ລ້ຽງລູກແນວໃດໃຫ້ເປັນເດັກສະຫລາດ ແລະ ມີໄຫວພິບດີ

ເດັກທີ່ສະຫລຽວສະຫລາດ, ຄວາມຈື່ຈຳດີ ແລະ ມີໄຫວພິບທີ່ດີ ເປັນສິ່ງທີ່ພໍ່ແມ່ທຸກຄົນຕ້ອງການຢາກຈະໃຫ້ລູກຂອງຕົນເອງມີຄຸນສົມບັດເຫລົ່ານີ້ຄືກັນໝົດ ເຊິ່ງປັດໄຈຫລັກທີ່ເຮັດໃຫ້ເດັກສະຫລາດ ຫລື ບໍ່ສະຫລາດນັ້ນ ສິ່ງສຳຄັນກໍຄື ການສອນ ທັງການສອນໃນຫ້ອງຮຽນຈາກຄູ-ອາຈານ ແລະ ການສອນຢູ່ເຮືອນຈາກໂຕຂອງພໍ່ແມ່ເອງ ລອງມາເບິ່ງກັນວ່າມີວິທີການສອນແນວໃດແດ່.

1. ບໍ່ປິດກັ້ນເດັກ : ການບັງຄັບໃຫ້ເດັກເຮັດຫຍັງຕາມທີ່ພໍ່ແມ່ຕ້ອງການ ຈະເປັນການປິດກັ້ນຄວາມຄິດສ້າງສັນຂອງເດັກ, ການປ່ອຍໃຫ້ເດັກໄດ້ຄິດໄດ້ເຮັດໃນສິ່ງທີ່ຕົນເອງມັກ ຈະຊ່ວຍໃຫ້ເດັກມີພັດທະນາການໃນເລື່ອງນັ້ນໄວຍິ່ງຂຶ້ນ ເຊັ່ນ : ເດັກທີ່ມັກກ່ຽວກັບການປະດິດ ຫາກສົ່ງເສີມໃຫ້ເດັກໄດ້ເຮັດໃນສິ່ງທີ່ຕົນເອງມັກກໍຈະຍິ່ງເຮັດໃຫ້ພັດທະນາການໃນເລື່ອງນັ້ນຂອງເດັກດີຂຶ້ນ.
2. ຫລີກເວັ້ນສິ່ງທີ່ບໍ່ເກີດປະໂຫຍດ : ໃນຍຸຸກສະໄໝນີ້ກໍຄື ການເສບຕິດໂລກອອນລາຍ ແລະ ເກມໃນໂທລະສັບມືຖື ທີ່ເຮັດໃຫ້ເດັກມີພັດທະນາການດ້ານຕ່າງໆຊ້າລົງກ່ວາປົກກະຕິ ແລະ ບໍ່ສົນໃຈທີ່ຈະຮຽນຮູ້ສິ່ງໃໝ່ ພໍ່ແມ່ຈຶ່ງຕ້ອງຄວບຄຸມໃຫ້ດີ ບໍ່ໃຫ້ເດັກຫລິ້ນຫລາຍຈົນເກີນພໍດີ. ນອກຈາກນີ້, ການທີ່ເດັກຕິດໂລກອອນລາຍ ຫລື ເກມຫລາຍເກີນໄປ ຍັງສົ່ງຜົນກະທົບໃນເລື່ອງສຸຂະພາບຂອງເດັກໄດ້ນຳ ເຊັ່ນ : ເຮັດໃຫ້ສາຍຕາສັ້ນ, ເຮັດໃຫ້ເດັກເປັນຄົນທີ່ມີອາລົມຮຸນແຮງ, ດື້, ລ່ວງ, ບໍ່ຟັງຄວາມ ຈາກພຶດຕິກຳການຮຽນແບບນັ້ນເອງ.
3. ເຮັດກິດຈະກຳຕ່າງໆຮ່ວມກັນກັບລູກ : ການເຮັດກິດຈະກຳຮ່ວມກັບລູກ ຈະເຮັດໃຫ້ລູກຮູ້ສຶກອົບອຸ່ນ ລູກຈະຮູ້ສຶກວ່າສິ່ງທີ່ເຂົາເຮັດນັ້ນເປັນສິ່ງທີ່ດີ ແລະ ລູກກໍຈະພະຍາຍາມເຮັດໃຫ້ອອກມາຢ່າງສົມບູນແບບ ເຊັ່ນ : ການຊ່ວຍລູກຕໍ່ຊຸດເລໂກ້, ຊ່ວຍລູກອອກແບບສິ່ງປະດິດຕ່າງໆໃຫ້ອອກມາສົມບູນທີ່ສຸດ ແລະ ຍັງເປັນການສ້າງຄວາມສຳພັນທີ່ດີກັບລູກໄດ້ນຳ.
4. ຫາຂອງຫລິ້ນເສີມພັດທະນາການ : ຂອງຫລິ້ນເສີມພັດທະນາການຂອງເດັກ ນອກຈາກຈະເຮັດໃຫ້ເດັກໄດ້ຄວາມມ່ວນແລ້ວ ຍັງຊ່ວຍເສີມສ້າງພັດທະນາການຂອງເດັກໃຫ້ດີຂຶ້ນກ່ວາເກົ່ານຳອີກ. ດັ່ງນັ້ນ, ການຫາຂອງຫລິ້ນເສີມພັດທະນາການທີ່ເໝາະສົມກັບເດັກໃນແຕ່ລະໄວ ຈະຊ່ວຍໃຫ້ເດັກມີທັກສະໃນແຕ່ລະດ້ານດີຂຶ້ນກ່ວາເກົ່າ ພໍ່ແມ່ຈຶ່ງຕ້ອງສັງເກດວ່າລູກມັກຫຍັງ ແລະ ພະຍາຍາມຫາຂອງຫລິ້ນທີ່ເໝາະສົມກັບລູກ ແລະ ຫາໃຫ້ພົບວ່າລູກມັກຫລິ້ນຫຍັງ.
5. ອ່ານໜັງສືດີໆໃຫ້ລູກຟັງ : ການອ່ານໜັງສືໃຫ້ລູກໄດ້ຟັງ ເປັນອີກໜຶ່ງວິທີການຮຽນຮູ້ທີ່ສຳຄັນ ພໍ່ແມ່ອາດຈະອ່ານໜັງສືໃຫ້ລູກຟັງກ່ອນນອນ ຫລື ຫາໜັງສືດີໆເອົາໄວ້ໃຫ້ລູກອ່ານເອງກໍໄດ້ ເປັນການຝຶກໃຫ້ເດັກໄດ້ຮຽນຮູ້ດ້ວຍຕົນເອງນຳອີກ.

• ທັງໝົດນີ້ກໍເປັນສ່ວນສຳຄັນທີ່ຈະຊ່ວຍໃຫ້ເດັກມີພັດທະນາການຄວາມຄິດ ແລະ ສະຕິປັນຍາທີ່ດີຂຶ້ນກ່ວາເກົ່າ. ດັ່ງນັ້ນ, ພໍ່ແມ່ສາມາດເອົາໄປປັບໃຊ້ໃນການສອນໃຫ້ລູກເພີ່ມຕື່ມໄດ້ ຫາກເຮັດເປັນປະຈຳທຸກມື້ຈົນເກີດຄວາມລຶ້ງເຄີຍ ບໍ່ດົນກໍຈະເຫັນຄວາມແຕກຕ່າງໃນໂຕເດັກໃນທາງທີ່ດີຂຶ້ນ.