ອັງກິດທົດລອງໃຫ້ຄົນຕິດເຊື້ອໄວຣັສເພື່ອງານວິໄຈ
ອັງກິດຈະເປັນປະເທດທຳອິດຂອງໂລກທີ່ໃຫ້ອາສາສະໝັກຕິດເຊື້ອໄວຣັສໂຄວິດ-19 ເພື່ອຄວາມຄືບໜ້າໃນງານວິໄຈທາງການແພດ.
ສຳນັກຂ່າວຣອຍເຕີລາຍງານໃນວັນທີ 17 ກຸມພາ 2021 ວ່າ: ລັດຖະບານອັງກິດຖະແຫລງວ່າ: ອັງກິດຈະເປັນປະເທດທຳອິດຂອງໂລກທີ່ໃຫ້ອາສາສະໝັກທົດລອງຕິດເຊື້ອໄວຣັສໂຄວິດ-19 ເພື່ອຄວາມຄືບໜ້າໃນການວິໄຈທາງການແພດ ໂດຍການທົດລອງຈະມີຂຶ້ນໃນໜຶ່ງເດືອນນີ້ ໃຊ້ອາສາສະໝັກທົດລອງຈຳນວນ 90 ຄົນທີ່ມີສຸຂະພາບດີ ອາຍຸລະຫວ່າງ 18-30 ປີ ຕິດເຊື້ອໂຄວິດ-19 ໃນສະພາບແວດລ້ອມທີ່ປອດໄພ ແລະ ຄວບຄຸມໄດ້ ເພື່ອເພີ່ມຄວາມເຂົ້າໃຈຫລາຍຂຶ້ນເຖິງວິທີການທີ່ເຊື້ອໄວຣັສມີຜົນກັບຄົນ ແລະ ເພື່ອໃຫ້ການທົດລອງມີຄວາມປອດໄພຍິ່ງຂຶ້ນ. ເຊື້ອໄວຣັສສາຍພັນທີ່ລະບາດຢູ່ອັງກິດມາແຕ່ເດືອນມີນາປີຜ່ານມາ ຈະຖືກນຳມາໃຊ້ທົດລອງ ແທນທີ່ຈະເປັນໄວຣັສສາຍພັນໃໝ່.
ການທົດລອງຈະເລີ່ມນຳເອົາເຊື້ອໄວຣັສຈຳນວນນ້ອຍທີ່ສຸດສັກເຂົ້າໄປໃນຄົນ ເພື່ອໃຫ້ເກີດການຕິດເຊື້ອ. ດັ່ງນັ້ນ ອາສາສະໝັກຈະຕ້ອງໄດ້ຮັບວັກຊີນກ່ອນການທົດລອງຕິດເຊື້ອ. ນອກຈາກນັ້ນ ອາສາສະໝັກຍັງຈະໄດ້ຮັບເງິນຊົດເຊີຍສຳລັບການທົດລອງວິໄຈຄັ້ງນີ້ນຳ.
ລັດຖະມົນຕີສາທາລະນະສຸກຂອງອັງກິດ ກ່າວວ່າ: ການທົດລອງຈະຊ່ວຍໃຫ້ຫາວັກຊີນດີທີ່ສຸດ ແລະ ມີປະສິດທິພາບຫລາຍທີ່ສຸດສຳລັບໃຊ້ໃນໄລຍະຍາວ.
ໜ່ວຍງານສະເພາະກິດດ້ານວັກຊີນຂອງລັດຖະບານອັງກິດ, ອິມພີຣຽວ ຄໍເລັກ ລອນດອນ, ເດິ ຣໍໂຢ ຟຣີ ລອນດອນ ເອັນເອຊເອັສ ຟາວເດຊັນ ທຣັສ ແລະ ບໍລິສັດ hVIVO ໄດ້ຮ່ວມກັນເຮັດໂຄງການທົດລອງເພື່ອການວິໄຈຄັ້ງນີ້.
