ຢ່າເອົາໂຄວິດ-19 ມາຂ້າຄົນໃນເຮືອນ
ໂດຍ: ທິດກໍ່າ
ໃນລະຫວ່າງສາມສີ່ເດືອນມານີ້, ບັນຫາຂ່າວຄາວແຮງງານລາວລັກຂ້າມມາແຕ່ໄທເຂົ້າມາລາວແບບຜິດກົດໝາຍປາກົດວ່າມີໃຫ້ເຫັນເປັນໄລຍະໆ ອັນສາເຫດດ້ານໜຶ່ງກໍຍ້ອນວ່າລາວກັບໄທມີຊາຍແດນຕິດຈອດກັນແຕ່ເໜືອສຸດໃຕ້, ອັນສອງມາລະຫວ່າງຄົນລາວກັບຄົນໄທ ໂດຍສະເພາະກັບຄົນອີສານຍັງມີສາຍຍາດ ທັງເປັນສາຍເລືອດຕິດພັນກັນມາແຕ່ສະໄໝບູຮານ ຈົນມາຮອດປັດຈຸບັນກໍຍັງຄົງພົວພັນເຊື່ອມໂຍງໄປມາຫາສູ່ກັນບົນສາຍຍາດ ເຊິ່ງບໍ່ສາມາດຕັດຂາດອອກຈາກກັນໄດ້. ສ່ວນເຫດຜົນອັນທີສາມ ຖືວ່າຊ່ວງນີ້ເກີດມີບັນຫາວິກິດໂຄວິດ-19 ໄດ້ມາອາລະວາດຂ້າຄົນໃນໂລກ ແລະ ພາກພື້ນ ສົ່ງຜົນກະທົບໃນຫລາຍປະເທດຈຳຕ້ອງປິດການເຂົ້າ-ອອກພາຍໃນພາຍນອກ ເພື່ອປ້ອງກັນສະກັດກັ້ນຢ້ານພະຍາດດັ່ງກ່າວແຜ່ລະບາດໄປໃນວົງກວ້າງ. ຈາກສະພາບດັ່ງກ່າວ ໄດ້ເຮັດໃຫ້ລະບົບເສດຖະກິດຂອງແຕ່ລະປະເທດມີບັນຫາວິກິດສັ່ນຄອນຢ່າງໃຫຍ່ຫລວງ ເປັນຕົ້ນນາຍຈ້າງເລີກຈ້າງງານຍ້ອນບໍ່ມີການຜະລິດ, ບັນດາລູກຈ້າງທັງຫລາຍກໍພາກັນຫວ່າງງານເປັນຖົມເຖ ທັງຢ້ານການແຜ່ລະບາດຈາກພະຍາດໂຄວິດ-19 ຈຶ່ງພາກັນແຕກຕື່ນໜີຕາຍກັບຄືນປະເທດໃຜມັນດ້ວຍຄວາມໝົດຫວັງ.
ສຳລັບຄົນລາວທີ່ພາກັນເຫີ່ໄປຊອກຢູ່ຫາກິນ ຫລື ອອກແຮງງານຢູ່ປະເທດໄທ ເພື່ອຫາລາຍໄດ້ມາລ້ຽງປາກລ້ຽງທ້ອງ ແລະ ຄ້ຳຈູນຄອບຄົວ ເຊິ່ງໃນແຕ່ລະປີບໍ່ຕໍ່າກວ່າແສນໆຄົນໃນທົ່ວປະເທດກໍພາກັນຫຸບຫອບກັບຄືນບ້ານ ນັບແຕ່ເກີດວິກິດຈາກໂຄວິດ-19 ໃນຕົ້ນປີ 2020 ຈົນມາຮອດປັດຈຸບັນກໍຍັງທະຍອຍກັນມາຢ່າງບໍ່ຂາດໄລຍະ ໃນນີ້ສ່ວນຫລວງຫລາຍກໍກັບຄືນມາແບບຖືກຕ້ອງຕາມກົດໝາຍ ແລະ ມີສ່ວນໜ້ອຍມາແບບຜິດກົດໝາຍ ຍ້ອນຫລາຍປັດໄຈຕ່າງກັນ ເພາະມັນຂຶ້ນກັບເງິນ ແລະ ງານເປັນຂອດຕັດສິນ. ຖືວ່າສະພາບໃນປັດຈຸບັນ ໃນເງື່ອນໄຂທີ່ສອງປະເທດ ລາວ-ໄທ ໄດ້ປິດຊາຍແດນເຂົ້າ-ອອກ ເພື່ອຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ກໍຍັງຄົງເຫັນປາກົດການແຮງງານລາວຢູ່ໄທລັກຂ້າມມາຢ່າງຊະຊາຍຜິດກົດໝາຍ ທັງຜິດຕໍ່ມາດຕະການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ທີ່ຄະນະສະເພາະກິດ ກໍຄືລັດຖະບານເຮົາໄດ້ວາງອອກ ເຊິ່ງຫລ້າສຸດໃນວັນທີ 15 ກຸມພາ 2021 ຜ່ານມາ ທາງເຈົ້າໜ້າທີ່ 1191 ປ່າຝາງ ເມືອງຫາດຊາຍຟອງ ນະຄອນຫລວງວຽງຈັນ ໄດ້ສົມທົບກັບຫ້ອງສັນຕິບານນະຄອນຫລວງວຽງຈັນ ພ້ອມອົງການປົກຄອງທ້ອງຖິ່ນໄດ້ກັກຕົວນາງ ວຽງທອງ ອາຍຸ 35 ປີ ອາຊີບກຳມະກອນ ຢູ່ບ້ານດອນຂາຊ້າຍ ເມືອງຫາດຊາຍຟອງ ນະຄອນຫລວງວຽງຈັນ ຍ້ອນຜູ້ກ່ຽວລັກຂ້າມມາລາວແບບຜິດກົດໝາຍ ໂດຍຈ້າງໂຊເຟີ້ລົດພວງຄົນໄທເປັນຈຳນວນ 3.000 ບາດ ເຂົ້າມາລາວຜ່ານຂົວມິດຕະພາບ ລາວ-ໄທ I ໃນວັນທີ 10 ກຸມພາ 2021 ຜ່ານມານີ້ເອງ. ນອກຈາກລາຍດັ່ງກ່າວແລ້ວ ກໍຍັງມີຜູ້ອື່ນໆພາກັນລັກເຂົ້າມາຕາມທ້ອງຖິ່ນຂອງຕົນ ເປັນຕົ້ນໃນຕົ້ນເດືອນກຸມພາຜ່ານມາ ກໍມີປາກົດການຢູ່ແຖວເມືອງສັງທອງ ເຊິ່ງທາງເຈົ້າໜ້າທີ່ເຮົາກໍສາມາດພົບເຫັນ ແລະ ກັກຕົວນຳໄປເຂົ້າສູນ ເພື່ອກັກກັນຕາມຂໍ້ກຳນົດກົດລະບຽບຂອງບ້ານເມືອງ.
ເວົ້າເຖິງການແຜ່ລະບາດຂອງພະຍາດໂຄວິດ-19 ຢູ່ປະເທດໄທຖືວ່າໜັກໜ່ວງກວ່າປະເທດລາວເຮົາ ຍ້ອນວ່າປະເທດໄທມີພົນລະເມືອງໜາແໜ້ນ ຈຳນວນຜູ້ຕິດເຊື້ອກໍມີຫລາຍໝື່ນຫລາຍແສນຄົນ ໃນນີ້ກໍມີຜູ້ເສຍຊີວິດຍ້ອນພະຍາດດັ່ງກ່າວໄປຈຳນວນໜຶ່ງແລ້ວ. ຍ້ອນປັດໄຈ ແລະ ສາເຫດດັ່ງກ່າວຈຶ່ງເຮັດໃຫ້ແຮງງານລາວຈຳນວນຫລວງຫລາຍພາກັນຫລັ່ງໄຫລກັບຄືນບ້ານເກີດເມືອງນອນ ເພື່ອຊອກຊ່ອງທາງ ແລະ ໂອກາດໃໝ່ໃນການທຳມາຫາກິນ ຫລື ບໍ່ກໍເມື່ອໃດສະພາບການແຜ່ລະບາດຂອງພະຍາດໂຄວິດ-19 ຫລຸດໜ້ອຍຖອຍລົງ ທາງການເຮົາມີການເປີດດ່ານກໍຈະມີໂອກາດກັບຄືນໄປທຳງານຄືນໃໝ່.
ແຕ່ວ່າແນວໃດກໍຕາມ, ຖ້າບຸກຄົນໃດ, ກຸ່ມຄົນໃດທີ່ຍັງຄ້າງຄາຢູ່ໄທ ຫລື ຢູ່ປະເທດອື່ນ ຫາກຕ້ອງການກັບຄືນປະເທດໃນຊ່ວງການປະຕິບັດມາດຕະການຜ່ອນຜັນຕ້ານໂຄວິດ-19 ກໍຂໍໃຫ້ທຸກຄົນປະຕິບັດຕາມຂໍ້ກຳນົດກົດລະບຽບຂອງຄະນະສະເພາະກິດວາງອອກ ເປັນຕົ້ນຕ້ອງຜ່ານການຄັດກອງ ແລະ ກັກກັກຕາມມາດຕະຖານ 14 ວັນ ຫ້າມເດັດຂາດລັກລອບເຂົ້າມາແບບຜິດກົດໝາຍ, ຖ້າຜູ້ໃດ ຫລື ພາກສ່ວນໃດຝ່າຝືນບໍ່ມີຄວາມຮັບຜິດຊອບຕໍ່ຕົນເອງ ແລະ ສັງຄົມກໍບໍ່ຕ່າງຫຍັງກັບເອົາພະຍາດໂຄວິດ-19 ມາຂ້າຄົນໃນເຮືອນນັ້ນເອງ.
