ອິສລາເອລ ຊື້ວັກຊີນປ້ອງກັນໂຄວິດ-19, 1,2 ລ້ານໂດລາສະຫະລັດ ໃຫ້ ຊີເຣຍ ເພື່ອແລກເອົານັກໂທດຍິງສາວຄົນໜຶ່ງ

ລາຍງານຂ່າວຈາກຕ່າງປະເທດ  ວັນທີ 24 ກຸມພານີ້ວ່າ ປາກົດວ່າ ອິສລາເອລ ໄດ້ຊື້ວັກຊີນປ້ອງກັນໂຄວິດ-19, 1,2 ລ້ານໂດລາ ຈາກລັດເຊຍ ໃຫ້ກັບ ຊີເຣຍ ຕາມທີ່ໄດ້ຕົກລົງກັນໄວ້ ເພື່ອໃຫ້ປ່ອຍຕົວຜູ້ຍິງອິສລາເອລ ທີ່ກັກຂັງໄວ້ໃນ Damascus.

ວັນສຸກ ອາທິດທີ່ຜ່ານມານີ້, ອິສລາເອລ ປະກາດວ່າ ພວກຕົນໄດ້ເຮັດຂໍ້ຕົກລົງກັບ ຊີເຣຍ ເພື່ອເອົາຍິງສາວຄົນໜຶ່ງທີ່ລັກລອບຂ້າມແດນເຂົ້າໄປໃນ ຊີເຣຍ ໃນຕົ້ນເດືອນນີ້ ກັບຄືນບ້ານ ໂດຍການເປັນສັງຄິພະຍານຂອງລັດເຊຍ. ເພື່ອແລກເອົາຍິງສາວຄົນນັ້ນກັບຄືນປະເທດ, ອິສລາເອລ ໄດ້ປ່ອຍຕົວຄົນລ້ຽງແກະຊາວ ຊີເຣຍ 2 ຄົນທີ່ຂ້າມແດນເຂົ້າໄປໃນ ອິສລາເອລ.

ຫຼັງຈາກນັ້ນບໍ່ດົນ ກໍໄດ້ຍິນແຫຼ່ງຂ່າວຈາກອິສລາເອລວ່າ  ອິສລາເອລ ໄດ້ຊື້ວັກຊີນປ້ອງກັນໂຄວິດ-19  Sputnik V ຂອງລັດເຊຍໃນຈຳນວນເງິນ 1,2 ລ້ານໂດລາ ໃຫ້ກັນ ຊີເຣຍ ເພື່ອແລກເອົາຍິງສາວຄົນດັ່ງກ່າວ.

ອິສລາເອລ ບໍ່ໄດ້ເປີດເຜີຍລາຍລະອຽດກ່ຽວກັບຍິງສາວຄົນນັ້ນ ແລະ ຈຸດປະສົງລັກລອບເຂົ້າໄປໃນ ຊີເຣຍ ຂອງຍິງສາວຄົນດັ່ງກ່າວເລີຍ. ພຽງແຕ່ໃຫ້ຮູ້ວ່າ ຍິງສາວຄົນນີ້ ມີອາຍຸ 25 ປີ ໄດ້ກັບຄືນປະເທດແລ້ວ ໂດຍເດີນທາງຜ່ານໄປທາງລັດເຊຍ.