຫົງສະຫວັນ ພີມມະຫາ ຖືກ ທ້າວ ແຊມ ຫຼື ຫໍາ ອາຍຸ 27 ປີ ຢູ່ບ້ານນາຄວາຍໃຕ້ ເມືອງໄຊເສດຖາ ນວ ສໍ້ໂກ້ງຊັບພົນລະເມືອງ. ເຈົ້າໜ້າທີ່ຕໍາຫຼວດ ເຫັນວ່າ ການກະທໍາ ແມ່ນມີພື້ນຖານການກະທໍາຜິດທາງອາຍາໃນຂໍ້ກ່າວຫາ ສໍ້ໂກ້ງຊັບພົນລະເມືອງ.

ຈຶ່ງໄດ້ອອກຄໍາສັ່ງ ມາດຕະການກັກຕົວ ແລະທຳການສອບສວນ ຜູ້ກ່ຽວໄດ້ຍອມຮັບສາລະພາບ ວ່າ: ໄດ້ຕົວະຍົວະຫຼອກລວງ ໂດຍອ້າງວ່າ (ເປັນແມ່ຫວຍ) ຕັ້ງຫວຍໃນວົງເງິນ45 ລ້ານກີບ, 30 ວັນເປຍ, ເກັບເງິນນໍາລູກຫວຍມື້ລະ 150.000ກີບ; ເຂົ້າຫວຍ 30 ລ້ານກີບ, 30ວັນເປຍ, ເກັບເງິນນໍາລູກຫວຍມື້ລະ 1 ແສນກີບ ແລະ ເຂົ້າຫວຍ 10ລ້ານ, 10 ວັນເປຍ, ເກັບເງິນນໍາລູກຫວຍມື້ລະ 1 ແສນກີບ, ມີລູກຫວຍ 10 ຄົນ, ແມ່ຫວຍຈະເກັບເງິນກ່ອນ 12 ວັນ, ພໍເກັບເງິນໄດ້ໄລຍະໜຶ່ງຕົນເອງໄດ້ໄປຖາມຂາຍຫວຍໃຫ້ ນາງ ບຸດສະບາ (ລູກຫວຍ) ຈໍານວນ 7 ມື ໂດຍອ້າງວ່າ (ລູກຫວຍຄົນອື່ນເຂົາບໍ່ມີຄວາມສາມາດໃສ່ຕໍ່ໄດ້ອີກແລ້ວ, ຮ້ອນເງິນ) ແລະ ໄດ້ຊັກຊວນໃຫ້ຄົນອື່ນມາເຂົ້າຫວຍນໍາຕື່ມອີກ.

ພາຍຫຼັງມີການໂຄສະນາຊວນເຊື່ອ ນາງ ບຸນສີ ສອນປະດິດ, ນາງ ຫົງສະຫວັນ ພີມມະຫາ ແລະ ລູກຫວຍອີກຈໍານວນໜຶ່ງ ເກີດຄວາມເຊື່ອວ່າ: ທ້າວ ແຊມ ຫຼື ຫໍາ ໄດ້ຕັ້ງຫວຍແທ້ຈຶ່ງໄດ້ມອບເງິນລວມທັງໝົດ 452 ລ້ານກວ່າກີບ.

ຕໍ່ກັບການກະທໍາຂອງທ້າວ ແຊມ ຫຼື ຫຳເຫັນວ່າ: ມີເຈດຕະນາຫຼອກລວງແອບອ້າງເອົາການຕັ້ງຫວຍ ເປັນການສ້າງຄວາມໄວ້ເນື້ອເຊື່ອໃຈເຮັດໃຫ້ຄົນອື່ນມອບຊັບສິນຂອງຕົນໃຫ້ ຕໍ່ພຶດຕິກຳນີ້ແມ່ນຜິດຕໍ່ປະມວນກົດໝາຍອາຍາ ມາດຕາ 233 ກຳນົດໄວ້.

ປກສ ນວ