ຝຶກອົບຮົມການສ້າງຄວາມເຂັ້ມແຂງ ໃຫ້ວຽກງານຄຸ້ມຄອງຄວາມສ່ຽງໄພພິບັດ

ກອງປະຊຸມຝຶກອົບຮົມການສ້າງຄວາມເຂັ້ມແຂງ ໃຫ້ແກ່ວຽກງານ ການຄຸ້ມຄອງຄວາມສ່ຽງໄພພິບັດ ຢູ່ແຫລ່ງມໍລະດົກໂລກ ໄຫຫີນ ແຂວງຊຽງຂວາງ ໄດ້ຈັດຂຶ້ນໃນ ວັນທີ 15-19 ກຸມພາ 2021 ນີ້ ໂດຍການເປັນປະທານຮ່ວມ ຂອງ ທ່ານ ທອງໃບ ໂພທິສານ ຫົວໜ້າກົມມໍລະດົກ, ຫົວໜ້າກອງເລຂາ ມໍລະດົກແຫ່ງຊາດ ແລະ ທ່ານ ເພັດສະໝອນ ສຸລິຍະແສງ ຫົວໜ້າຫ້ອງການມໍລະດົກແຂວງຊຽງຂວາງ,  ມີຜູ້ຕາງໜ້າຈາກຫ້ອງການມໍລະດົກແຂວງຈຳປາສັກ, ຫ້ອງການມໍລະດົກຫລວງພະບາງ, ຕາງໜ້າໜ່ວຍງານມໍລະດົກຂັ້ນບ້ານ, ຂັ້ນເມືອງ ຫ້ອງການ ຖວທ ເມືອງ, ພະແນກການ, ກົມກອງ ອົງການທີ່ກ່ຽວຂ້ອງເຂົ້າຮ່ວມ. ທັງນີ້, ກໍເພື່ອເປັນການເສີມສ້າງຄວາມເຂັ້ມແຂງ ໃຫ້ແກ່ອົງການປົກຄອງຢູ່ຂັ້ນສູນກາງ ແລະ ທ້ອງຖິ່ນ ໃຫ້ພະນັກງານວິຊາການໃນການຈັດຕັ້ງປະຕິບັດການກຽມຄວາມພ້ອມ ແລະ ການຫລຸດຜ່ອນຄວາມສ່ຽງໄພພິບັດ ທີ່ຕິດພັນກັບມໍລະດົກວັດທະນະທຳ, ເພື່ອກະຕຸກຊຸກຍູ້ໃຫ້ລັດຖະບານລາວ ເຫັນໄດ້ເຖິງຄວາມສຳຄັນໃນການປົກປ້ອງມໍລະດົກວັດທະນະທຳ ໃນສະຖານະການສຸກເສີນ ແລະ ເພື່ອປັບປຸງຄວາມພ້ອມໃນດ້ານດັ່ງກ່າວ.

ຊຸດອົບຮົມຄັ້ງນີ້, ຜູ້ເຂົ້າຮ່ວມໄດ້ຮຽນຮູ້ກ່ຽວກັບການຄຸ້ມຄອງໄພພິບັດ, ການສ້າງແຜນທີ່ ຄວາມສ່ຽງໄພພິບັດ ຢູ່ແຫລ່ງມໍລະດົກໂລກທົ່ງໄຫຫີນ, ອອກແບບມາດຕະການຫລຸດຜ່ອນ ແລະ ຫລັກການ ໃນການຕອບໂຕ້ສຸກເສີນໄພພິບັດສຳລັບ ແຫລ່ງມໍລະດົກໂລກທົ່ງໄຫຫີນ, ການຄຸ້ມຄອງ ແລະ ສະກັດກັ້ນອັກຄີໄພ ແລະ ບົດຮຽນການປະຖົມພະຍາບານຂັ້ນຕົ້ນ ໃນກໍລະນີເກີດເຫດສຸກເສີນ, ພ້ອມນີ້ຜູ້ເຂົ້າຮ່ວມກໍໄດ້ປະຕິບັດຕົວຈິງຢູ່ພາກສະໜາມ ໂດຍນຳໃຊ້ ບັນດາຫລຫກການ ທີ່ໄດ້ຮ່າງຂຶ້ນມານັ້ນ, ພ້ອມທັງຈັດຝຶກຢູ່ຂັ້ນບ້ານ ແລະ ສະຫລຸບ ບັນດາມາດຕະການຫລຸດຜ່ອນ ແລະ ບັນດາຫລັກການຕອບໂຕ້ສຸກເສີນ ແລະ ນຳເອົາເນື້ອໃນຈິດໃຈການຄຸ້ມຄອງຄວາມສ່ຽງໄພພິບັດ ເຂົ້າໃນທຸກລະບົບການຄຸ້ມຄອງ ແລະ ການຈັດຕັ້ງປະຕິບັດ ເພື່ອສົ່ງເສີມຄວາມຕື່ນຕົວໃນການສະໜອງ, ການບໍລິການສຸກເສີນ, ສ້າງຄວາມເຂົ້າ ໃຈຕໍ່ຄວາມສ່ຽງໄພພິບັດ, ພ້ອມທັງວາງແຜນຮັບຮອງເອົາການສ້າງຄວາມເຂັ້ມແຂງ ໃນການຄຸ້ມຄອງຄວາມສ່ຽງໄພພິບັດ ໃຫ້ເໝາະສົມກັບແຫລ່ງມໍລະດົກໄຫຫີນແຕ່ລະແຫ່ງ, ການຈັດຕັ້ງປະຕິບັດ ແລະ ການເຊື່ອມໂຍງເຂົ້າກັບວຽກງານມໍລະດົກຢູ່ຂັ້ນບ້ານ, ຂັ້ນເມືອງ, ຂັ້ນແຂວງ ແລະ ລະດັບຊາດ.