ສະຫະລັດຈະສູ້ຢັນກັບຈີນ ຢ່າງດຸເດືອດ ແຕ່ບໍ່ເຮັດຄື ທຣຳ

ລາຍງານຂ່າວຈາກຕ່າງປະເທດ ເມື່ອວັນທີ 9 ກຸມພານີ້ ໃຫ້ຮູ້ວ່າ: ປະທານາທິບໍດີ ໂຈໄບເດັນ ເວົ້າວ່າ ລັດຖະບານຂອງເຂົາພ້ອມທີ່ຈະ ສູ້ຢັນກັບຈີນ ຢ່າງດຸເດືອດ ແຕ່ວິທີການຈະບໍ່ເຮັດຄືຄົນທີ່ຜ່ານພົ້ນອອກຕຳແໜ່ງໄປແລ້ວ.

ທ່ານ ໄບເດັນກ່າວ ຕໍ່ວິດທະຍຸໂທລະພາບ ຊີບີເອັສ ເມື່ອວັນອາທີດທີ 7 ກຸມພາວ່າ: “ ຂ້າພະເຈົ້າຈະບໍ່ເຮັດຄື ທຣຳ. ພວກເຮົາຈະອີງໃສ່ຫຼັກການຂອງສາກົນ.

ພວກເຮົາບໍ່ຕ້ອງການການປະເຊີນໜ້າ ແຕ່ຈະຕ້ອງສູ້ຢັນຢ່າງດຸເດືອດ”. ໃນການໃຫ້ສຳພາດນັ້ນ, ທ່ານເວົ້າວ່າ ທ່ານຍັງບໍ່ທັນໄດ້ໂອ້ລົມກັບປະທານ ສີຈີນຜິງຂອງຈີນ ນັບຕັ້ງແຕ່ເຂົ້າຮັບຕຳແໜ່ງແຕ່ເດືອນທີ່ແລ້ວຈົນເຖິງປັດຈຸບັນ.

ທ່ານກ່າວຕໍ່ວ່າ: “ຂ້າພະເຈົ້າຮູ້ກັບເຂົາດີສົມຄວນ”, ໃນຖານະເປັນຮອງປະທານາທິບໍດີ ນັ້ນ, ຂ້າພະເຈົ້າໄດ້ມີເວລາເຮັດວຽກກັບທ່ານຫຼາຍກວ່າຜູ້ນຳໃດໃນໂລກ.

ໄບເດັນເຊື່ອວ່າ ການສູ້ຢັນກັນຍັງຈະມີຢູ່ຕໍ່ໄປ ແຕ່ບໍ່ແມ່ນການປະເຊີນໜ້າ ແລະ ພວກເຮົາຈະບໍ່ເຮັດຄືທີ່ ທຣຳ ເຮັດກັບຈີນຜ່ານມາ.