ລັດຖະມົນຕີກະຊວງປ້ອງກັນປະເທດ ເນັ້ນໃຫ້ພະນັກງານ-ນັກຮົບ ແຂວງໄຊສົມບູນເອົາໃຈໃສ່ອົບຮົມແນວຄິດການເມືອງ

ໃນວັນທີ 11 ກຸມພານີ້, ທ່ານ ພົອ ຈັນສະໝອນ ຈັນຍາລາດ, ກໍາກະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ, ຄະນະປະຈໍາການ ຄະນະກຳມະການເລືອກຕັ້ງລະດັບຊາດ ພ້ອມດ້ວຍຄະນະ ລົງພົບປະໂອ້ລົມ ພະນັກງານທະຫານ-ຕໍາຫຼວດ ຢູ່ທີ່ສະໂມສອນກອງບັນຊາການທະຫານແຂວງໄຊສົມບູນ.

ໂອກາດນີ້, ທ່ານ ລັດຖະມົນຕີກະຊວງປ້ອງກັນປະເທດ ໄດ້ເນັ້ນໃຫ້ຄະນະພັກ-ຄະນະບັນຊາ ກອງບັນຊາການທະຫານແຂວງ, ກອງພັນໃຫຍ່ 101 ແລະ ກອງບັນຊາການປ້ອງກັນຄວາມສະຫງົບແຂວງ ຈົ່ງເອົາໃຈໃສ່ສຶກສາອົບຮົມການເມືອງແນວຄິດໃຫ້ຖັນແຖວສະມາຊິກພັກ, ພະນັກງານ-ນັກຮົບ ພາຍໃນກົມກອງຂອງຕົນ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຈົ່ງຮັກພັກດີຕໍ່ພັກ-ຕໍ່ການຈັດຕັ້ງ, ພ້ອມທັງຍົກສູງສະຕິລະວັງຕົວຕໍ່ກົມອຸບາຍຫັນປ່ຽນ, ເພີ່ມທະວີຄວາມສາມັກຄີເປັນປຶກແຜ່ນ ແລະ ມີຄວາມກຽມພ້ອມຕໍ່ໜ້າທີ່ການເມືອງທີ່ຂັ້ນເທິງມອບ-ໝາຍ ໂດຍຈັດຕັ້ງປະຕິບັດວຽກງານໄປຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ສ້າງພື້ນຖານອໍານວຍຄວາມສະດວກໃຫ້ແກ່ການພັດທະນາ ແຂວງໄຊສົມບູນ ດ້ວຍການຫັນເອົາພະນັກງານລົງກໍ່ສ້າງຮາກຖານເມືອງ, ພັດທະນາຊົນນະບົດຮອບດ້ານ.

ພ້ອມທັງປຸກດົມບັນດາສະມາຊິກພັກ, ພະນັກງານພາຍໃນກົມກອງຂອງຕົນ ໃຫ້ໄປໃຊ້ສິດປ່ອນບັດເລືອກຜູ້ແທນໄດ້ຄົບຕາມຈໍານວນ ທັງນີ້ເພື່ອຮັບປະກັນໃຫ້ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX  ແລະ ສະພາປະຊາຊົນ ແຂວງໄຊສົມບູນ ຊຸດ II ຢູ່ແຂວງໄຊສົມບູນໄດ້ດໍາເນີນໄປດ້ວຍຜົນສໍາເລັດຕາມລະດັບໝາຍ ແລະ ຮັບປະກັນຄວາມສະຫງົບປອດໄພຮ້ອຍສ່ວນຮ້ອຍ.