ມຽນມາກັບມາເດີນໜ້າສັກວັກຊີນຕ້ານໂຄວິດ-19 ທົ່ວປະເທດ
ວັນທີ 5 ກຸມພາ 2021, ຖະແຫລງການຈາກກະຊວງສາທາລະນະສຸກ ແລະ ກິລາຂອງມຽນມາ ລະບຸວ່າ: ມຽນມາກັບມາດຳເນີນໂຄງການສັກວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ທົ່ວປະເທດໃນວັນນີ້.
ຖະແຫລງການເປີດເຜີຍວ່າ: ມຽນມາເລີ່ມສັກວັກຊີນໃຫ້ເຈົ້າໜ້າທີ່ທາງການແພດ ແລະ ອາສາສະໝັກແນວໜ້າປະມານ 103.142 ຄົນ ນັບແຕ່ວັນທີ 27 ມັງກອນຜ່ານມາ ພາຍໃຕ້ໂຄງການສັກວັກຊີນທົ່ວປະເທດໄລຍະທຳອິດ.
ຄົນທີ່ຈະໄດ້ຮັບວັກຊີນເປັນກຸ່ມທຳອິດໄດ້ແກ່ລັດຖະມົນຕີສະຫະພາບ, ຮອງລັດຖະມົນຕີ ແລະ ເຈົ້າໜ້າທີ່ລະດັບສະຫະພາບ, ເຈົ້າໜ້າທີ່ລັດຖະບານລະດັບສູງ, ຜູ້ອາຍຸສູງທີ່ມີອາຍຸຫລາຍກວ່າ 65 ປີ ເຊິ່ງອາໄສຢູ່ເມືອງທີ່ມີການບັງຄັບໃຊ້ຄຳສັ່ງໃຫ້ຄົນຢູ່ແຕ່ເຮືອນ, ອະດີດລັດຖະມົນຕີສະຫະພາບ, ອະດີດຮອງລັດຖະມົນຕີ ເປັນຕົ້ນ.
ກະຊວງສາທາລະນະສຸກ ແລະ ກິລາ ເປີດເຜີຍວ່າ: ມຽນມາໄດ້ຮັບວັກຊີນ Covishield ຊຸດທຳອິດ ຈຳນວນ 1,5 ລ້ານໂດສແລ້ວ. ຂະນະທີ່ວັກຊີນ Covishield ອີກ 30 ລ້ານໂດສ ຈະຖືກສົ່ງເຖິງມຽນມາອີກບໍ່ດົນ.
ທັງນີ້, ກະຊວງສາທາລະນະສຸກ ແລະ ກິລາກຳນົດແຜນສັກວັກຊີນໃຫ້ຊາວມຽນມາທີ່ມີອາຍຸ 18 ປີຂຶ້ນໄປ ປະມານ 38,35 ລ້ານຄົນ ພາຍໃນປີ 2021.
ຂໍ້ມູນຫລ້າສຸດຂອງກະຊວງສາທາລະນະສຸກ ແລະ ກິລາ ລະບຸວ່າ: ມຽນມາກວດພົບຜູ້ຕິດເຊື້ອໂຄວິດ-19 ສະສົມ 141.104 ຄົນ ແລະ ຜູ້ເສຍຊີວິດ 3.163 ຄົນ (ໄລ່ຮອດວັນທີ 4 ກຸມພາ 2021).
