ວັກຊີນໂຄວິດເຖິງມາເລເຊຍແລ້ວ ພ້ອມເລີ່ມຕົ້ນສັກ 24 ກຸມພານີ້
ມາເລເຊຍໄດ້ຮັບວັກຊີນຊຸດທຳອິດຈາກ Pfizer ແລະ BioNTech ຮຽບຮ້ອຍແລ້ວ ຈຳນວນ 3 ແສນກວ່າໂດສ ແລະ ຄາດວ່າຈະໄດ້ຮັບວັກຊີນເພີ່ມອີກໃນມໍ່ໆນີ້ ເຊິ່ງມາເລເຊຍສັ່ງວັກຊີນສູດນີ້ລວມ 32 ລ້ານໂດສ ໂດຍມາເລເຊຍຈະເລີ່ມສັກວັກຊີນສູດນີ້ໃຫ້ປະຊາຊົນໃນວັນທີ 24 ກຸມພານີ້ ເຊິ່ງໄວກວ່າກຳນົດສອງວັນ ໂດຍນາຍົກລັດຖະມົນຕີ ແລະ ລັດຖະມົນຕີກະຊວງສາທາລະນະສຸກຈະເປັນສອງຄົນທຳອິດທີ່ໄດ້ສັກວັກຊີນ.
ມາເລເຊຍຈະສັກວັກຊີນໃຫ້ປະຊາຊົນຢ່າງໜ້ອຍ 80% ຂອງປະຊາກອນທົ່ວປະເທດ 32 ລ້ານຄົນພາຍໃນປີນີ້ ເພື່ອຫວັງພິກຟື້ນເສດຖະກິດທີ່ໄດ້ຮັບຜົນກະທົບຢ່າງໜັກຈາກມາດຕະການເຂັ້ມງວດໂຄວິດ.
ນອກຈາກວັກຊີນຈາກ Pfizer ແລ້ວ, ຄາດວ່າວັກຊີນຊຸດທຳອິດຈາກຊິໂນແວກ ໄບໂອເທັກ ຈາກຈີນຈະມາເຖິງມາເລເຊຍໃນວັນທີ 25 ກຸມພານີ້ ເຊິ່ງຕອນນີ້ກຳລັງລໍຖ້າອະນຸມັດການນຳໃຊ້ຈາກທາງການມາເລເຊຍຢູ່.
