Facebook ປິດກັ້ນການເຂົ້າເຖິງ ສຳນັກຂ່າວທຸກແຫ່ງຂອງອົດສະຕຣາລີ
ຜູ້ນຳໃຊ້ເຟສບຸກຢູ່ອົດສະຕຣາລີບໍ່ສາມາດເຂົ້າເຖິງ ແລະ ແຊຣເນື້ອໃນຂ່າວຂອງສຳນັກຂ່າວທຸກແຫ່ງໃນໂລກ ບໍ່ເວັ້ນແຕ່ສື່ໃນປະເທດຕົນເອງ. ຂະນະທີ່ຜູ້ນຳໃຊ້ຢູ່ຕ່າງປະເທດບໍ່ສາມາດເຂົ້າເຖິງ ແລະ ແບ່ງປັນເນື້ອໃນຂອງສຳນັກຂ່າວຈາກອົດສະຕຣາລີ “ເພື່ອຕອບໂຕ້” ກໍລະນີທີ່ລັດຖະບານແຄນເບີຣາຊຸກຍູ້ກົດໝາຍ “ເກັບຄ່າຂ່າວ”.
ສຳນັກຂ່າວຕ່າງປະເທດລາຍງານວ່າ: ເຟສບຸກປະກາດການປິດກັ້ນຜູ້ນຳໃຊ້ຢູ່ອົດສະຕຣາລີ ຈາກການເຂົ້າເຖິງ ແລະ ແບ່ງປັນເນື້ອໃນຂ່າວຂອງສຳນັກຂ່າວທຸກແຫ່ງທົ່ວໂລກ ຈາກແພກຟອມຂອງບໍລິສັດ. ຂະນະທີ່ຜູ້ນຳໃຊ້ຢູ່ຕ່າງປະເທດຈະບໍ່ສາມາດເຂົ້າເຖິງ ແລະ ແບ່ງປັນເນື້ອໃນຂອງສຳນັກຂ່າວຈາກອົດສະຕຣາລີ “ຊົ່ວຄາວ” ນັບແຕ່ວັນທີ 18 ກຸມພາ 2021 ເປັນຕົ້ນໄປ ເຊິ່ງຈະສົ່ງຜົນກະທົບໄປທົ່ວໂລກແບບບໍ່ຕ້ອງສົງໄສ.
ເຖິງຢ່າງໃດກໍຕາມ, ມີລາຍງານວ່າ: ເພຈໃນເຟສບຸກຂອງໜ່ວຍງານລັດຫລາຍແຫ່ງຢູ່ອົດສະຕຣາລີ ລວມທັງສຳນັກງານອຸຕຸນິຍົມວິທະຍາແຫ່ງຊາດ ແລະ ສຳນັກງານສາທາລະນະສຸກຂອງຫລາຍລັດ ບໍ່ສາມາດເຂົ້າເຖິງໄດ້ເຊັ່ນກັນ. ຂະນະທີ່ສຳນັກຂ່າວທຸກແຫ່ງໃນອົດສະຕຣາລີພ້ອມໃຈກັນວິພາກວິຈານສະຖານະການທີ່ເກີດຂຶ້ນຢ່າງໜັກ. ຕໍ່ມາກະຊວງການສື່ສານຢູ່ນະຄອນຫລວງແຄນເບີຣາ ອອກຖະແຫລງການວ່າ: ລັດຖະບານອົດສະຕຣາລີບໍ່ໄດ້ຮັບແຈ້ງລ່ວງໜ້າ ວ່າເຟສບຸກຈະຕັດສິນໃຈແບບນີ້ ແລະ ຮຽກຮ້ອງອີກຝ່າຍກັບມາເຊື່ອມຕໍ່ລະບົບໂດຍໄວທີ່ສຸດ.
ທັງນີ້, ການເຄື່ອນໄຫວດັ່ງກ່າວຂອງເຟສບຸກ ເກີດຂຶ້ນໃນເວລາດຽວກັນທີ່ສະພາຜູ້ແທນລາຊະດອນຂອງອົດສະຕຣາລີ “ຢູ່ໃນຂັ້ນຕອນສຸດທ້າຍ” ຂອງການພິຈາລະນາ ແລະ ລົງມະຕິຮັບຮອງກົດໝາຍ ວ່າດ້ວຍກໍລະນີທີ່ບໍລິສັດເຕັກໂນໂລຊີຕ້ອງບັນລຸຂໍ້ຕົກລົງເລື່ອງຜົນຕອບແທນກັບສຳນັກຂ່າວ ຫລື ບໍລິສັດຜູ້ຜະລິດເນື້ອຫາໃນປະເທດ ກ່ອນນຳຂໍ້ມູນໄປເຜີຍແຜ່ໃນແພກຟອມ ເພື່ອຜົນປະໂຫຍດທາງການຄ້າ ໂດຍກົດໝາຍມີທ່າອ່ຽງໄດ້ຮັບຄວາມເຫັນພ້ອມສູງ ເມື່ອພັກແຮງງານ ເຊິ່ງເປັນພັກແກນນຳຝ່າຍຄ້ານ ສົ່ງສັນຍານສະໜັບສະໜູນ.
ອີກດ້ານໜຶ່ງ, ອັລຟາເບັດ ເຊິ່ງເປັນບໍລິສັດແມ່ຂອງກູເກິລ ຂູ່ວ່າຈະໂຈະການໃຫ້ບໍລິການຢູ່ອົດສະຕຣາລີເຊັ່ນກັນ, ແຕ່ຕໍ່ມາມີລາຍງານວ່າ: ຜູ້ບໍລິຫານຂອງກູເກິລບັນລຸຂໍ້ຕົກລົງກັບນິວ ຄໍປໍເຣຊັນ ອານາຈັກສື່ສານມວນຊົນຂອງຕະກູນເມີດ໊ອກ ເຊິ່ງເປັນເຈົ້າຂອງສື່ໃຫຍ່ຫລາຍແຫ່ງ ລວມທັງຟ໊ອກ ນິວ ແລະ ເດິ ວໍ ສະຕຣີດ ເຈີນັລ ກ່ຽວກັບການຊື້ຂາຍຂ່າວແລ້ວ.
