ອິນໂດເນເຊຍເລີ່ມສັກວັກຊີນຕ້ານໂຄວິດ-19 ໃຫ້ນັກຂ່າວ 5.500 ຄົນ ຫວັງສ້າງພູມຄຸ້ມກັນໃຫ້ຄົນເຮັດວຽກດ້ານສື່
February 26, 2021 - 9:19 AM
ວັນທີ 25 ກຸມພາ 2021, ອິນໂດເນເຊຍເລີ່ມສັກວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ໃຫ້ນັກຂ່າວ ໂດຍມີທ່ານ ໂຈໂກ ວິໂດໂດ ປະທານາທິບໍດີອິນໂດເນເຊຍ ຮ່ວມສັງເກດການໃນນະຄອນຫລວງຈາກາຕາ.
ທ່ານ ວິໂດໂດ ກ່າວວ່າ: ມີນັກຂ່າວໄດ້ຮັບວັກຊີນປະມານ 5.500 ຄົນ ຫລັງຮ່ວມສັງເກດການສັກວັກຊີນຄັ້ງນີ້ ເຊິ່ງກຳນົດໄວ້ລະຫວ່າງວັນທີ 25-27 ກຸມພານີ້.
ທ່ານຍັງກ່າວອີກວ່າ: ການສັກວັກຊີນຂອງປະຊາຊົນກຸ່ມນີ້ຈະເກີດຂຶ້ນຢູ່ທົ່ວນະຄອນຫລວງຈາກາຕາ ແລະ ແຂວງອື່ນໆທົ່ວປະເທດ.
ອິນໂດເນເຊຍເລີ່ມສັກວັກຊີນປ້ອງກັນພະຍາດໂຄວິດ-19 ເມື່ອວັນທີ 13 ມັງກອນຜ່ານມາ ໂດຍຕັ້ງເປົ້າສັກໃຫ້ປະຊາຊົນ 181,5 ລ້ານຄົນຈົນຮອດປີໜ້າ ເພື່ອສ້າງພູມຄຸ້ມກັນ ແລະ ຢັບຢັ້ງພະຍາດລະບາດ.
