ໄດ້ເປັນຜູ້ແທນແລ້ວ ຂໍຢ່າເປັນພະນັກງານ 10 ຂາ
ໂດຍ: ທິດກໍ່າ
ດັ່ງທົ່ວພັກ, ທົ່ວກອງທັບ ແລະ ປະຊາຊົນບັນດາເຜົ່າໄດ້ຮັບຮູ້ນຳກັນແລ້ວວ່າ, ວັນທີ 21 ກຸມພາ 2021 ທີ່ຜ່ານມາສົດໆຮ້ອນໆ ແມ່ນວັນປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາຂັ້ນແຂວງ ຊຸດທີ II. ໃນປາງບຸນໃຫຍ່ການປ່ອນບັດເລືອກຕັ້ງຄັ້ງນີ້ ໄດ້ມີຜູ້ສະໝັກ ສສຊ ທັງໝົດ 224 ທ່ານ ແຕ່ຈະເລືອກເອົາພຽງ 164 ທ່ານ, ສ່ວນຜູ້ສະໝັກເປັນ ສສຂ ແມ່ນມີທັງໝົດ 789 ທ່ານ ແຕ່ຈະເລືອກເອົາພຽງ 492 ທ່ານໃນຂອບເຂດທົ່ວປະເທດ. ມາຮອດປັດຈຸບັນ ເຮົາກໍຍັງບໍ່ທັນຮູ້ຢ່າງລະອຽດວ່າມີໃຜໄດ້, ໃຜຕົກ ຍ້ອນວ່າຜົນການເລືອກຕັ້ງບໍ່ທັນປະກາດອອກມາຢ່າງເປັນທາງການເທື່ອ.
ແຕ່ວ່າແນວໃດກໍຕາມ, ຜ່ານການຕິດຕາມຂ່າວຄາວສະພາບການປ່ອນບັດເລືອກຕັ້ງເອົາ ສສຂ ຊຸດທີ IX ແລະ ສສຂ ຊຸດທີ II ໃນຄັ້ງນີ້, ປີນີ້ເຫັນໄດ້ວ່າມີປະຊາຊົນບັນດາເຜົ່າໃນທົ່ວປະເທດໄປໃຊ້ສິດຂອງຕົນ ເພື່ອເລືອກເອົາຕົວແທນຂອງຕົນໄປນັ່ງໃນສະພາຢ່າງເປັນຂະບວນມ່ວນຊື່ນ ແລະ ອີກປະການໜຶ່ງ ກໍຍ້ອນວ່າປະເທດຊາດບ້ານເມືອງຂອງພວກເຮົາພວມມີການສ້າງສາພັດທະນາໃຕ້ການນຳພາຂອງພັກ ແລະ ລັດຖະບານ ນັບແຕ່ການເລືອກຕັ້ງຄັ້ງທຳອິດຈົນມາຮອດການເລືອກຕັ້ງຜູ້ແທນຊຸດທີ IX. ນອກຈາກນັ້ນ ກໍເຫັນໄດ້ວ່າຕະຫລອດ 45 ປີແຫ່ງການສ້າງສາພັດທະນາປະເທດຊາດ ເຮັດໃຫ້ບ້ານເມືອງຂອງພວກເຮົາກ້າວໄປດ້ວຍຈັງຫວະທີ່ໜັກແໜ້ນ, ລະບົບການເມືອງກໍມີສະຖຽນລະພາບໝັ້ນຄົງ, ເສດຖະກິດມີການຂະຫຍາຍຕົວດ້ວຍຈັງຫວະຕໍ່ເນື່ອງ, ສັງຄົມວັດທະນະທຳໂດຍລວມມີຄວາມສະຫງົບຈະເລີນຮຸ່ງເຮືອງ ຕະຫລອດເຖິງຊີວິດການເປັນຢູ່ຂອງປະຊາຊົນບັນດາເຜົ່າກໍນັບມື້ດີຂຶ້ນເລື້ອຍໆ. ອັນສຳຄັນກວ່າໝູ່ໝົດແມ່ນທຸກຄົນໃນຊາດນັບມື້ມີຄວາມຕື່ນຕົວ, ສະໝັກສະໝານສາມັກຄີ, ປຸ້ມລຸມກັນຢູ່ອ້ອມຂ້າງພັກ ແລະ ລັດຖະບານ. ເພາະສະນັ້ນ ຈຶ່ງເຮັດໃຫ້ບັ້ນເລືອກຕັ້ງເອົາ ສສຊ ແລະ ສສຂ ຄັ້ງນີ້ມີຜົນສຳເລັດທຸກປະການ ນັບທັງປະຊາຊົນບັນດາເຜົ່າກໍມີການຕື່ນຕົວອອກໄປໃຊ້ສິດປະຊາທິປະໄຕຂອງຕົນຢ່າງຫລວງຫລາຍພາຍມາກ ທັງເປັນຂະບວນມ່ວນຊື່ນໃນທຸກທ້ອງຖິ່ນ ນັບແຕ່ຕົວເມືອງໄປເຖິງຊົນນະບົດ. ສ່ວນວ່າຜົນການເລືອກຕັ້ງຢ່າງລະອຽດລະອໍ ໃຜໄດ້ໃຜຕົກນັ້ນກໍຕ້ອງໄດ້ລໍຄອຍຕິດຕາມນຳກັນອີກບໍ່ພໍເທົ່າໃດວັນ ພວກເຮົາກໍຈະຮັບຮູ້ໂດຍທົ່ວເຖິງກັນ ແຕ່ອັນທີ່ແນ່ນອນກໍແມ່ນຈະໄດ້ເຫັນໜ້າເຫັນຕາຜູ້ແທນສະພາແຫ່ງຊາດ ຊຸດທີ IX ທີ່ຕົນໄດ້ເລືອກໄປນັ່ງຢູ່ກອງປະຊຸມສະພາຄັ້ງປະຖົມມະລືກໃນວັນທີ 22 ມີນາ 2021 ທີ່ຈະມາເຖິງນີ້.
ເຖິງຢ່າງໃດກໍດີ, ສິ່ງທີ່ຢາກຝາກໄວ້ກັບຜູ້ແທນສະພາແຫ່ງຊາດ ຊຸດທີ IX ກັບຜູ້ແທນສະພາຂັ້ນແຂວງ ກໍແມ່ນບັນຫາໃນກະໂຕຜູ້ແທນເອງນັ້ນ ໃນເມື່ອເປັນຜູ້ແທນແລ້ວຢ່າເປັນພະນັກງານ 10 ຂາ. ຄຳວ່າພະນັກງານ 10 ຂານັ້ນ ອັນທີໜຶ່ງກໍແມ່ນ ຂາໂຕະ 4 ຂາ, ຂາຕັ່ງອີ້ 4 ຂາ ລວມກັນເປັນ 8 ຂາ ມາບວກໃສ່ຂາໂຕເອງ 2 ຂາ ພໍດີເປັນ 10 ຂາ. ສ່ວນຄວາມໝາຍນັ້ນ ກໍແມ່ນໃນເມື່ອເປັນຜູ້ແທນໄປແລ້ວ ຢ່າມົວເມົານັ່ງແຕ່ຢູ່ໃນໂຕະໃນຕັ່ງລໍຖ້າອອກແຕ່ຄຳສັ່ງ ຕ້ອງລົງໄປໃກ້ຊິດຕິດແທດກັບປະຊາຊົນ, ບໍ່ງ່ຽງຫູຟັງປະຊາຊົນວ່າເຂົາຈົ່ມທຸກຈົ່ມຍາກອີ່ຫຍັງ, ເຂົາຂັດຂ້ອງໝອງໃຈອີ່ຫຍັງ, ເຂົາຕ້ອງການຫຍັງ, ມີບັນຫາຫຍັງທີ່ຈະຕ້ອງແກ້ໄຂຊ່ວຍປະຊາຊົນໃນເຂດເລືອກຕັ້ງທີ່ເຮົາຮັບຜິດຊອບ.
ເທົ່າທີ່ຜ່ານມາ, ທິດກໍ່າ ເຄີຍເຫັນຜູ້ແທນບາງທ່ານ, ບາງຄົນບໍ່ຄ່ອຍລົງໄປຫາປະຊາຊົນ ຈົນເຂົາຈົ່ມນັບແຕ່ເລືອກເອົາເພິ່ນໄດ້ເປັນຜູ້ແທນແລ້ວ ໜ້າທໍ່ສອງນິ້ວກະບໍ່ເຫັນ ຫລື ເຫັນກໍແມ່ນຕອນເພິ່ນໄປປະຊຸມອອກໂທລະພາບເທົ່ານັ້ນ. ຜູ້ແທນບາງທ່ານບາງຄົນເພິ່ນພັດແກ້ວ່າຄານຳວຽກນຳງານວິຊາສະເພາະເບື້ອງລັດ, ທັງບໍ່ມີງົບປະມານລົງຮາກຖານໄປຫາປະຊາຊົນວ່າຊັ້ນ. ຖ້າເປັນຄືວ່ານີ້ ມັນກໍບໍ່ຕ່າງຫຍັງກັບໄມ້ຄ້ຳກ້ວຍ ຫລືວ່າ ກ້ວຍຄ້ຳໄມ້ ສຸດທ້າຍມາກໍເປັນຜູ້ແທນທີ່ຫ່າງເຫີນຈາກປະຊາຊົນ, ບໍ່ຮູ້ສະພາບຄວາມຂັດຂ້ອງໝອງໃຈຂອງປະຊາຊົນໃນເຂດເລືອກຕັ້ງຕົນເອງຢ່າງລະອຽດລະອໍຖີ່ຖ້ວນ.
ຄວາມມຸ່ງຫວັງ ຫລືວ່າ ສິ່ງທີ່ປະຊາຊົນຢາກໃຫ້ຜູ້ແທນແກ້ຢ່າງເຖິງກົກເຖິງຮາກກໍແມ່ນມີຢູ່ສາມສີ່ຢ່າງຄື: ອັນທີໜຶ່ງ ແມ່ນໃຫ້ປາບການສໍ້ລາດບັງຫລວງໃນຖັນແຖວພະນັກງານລັດ, ອັນສອງມາ ກໍແມ່ນປາບຢາເສບຕິດ, ອັນສາມ ແມ່ນຕ້ອງປາບພວກປຸ້ນຈີ້ຂ້າເຈົ້າເອົາຂອງຂີ້ລັກງັດແງະອັນເປັນສ້ຽນໜາມສັງຄົມໃນບ້ານເມືອງໃຫ້ໝົດສ້ຽງລົງຢ່າງເຫັນກັບຕາ. ສ່ວນບັນຫາອື່ນໆທີ່ພົວພັນເຖິງພາລະກິດຂອງຜູ້ແທນໂດຍກົງນັ້ນ ກໍຕ້ອງເຮັດຫລ້ອນຕາມການມອບໝາຍຂອງພັກ ແລະ ລັດຖະບານວາງອອກ ຈຶ່ງສົມກັບວ່າຜູ້ແທນປະຊາຊົນ, ມາຈາກປະຊາຊົນ ແລະ ເພື່ອປະຊາຊົນ.
