ລັດຖະມົນຕີຕ່າງປະເທດເປຣູລາອອກ ຫລັງລັກສັກວັກຊີນໂຄວິດກ່ອນປະຊາຊົນ
ນາງ ອາລິຊາເບດ ເອສເຕເຕ ລັດຖະມົນຕີກະຊວງການຕ່າງປະເທດເປຣູ ປະກາດລາອອກ ຫລັງຈາກນາງລັກສັກວັກຊີນໂຄວິດ-19 ກ່ອນປະຊາຊົນ ໂດຍໄດ້ ໂພສຂໍ້ຄວາມເຖິງການລາອອກຢ່າງເປັນທາງການຂອງຕົນເອງ ພ້ອມລະບຸໃນຖະແຫລງການອີກວ່າ: ນາງສັກວັກຊີນໂຄວິດເມື່ອວັນທີ 22 ມັງກອນຜ່ານມາ ແລະ ນາງເຫັນວ່າການກະທຳດັ່ງກ່າວ “ເປັນຄວາມຜິດທີ່ຮຸນແຮງ” ແລະ “ຕັດສິນໃຈຈະບໍ່ຮັບວັກຊີນໂຄວິດເຂັມທີ 2”.
ກ່ອນໜ້ານີ້, ລັດຖະມົນຕີສາທາລະນະສຸກເປຣູຫາກໍລາອອກຈາກຕຳແໜ່ງຢ່າງເປັນທາງການ ເນື່ອງຈາກກໍລະນີສໍ້ໂກງ ເຮັດໃຫ້ອະດີດປະທານາທິບໍດີເປຣູ ມາຣຕິນ ວິດກາຣາ ໄດ້ສັກວັກຊີນກ່ອນປະຊາຊົນ.
ສຳລັບເປຣູ ຫາກໍເລີ່ມສັກວັກຊີນໂຄວິດໃຫ້ບຸກຄະລາກອນທາງການແພດຂອງປະເທດເມື່ອວັນທີ 8 ກຸມພາຜ່ານມາ ຫລັງໄດ້ຮັບວັກຊີນຈາກບໍລິສັດຊິໂນຟາມຂອງຈີນ 300.000 ໂດສ ໂດຍຍັງບໍ່ມີກຳນົດວ່າຈະເລີ່ມສັກວັກຊີນໃຫ້ປະຊາຊົນເມື່ອໃດ.
