ທຣຳ ຕ້ອງສູ້ກັບວິບາບກຳ ທີ່ສ້າງໄວ້

ໂດນັລທຣຳ ອະດີດປະທານາທິບໍດີ ສະຫະລັດ ຢູ່ໃນທຳນຽບຂາວສະໄໝດຽວ ກໍຍັງຕ້ອງກ່ຽວຂ້ອງກັບເລື່ອງລາວທີ່ສ້າງໄວ້ຕໍ່ໄປ ແລະ ຍັງຈະຕ້ອງໄດ້ຂຶ້ນສານ ດ້ວຍຂໍ້ຫາຫຼາຍກະໂທງ ທັງໃໝ່ ແລະ ເກົ່າ ທີ່ກ່ຽວຂ້ອງກັບພຶດຕິກຳ ການປຸກລະດົມການປະທ້ວງດ້ວຍແນວຄວາມຄິດທີ່ຮຸນແຮງ ບຸກເຂົ້າໃນອາຄານລັດຖະສະພາ ເມື່ອວັນທີ 6 ມັງກອນຜ່ານມາ.

ຫຼັງຈາກລອດຈາກການຖືກຖອດຖອນ ຈາກລັດຖະສະພາ ທຣຳ ກໍເລີ່ມຫຼີ້ນງານ ກັບພວກດຽວກັນ ຊຶ່ງເປັນການແກ້ແຄ້ນຄືນ ກັບສະມາຊິກພັກ ຣີພັບຣິກັນ ໃຫ້ຮູ້ວ່າ ການຫັກຫຼັງ ທຣຳ ນັ້ນ ຈະສົ່ງຜົນຮ້າຍເມື່ອການເລືອກຕັ້ງຄັ້ງໜ້າມາເຖິງ.

ທຣຳ ແຄ້ນກໍເພາະວ່າ ຄະແນນຖອດຖອນ 57 ສຽງ ວ່າ ທຣຳ ມີຄວາມຜິດ ແລະ ມີພຽງ 43 ສຽງຂອງພັກ ຣີພັບຣິກັນ ວ່າບໍ່ຜິດ.

ທຣຳ ລະບາຍຄວາມແຄ້ນອອກມາຄັ້ງທຳອິດ ດ້ວຍການໂຈມຕີ ສະມາຊິດວຸດທິສະພາ ມິດແມັກຄອນເນັດ ຜູ້ນຳສຽງຂ້າງໜ້ອຍໃນວຸດທິສະພາວ່າ ເປັນຄົນໜ້າເບື່ອໜ່າຍ ໄຮ້ສີສັນ ຂາດຄວາມຄິດ ຈີນຕະນາການແນວຄິດການເມືອງ. ນີ້ເປັນການເອົາຄືນຫຼັງຈາກ ແມັກຄອນເນັດ ຫຼີ້ນງານ ທຣຳ ຢ່າງເຈັບແສບ.

ໃນຂະນະທີ່ໄຕ່ສວນນັ້ນ, ແມັກຄອນເນລ ປາໄສວ່າ ທຣຳ ຜິດທີ່ລະເລີຍຕໍ່ໜ້າທີ່ທີ່ບໍ່ຫ້າມປາມກຸ່ມຜູ້ປະທ້ວງບຸກເຂົ້າໄປໃນອາຄານລັດຖະສະພາ ແລະ ຍັງມີຊ່ອງທາງຈະຫຼີ້ນງານ ທຣຳ ໃຫ້ຮັບຜິດຊອບໄດ້ໃນຄະດີອາຍາ ແລະ ທາງແພ່ງ.