ເກີດອຸບັດຕິເຫດ ຂະບວນລົດໄຟ ຕຳກັບລົດບັນທຸກ 18 ລໍ້ ຢູ່ລັດ ເທັກຊັດ ສະຫະລັດອາເມລິກາ

ວັນທີ 23 ກຸມພາ 2021 ສຳນັກຂ່າວຕ່າງປະເທດ ລາຍງານວ່າ ເກີດເຫດຂະບວນລົດໄຟ ບັນທຸກຖ່ານຫີນ ແລະ ນໍ້າມັນ ຕຳກັບລົດບັນທຸກ 18 ລໍ້ ຢູ່ທີ່ລັດ ເທັກຊັດ ສະຫະລັດ ອາເມລິກາ ໄດ້ເກີດສຽງລະເບີດ ແລະ ມີໄຟລຸກໄໝ້ຢ່າງຮຸນແຮງ.

ທັນທີທັນໃດ ເຈົ້າໜ້າທີ່ກູ້ໄພໄດ້ມີໜ້າຢູ່ທີ່ເກີດເຫດ ແລະ ເລັ່ງຄວບຄຸມແປວໄຟ. ຂໍ້ມູນຈາກທ້ອງຖິ່ນໃຫ້ຮູ້ວ່າ ຄົນຂັບລົດ ໄຟ ແລະ ລົກ ບັນທຸກ ລ້ວນແຕ່ລອດຊີວິດ.

ເຈົ້າໜ້າທີ່ເມືອງ Milam Chris White ໃຫ້ຮູ້ວ່າ ເກີດໄຟລຸກໄໝ້ ຕົ້ນຕໍແມ່ນມາຈາກນໍ້າມັນທີ່ບັນທຸກຢູ່ໃນລົດໄຟ, ແຫຼ່ງຂ່າວຍັງໃຫ້ຮູ້ອີກວ່າ ນອກຈາກຖ່ານຫີນ ແລະ ນໍ້າມັນໃນຂະບວນລົດໄຟແລ້ວ ບໍ່ມີທາດລະເບີດໃດໆ ແລະ ທາດເປັນພິດອື່ນໆ.

ເຈົ້າໜ້າທີ່ກຳລັງສືບຄົ້ນຫາສາເຫດພາໃຫ້ສອງຂະບວນລົດຕຳກັນ ແລະ ປະເມີນຄວາມເສຍຫາຍໃນຄັ້ງນີ້.