ຫວຽດນາມກະກຽມ ເລືອກຕັ້ງສະມາຊິກສະພາແຫ່ງຊາດຊຸດທີ XV
ສຳນັກຂ່າວຫວຽດນາມ, ລາຍງານເມື່ອວັນທີ 26 ກຸມພານີ້ ໃຫ້ຮູ້ວ່າ: ຕອນເຊົ້າຂອງວັນທີ 26 ກຸມພານີ້ເອງ, ຄະນະປະຈຳການຂອງຄະນະກຳມະການແນວໂຮມປະເທດຊາດຫວຽດນາມໄດ້ຈັດຕັ້ງກອງປະຊຸມແນະນຳຂັ້ນຕອນນຳສະເໜີຜູ້ສະໝັກເລືອກຕັ້ງຂອງບັນດາສຳນັກງານອົງການຂັ້ນສຸນກາງເພື່ອສະໝັກສະມາຊິກສະພາແຫ່ງຊາດຊຸດທີ XV ໂດຍການເປັນປະທານຂອງທ່ານ ຮອງປະທານແນວໂຮມປະເທດຊາດຫວຽດນາມ ຫງວຽນຮິວຢຸງ.
ທ່ານ ຮອງປະທານແນວໂຮມປະເທດຊາດຫວຽດນາມ ໃຫ້ຮູ້ວ່າ ການນຳສະເໜືຜູ້ສະໝັກເລືອກຕັ້ງເປັນສະມາຊິກສະພາແຫ່ງຊາດຊຸດທີ XV ຕ້ອງປະຕິບັດຕາມ 3 ຂັ້ນຕອນດັ່ງນີ້:
ຂັ້ນຕອນທີໜຶ່ງ: ລວມຄະນະນຳຂອງບັນດາສຳນັກງານ-ອົງການເພື່ອ ກຳນົດເປົ້າໝາຍທີ່ຈະນຳສະເໜີຮັບເລືອກຕັ້ງຂອງອົງການຕົນ ເພື່ອຈະນຳໄປທາບທາມຢັ່ງຫາງສຽງຈາກຜູ້ມີສິດປ່ອນບັດເລືອກຕັ້ງໃນອົງກອນຂອງຕົນ.
ຂັ້ນຕອນທີສອງ: ຈັດຕັ້ງກອງປະຊຸມທາບທາມຢັ່ງຫາງສຽງ, ເອົາຄຳຄິດຄຳເຫັນຈາກຜູ້ມີວິດປ່ອນບັດເລືອກຕັ້ງຈາກອົງກອນຂອງຕົນ ຕໍ່ກັບເປົ້າໝາຍທີ່ຄາດວ່າຈະນຳສະເໜີເປັນຜູ້ແທນສະພາ. ກໍລະນີຜູ້ທີ່ຖືກນຳສະເໜີຊື່ເປັນເປົ້າໝາຍຮັບສະໝັກເລືອກຕັ້ງນັ້ນ ເຮັດວຽກ ຫຼື ມີໜ້າທີ່ຢູ່ຫຼາຍບ່ອນ, ຕ້ອງຈັດກອງປະຊຸມທາບທາມຢູ່ບ່ອນຜູ້ກ່ຽວມັກເຮັດວຽກເປັນປະຈຳ. ບ່ອນໃດມີຜູ້ມີສິດປ່ອນບັດເລືອກຕັ້ງໜ້ອຍກວ່າ 100 ຄົນ ກໍສາມາດຈັດຕັ້ງທາບທາມໄດ້ ແຕ່ຕ້ອງຮັຍປະກັນໃຫ້ໄດ້ 2/3 ຂອງຈຳນວນພົນທີ່ເຂົ້າຮ່ວມ. ສ່ວນບ່ອນໃດມີຜູ້ມີສິດເລືອກຕັ້ງຫຼາຍກວ່າ 100 ຄົນຂຶ້ນເມືອ, ຕ້ອງຮັບປະກັນຜູ້ເຂົ້າຮ່ວມຢ່າງໜ້ອຍ 70 ຄົນຂຶ້ນເມືອ.
ກໍລະນີຜຸ້ທີ່ຖືກສະເໜີສະໝັກເລືອກຕັ້ງເປັນສະມາຊິກສະພາຄົນນັ້ນຫາກບໍ່ໄດ້ຄະແນນສຽງ 50% ຂຶ້ນເມືອຂອງທັງໝົດຜູ້ເຂົ້າຮ່ວມກອງປະຊຸມ ຖືວ່າຕົກໄປ ໃຫ້ສະເໜີຄົນອື່ນເຂົ້າມາແທນ.
ຂັ້ນຕອນທີສາມ: ຈັດຕັ້ງກອງປະຊຸມຄະນະນຳເປີດກວ້າງຂອງອົງກອນຕົນເພື່ອຄົ້ນຄວ້ານຳສະເໜີຜູ້ທີ່ສະໝັກຕໍ່ສະພາແຫ່ງຊາດ.
ທ່ານຮອງປະທານ, ຫົວໜ້າກອງເລຂາຂອງອົງການແນວໂຮມປະເທດຊາດຫວຽດນາມ ອາເລັງ ໃຫ້ຮູ້ວ່າ ໂດຍອີງຕາມມະຕິຂອງຄະນະປະຈຳສະພາປຫ່ງຊາດ ຈຳນວນຜູ້ແທນສະພາແຫ່ງຊາດຂັ້ນສູນກາງມີ 207 ຄົນ, ທ້ອງຖິ່ນ 293 ຄົນ.
ການນຳສະເໜີຜູ້ສະໝັກເລືອກຕັ້ງເປັນສະມາຊິກສະພາແຫ່ງຊາດຊຸດທີ XV ແມ່ນໝົດກຳນົດໃນວັນທີ 14 ມີນາທີ່ຈະມາເຖິງ.
