ອີຣັກກຽມປະກາດໄຊຊະນະເໜືອ IS
ທ່ານ ໄຮເດີ ອັດ ອາບາດີ ນາຍົກລັດຖະມົນຕີອີຣັກ ເດີນທາງເຖິງເມືອງໂມຊຸນ ເພື່ອຮ່ວມສະຫລອງໄຊຊະນະເໜືອກຸ່ມທີ່ເອີ້ນຕົນເອງວ່າ ລັດອິດສະລາມ (IS) ກັບກອງກຳລັງລັດຖະບານອີຣັກ ເຊິ່ງປັດຈຸບັນນີ້ໃກ້ຈະຊິງພື້ນທີ່ເມືອງໂມຊຸນເບື້ອງຕາເວັນຕົກກັບຄືນມາຈາກການຍຶດຄອງຂອງ IS ໄດ້ຢ່າງສົມບູນແລ້ວ.
“ພວກເຮົາໄດ້ຮັບໄຊຊະນະຢ່າງແນ່ນອນແລ້ວ, ກອງກຳລັງ IS ທີ່ເຫລືອຢູ່ກຳລັງຖືກປາບປາມ, ປັດຈຸບັນນີ້ພຽງແຕ່ລໍເວລາເພື່ອປະກາດໄຊຊະນະອັນຍິ່ງໃຫຍ່ຕໍ່ປະຊາຊົນຂອງພວກເຮົາເທົ່ານັ້ນ”. ທ່ານ ອາບາດີ ກ່າວ.
ສຳນັກນາຍົກລັດຖະມົນຕີອີຣັກ ຖະແຫລງວ່າ: ທ່ານ ອາບາດີ ກຳລັງກຽມຈະປະກາດໄຊຊະນະຢ່າງເປັນທາງການ, ແຕ່ຈະຍັງບໍ່ປະຕິບັດແບບນັ້ນຈົນກວ່າການສູ້ຮົບກັບ IS ຢູ່ເຂດຍຶດຄອງສຸດທ້າຍໃນເຂດເມືອງເກົ່າຈະສິ້ນສຸດກ່ອນ.
ກ່ອນໜ້ານີ້, ກອງກຳລັງ IS ປະມານ 30 ຄົນຖືກສັງຫານ, ໃນຂະນະທີ່ຖອຍໜີຈາກກອງກຳລັງລັດຖະບານອີຣັກທີ່ບຸກເຂົ້າໃນເຂດເມືອງໂມຊຸນເບື້ອງຕາເວັນຕົກ, ບາງສ່ວນເສຍຊີວິດເພາະໂດດລົງແມ່ນ້ຳໄທກຣິສ. ເຖິງຢ່າງໃດກໍຕາມ, ສຳນັກຂ່າວອາມັກຂອງ IS ຖະແຫລງວ່າ: ກອງກຳລັງ IS ທີ່ເຫລືອຢູ່ໃນເມືອງໂມຊຸນຈະສູ້ຮົບຈົນຕົວຕາຍ.
ທ່ານ ໂຈນາທານ ບິວ ນັກຂ່າວ BBC ລາຍງານວ່າ: ກອງກຳລັງອີຣັກໄດ້ເຂົ້າຊ່ວຍເຫລືອພົນລະເຮືອນຈຳນວນຫລາຍທີ່ໜີໄພການສູ້ຮົບອອກມາຈາກເຂດເມືອງຢ່າງບໍ່ຂາດສາຍ ໂດຍໄດ້ມອບອາຫານ ແລະ ນ້ຳ ລວມທັງປິ່ນປົວຜູ້ບາດເຈັບ, ສ່ວນເມືອງໂມຊຸນເບື້ອງຕາເວັນຕົກນັ້ນໄດ້ຮັບຄວາມເສຍຫາຍໜັກຈາກການສູ້ຮົບ ໂດຍກ່ອນໜ້ານີ້ກອງກຳລັງ IS ໄດ້ໃຊ້ວິທີລະເບີດຂ້າຕົວຕາຍຫລາຍຄັ້ງ ເພື່ອຕ້ານກອງກຳລັງຝ່າຍກົງກັນຂ້າມ.
ໃນເດືອນມັງກອນຜ່ານມາ, ລັດຖະບານອີຣັກປະກາດວ່າໄດ້ປົດປ່ອຍເມືອງໂມຊຸນເບື້ອງຕາເວັນອອກໃຫ້ເປັນອິດສະລະ, ພາຍຫລັງຖືກ IS ເຂົ້າຍຶດຄອງ ແລະ ປະກາດໃຫ້ເປັນເມືອງຫລວງຂອງຕົນໃນອີຣັກມາເປັນເວລາ 3 ປີ, ຈາກນັ້ນກອງກຳລັງອີຣັກໄດ້ດຳເນີນປະຕິບັດການຍາດເມືອງໂມຊຸນເບື້ອງຕາເວັນຕົກຕໍ່ມາເປັນເວລາອີກປະມານ 6 ເດືອນ ໂດຍການສູ້ຮົບເຮັດໃຫ້ປະຊາຊົນຕ້ອງພັດຖິ່ນບ່ອນຢູ່ອາໄສເຖິງ 900.000 ຄົນ ຄິດເປັນເຄິ່ງໜຶ່ງຂອງຈຳນວນປະຊາກອນໃນເມືອງໂມຊຸນທັງໝົດ.
ບັນດາຜູ້ນຳປະເທດຕ່າງໆ ລວມທັງຜູ້ນຳຝຣັ່ງ, ສະຫະລາຊະອານາຈັກ ແລະ ສະຫະພາບເອີຣົບ (EU) ຕ່າງສະແດງຄວາມຍິນດີກັບລັດຖະບານອີຣັກຕໍ່ໄຊຊະນະເໜືອ IS ໃນຄັ້ງນີ້. ເຖິງຢ່າງໃດກໍຕາມ, ນັກຂ່າວ BBC ລາຍງານວ່າ: ຍັງເຫລືອຖານທີ່ໝັ້ນຂອງ IS ອີກຫລາຍແຫ່ງຢູ່ອີຣັກ ທັງຢູ່ແຂວງອັນບາ ແລະ ເມືອງທັດ ອາຟາ. ນອກຈາກນີ້ ກອງກຳລັງ IS ຍັງມີປະສິດທິພາບໃນການໂຈມຕີດ້ວຍລະເບີດຂ້າຕົວຕາຍໃນພື້ນທີ່ຫລາຍແຫ່ງຂອງລັດຖະບານຳອີກ.
