ໄບເດນ ຍອມຮັບ ການສັກວັກຊີນຕ້ານໂຄວິດ-19 ໃຫ້ຄວບຄຸມພົນລະເມືອງກຸ່ມສ່ຽງທັງໝົດທ້າທາຍຫລາຍ ຫລັງພົບບັນຫາວັກຊີນຂາດເຂີນ
ວັນທີ 8 ກຸມພາ 2021, ທ່ານ ໂຈ ໄບເດນ ປະທານາທິບໍດີອາເມລິກາ ກ່າວວ່າ: ການສັກວັກຊີນຕ້ານໂຄວິດ-19 ໃຫ້ຄວບຄຸມພົນລະເມືອງອາເມລິກາຈຳນວນຫລາຍນັ້ນຖືເປັນວຽກທີ່ຍາກ ແລະ ທ້າທາຍຫລາຍ ໜຶ່ງໃນບັນຫາສຳຄັນຄື ອາເມລິກາຍັງໄດ້ຮັບວັກຊີນຕ້ານໂຄວິດ-19 ບໍ່ພຽງພໍຕໍ່ຄວາມຕ້ອງການ ໂດຍມີທ່າອ່ຽງຈະຂາດເຂີນກ່ອນຈະສັກວັກຊີນໄດ້ຄວບຄຸມພົນລະເມືອງທັງໝົດ ແລະ ອາດຈະຍັງບໍ່ສຳເລັດກ່ອນລະດູຮ້ອນ (ປະມານເດືອນສິງຫາ).
ທັງບັນຫາການຂາດເຂີນວັກຊີນ, ການຂົນສົ່ງໂລຈິສຕິກທີ່ຊັກຊ້າຈາກຜູ້ຜະລິດ ແລະ ພັດທະນາວັກຊີນ ລວມທັງການແກ້ໄຂບັນຫາທີ່ຖືກກອງຖິ້ມໄວ້ຈາກລັດຖະບານຊຸດກ່ອນໜ້າ ເຮັດໃຫ້ເປົ້າໝາຍຂອງອາເມລິກາຂັບເຄື່ອນໄປໄດ້ຊ້າກວ່າທີ່ຄວນຈະເປັນ. ທາງການອາເມລິກາຈຶ່ງຈະຕ້ອງພະຍາຍາມຫາວັກຊີນເພີ່ມ ເພື່ອໃຫ້ພຽງພໍຕໍ່ຄວາມຕ້ອງການຂອງພົນລະເມືອງໃນປະເທດ ລວມທັງກະກຽມພື້ນທີ່ຂະໜາດໃຫຍ່ທີ່ຈະໃຊ້ເປັນພື້ນທີ່ສັກວັກຊີນໃຫ້ຄົນຈຳນວນຫລາຍ ເຊິ່ງຄາດວ່າອາດຈະໃຊ້ສະໜາມ National Football League ທີ່ທາງຄະນະກຳມະການລີກສະເໜີມາ.
ຈາກຂໍ້ມູນກ່ຽວກັບສະຖານະການການສັກວັກຊີນຕ້ານໂຄວິດ-19 ຂອງສູນຄວບຄຸມ ແລະ ປ້ອງກັນພະຍາດອາເມລິກາ (US CDC) ລະບຸວ່າ: ປັດຈຸບັນ ອາເມລິກາສັກວັກຊີນຕ້ານໂຄວິດ-19 ໄປແລ້ວ 41,2 ລ້ານກວ່າໂດສ, ມີພົນລະເມືອງອາເມລິກາໄດ້ຮັບວັກຊີນແລ້ວຢ່າງໜ້ອຍ 1 ໂດສ 31,5 ລ້ານຄົນ. ຂະນະທີ່ມີພົນລະເມືອງທີ່ໄດ້ຮັບວັກຊີນຄົບທັງສອງໂດສແລ້ວ 9,1 ລ້ານຄົນທົ່ວປະເທດ ຖືເປັນປະເທດທີ່ສັກວັກຊີນໃຫ້ພົນລະເມືອງຫລາຍທີ່ສຸດໃນປັດຈຸບັນ (ທາງປະລິມານ) ຮອງລົງມາແມ່ນຈີນ 31,2 ລ້ານໂດສ ແລະ ອັງກິດ 11,98 ລ້ານໂດສ, ສ່ວນອິດສະລາແອນຍັງເປັນປະເທດທີ່ມີອັດຕາປະຊາກອນເຂົ້າຮັບການສັກວັກຊີນຫລາຍທີ່ສຸດໃນປັດຈຸບັນ ເກືອບ 2 ໃນ 3 ຂອງປະຊາກອນທັງໝົດທົ່ວປະເທດປະມານ 9,3 ລ້ານຄົນ.
