ຍີ່ປຸ່ນຕົກລົງຮ່ວມມືກັບອົງການອາຫານໂລກ ໄລຍະຜ່ານມາຊ່ວຍເຫຼືອຜູ້ປະສົບໄພແຂວງພາກໃຕ້ຂອງລາວ 1,7 ລ້ານໂດລາສະຫະລັດ

ວັນທີ 19 ກຸມພາຜ່ານມານີ້, ເອກອັກຄະລັດຖະທູດຍີ່ປຸ່ນ ປະຈຳລາວ ແລະ ອົງການອາຫານໂລກ ເຫັນດີເຮັດວຽກຮ່ວມກັນໃນການຊ່ວຍເຫຼືອຊຸມຊົນຜູ້ທີ່ໄດ້ຮັບຜົນກະທົບຈາກການປ່ຽນແປງຂອງສະພາບດິນຟ້າອາກາດ, ພິທີເຊັນສັນຍາຮ່ວມມືໃນໂຄງການ ລະຫວ່າງ ສະຖານເອກອັກຄະລັດຖະທູດຍີ່ປຸ່ນ ແລະ ອົງ ການອາຫານໂລກຄັ້ງນີ້ຕາງໜ້າປະເທດຍີ່ປຸ່ນແມ່ນທ່ານ ທາເກວະກະ ເຄໂຊ ເອກອັກຄະລັດຖະທູດ ປະຈຳລາວ ແລະ ຕາງໜ້າຫ້ອງການອາຫານໂລກແມ່ນທ່ານ ຢານ ເດວບາເຣີ ຜູ້ອຳນວຍການຫ້ອງການອົງການ ອາຫານໂລກປະຈຳ, ໂດຍການເຂົ້າຮ່ວມເປັນສັກຂີພິຍານຂອງທ່ານ ວິໄລພົງ ສີສົມຫວັງ ຫົວໜ້າກົມສັງຄົມສົງເຄາະ, ກະຊວງແຮງງານ ແລະ ສະຫວັດດີການສັງຄົມ.

ໃນໄລຍະ 2 ປີທີ່ຜ່ານມາຍີ່ປຸ່ນໄດ້ປະກອບສ່ວນຊ່ວຍເຫຼືອເປັນຈຳນວນ 180 ລ້ານເຢັນ ຫຼື ປະມານ 1,7 ລ້ານໂດລາສະຫະລັດ ເພື່ອບັນເທົາຜົນກະທົບຈາກອຸທົກກະໄພ ໃນເດືອນຕຸລາປີ 2020, ໃນບັນດາແຂວງພາກໃຕ້ຂອງລາວ, ເຊິ່ງການປະກອບສ່ວນຂອງປະຊາຊົນຍີ່ປຸ່ນຜ່ານອົງການອາຫານໂລກ ຈະໄດ້ຊື້ເຂົ້າສານ 1.115 ໂຕນ ເພື່ອແຈກຢາຍໃຫ້ປະຊາຊົນຈຳນວນ 35 ພັນຄົນ ໃນ 65 ຊຸມຊົນທີ່ຢູ່ພາກກາງ ແລະ ພາກໃຕ້ຂອງລາວ.