ອີຣັກປະກາດໄຊຊະນະ ຢ່າງເປັນທາງການເໜືອ IS
ນາຍົກລັດຖະມົນຕີອີຣັກປະກາດໄຊຊະນະຢ່າງເປັນທາງການເໜືອກຸ່ມ IS ຢູ່ເມືອງໂມຊຸນ ສະໜາມຮົບທີ່ໃຊ້ເວລາໃນການສູ້ຮົບເຖິງ 9 ເດືອນ.
ສຳນັກຂ່າວຕ່າງປະເທດລາຍງານຈາກເມືອງໂມຊຸນ ປະເທດອີຣັກ ໃນວັນທີ 11 ກໍລະກົດນີ້ວ່າ: ນາຍົກລັດຖະມົນຕີ ໄຮເດີ ອັດ ອາບາດີ ຖະແຫລງຈາກເບື້ອງຕາເວັນຕົກຂອງເມືອງໂມຊຸນ ໃນວັນທີ 10 ກໍລະກົດ ປະກາດການລົ້ມສະຫລາຍຂອງລັດກໍ່ການຮ້າຍ ແລະ ລັດທິຫລອກລວງໃນເມືອງໂມຊຸນ ໂດຍຢືນຢັນວ່າກອງກຳລັງປະສົມຫລາຍກວ່າ 100.000 ຄົນ ທີ່ເປັນການຮ່ວມມືລະຫວ່າງກອງທັບອີຣັກ, ກອງກຳລັງນັກຮົບຊາວເຄີດເພດເມີກາ ແລະ ກຸ່ມນັກຮົບຊີອະອີກຫລາຍກຸ່ມ ສາມາດຂັບໄລ່ກຸ່ມ IS ອອກໄປຈາກເມືອງໂມຊຸນໄດ້ແລ້ວທັງໝົດ, ພາຍຫລັງໃຊ້ເວລາສູ້ຮົບເຖິງ 9 ເດືອນ ຫລື ນັບແຕ່ເດືອນຕຸລາປີຜ່ານມາ ແລະ ພາລະກິດຕໍ່ຈາກນີ້ຈະເປັນການເດີນໜ້າສ້າງສະຖຽນລະພາບ ແລະ ກຳຈັດເຄືອຂ່າຍຂອງກຸ່ມ IS ໃຫ້ໝົດ.
ທັງນີ້, ກຸ່ມ IS ຢຶດຄອງເມືອງໂມຊຸນ ເຊິ່ງເປັນເມືອງໃຫຍ່ທີ່ຢູ່ໃນພາກເໜືອຂອງອີຣັກ ນັບແຕ່ກາງປີ 2014 ເພື່ອສະຖາປະນາເປັນລັດອິດສະລາມ ໂດຍຍົກໃຫ້ເມືອງໂມຊຸນເປັນເມືອງຫລວງອຸປະໂຫລກຄູ່ກັບເມືອງຣັກກາ ໃນພາກເໜືອຂອງຊີຣີ. ເຖິງຢ່າງໃດກໍຕາມ, ໄຊຊະນະຄັ້ງຍິ່ງໃຫຍ່ຂອງກອງທັບອີຣັກໃນເທື່ອນີ້ຕ້ອງແລກມາດ້ວຍສະພາບຂອງເມືອງໂມຊຸນເສຍຫາຍ ລວມທັງມັດສະຢິດກາງອັດ ນູຣີ ແລະ ຫໍຄອຍສຸເຫລົ່າ ອັດ ຮັດບາ ສາສະນະສະຖານອາຍຸເກົ່າແກ່ຫລາຍກວ່າ 800 ປີ ທີ່ກຸ່ມ IS ລະເບີດທຳລາຍຖິ້ມ 1 ອາທິດກ່ອນເສຍໄຊໃຫ້ແກ່ທະຫານອີຣັກ. ສ່ວນລາຍງານຂອງສະຫະປະຊາຊາດ (UN) ລະບຸວ່າ: ພົນລະເຮືອນ 920.000 ຄົນ ຕ້ອງອົບພະຍົບອອກຈາກເມືອງໂມຊຸນ ແລະ ອີກເກືອບ 700.000 ຄົນ ຄົງຄ້າງຢູ່ທ່າມກາງສະໜາມຮົບ.
ຂະນະທີ່ທຳນຽບຂາວເຜີຍແຜ່ຖະແຫລງການຂອງປະທານາທິບໍດີ ໂດນັນ ທຣຳ ສະແດງຄວາມຍິນດີຕໍ່ໄຊຊະນະຂອງກອງທັບອີຣັກໃນສົງຄາມເມືອງໂມຊຸນ ແລະ ກ່າວວ່າ: ເປັນສັນຍານແຫ່ງການນັບຖອຍຫລັງຂອງກຸ່ມ IS ຢູ່ຊີຣີນຳອີກ, ສ່ວນກອງທັບອາເມລິກາຢູ່ອີຣັກມີຖະແຫລງການສະແດງຄວາມຍິນດີເຊັ່ນດຽວກັນ ແລະ ຮຽກຮ້ອງໃຫ້ຊາວອີຣັກສາມັກຄີກັນເພ່ືອກຳຈັດກຸ່ມ IS ໃຫ້ໝົດໄປຢ່າງສິ້ນເຊີງໃນພື້ນທີ່ອື່ນຂອງປະເທດ.
