ອີກ 5 ປີຕໍ່ຫນ້າແຂວງໄຊສົມບູນ ຈະແກ້ໄຂຄອບຄົວທຸກຍາກໃຫ້ເຫລືອບໍ່ເກີນ 2%

ຕາມການປະເມີນແລ້ວ, ປັດຈຸບັນ ຈຳນວນຄອບຄົວທຸກຍາກຢູ່ແຂວງໄຊສົມບູນຍັງເຫລືອປະມານ 1.800 ກວ່າຄອບຄົວ, ຊຶ່ງກວມອັດຕາສ່ວນບໍ່ຫນ້ອຍຖ້າທຽບໃສ່ມາດຕະຖານພົ້ນທຸກ ແລະ ມາດຕະຖານພັດທະນາ, ຂະນະທີ່ບ້ານທຸກຍາກຍັງເຫລືອຫລາຍກ່ວາ 10 ບ້ານໃນຈຳນວນ 89 ບ້ານທົ່ວແຂວງ.

ທ່ານ ຄໍາລຽງ ອຸທະໄກສອນ ເຈົ້າແຂວງໄຊສົມບູນ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວ ວ່າ: ເພື່ອແກ້ໄຂຄອບຄົວທຸກຍາກທີ່ຍັງເຫລືອໃຫ້ໄດ້ ແຂວງ ໄດ້ແຕ່ງຕັ້ງຄະນະສະເພາະກິດຂອງຕົນຂຶ້ນ ເພື່ອຊີ້ນຳ-ນຳພາ ການຈັດຕັ້ງປະຕິບັດຍຸດທະສາດດັ່ງກ່າວໃຫ້ມີຜົນຄື: ໄດ້ເລີ່ມລົງເກັບກຳຂໍ້ມູນຄືນໃໝ່ໃຫ້ລະອຽດຊັດເຈນກ່ຽວ ກັບສາເຫດທີ່ເຮັດໃຫ້ຄອບຄົວຍັງທຸກຍາກ, ພ້ອມໄດ້ກໍານົດເຂົ້າໃນມະຕິກອງປະຊຸມໃຫຍ່ອົງຄະນະພັກແຂວງຄັ້ງນີ້ ແລະ ໄດ້ວາງຄາດ ໝາຍໄວ້ວ່າ: ຮອດປີ 2025  ຈະສູ້ຊົນໃຫ້ຍັງເຫລືອບໍ່ເກີນ 185 ຄອບຄົວ ຫລື ປະມານ 1,97% ຂອງຈໍານວນຄອບ ຄົວທັງຫມົດ.

ເຈົ້າແຂວງໄຊສົມບູນ ໃຫ້ຮູ້ຕື່ມວ່າ: ສໍາລັບມາດຕະການ ຫລື ວິທີແກ້ ໄຂນັ້ນທາງຄະນະພັກ-ອົງການປົກຄອງແຂວງ ໄດ້ວາງໄວ້ລະອຽດແລ້ວ, ລວມເຖີງໄດ້ການກະກຽມທຶນຮອນ ແລະ ເນື້ອທີ່ດິນໃຫ້ແຕ່ລະຄອບຄົວທີ່ຍັງທຸກຍາກນໍາໃຊ້ເຂົ້າໃນການຜະລິດ ຫລື ປະ ກອບອາຊີບຕາມຄວາມສາມາດຕົວຈິງ ເພື່ອເຮັດໃຫ້ມີອາຊີບ ແລະ ມີລາຍຮັບຫມັ້ນຄົງ ເພື່ອກ້າວໄປເຖີງການຫລຸດພົ້ນອອກຈາກຄວາມທຸກຍາກແບບຍືນຍົງ ໝາຍຄວາມວ່າ:  ເມື່ອພົ້ນຈາກຄວາມທຸກຍາກໄປແລ້ວ ບໍ່ກັບຄືນມາທຸກຍາກອີກ.  ເຊັ່ນດຽວກັບບ້ານທຸກຍາກທີ່ຍັງເຫລືອ 10 ກວ່າບ້ານນັ້ນ ໄດ້ວາງແຜນການ ແລະ ມາດຕະການແກ້ໄຂໃນແຕ່ລະປີຢ່າງລະອຽດແລ້ວ. ແຕ່ເຖິງຢ່າງໃດກໍ່ຕາມຖ້າຢາກແກ້ໄຂບ້ານທຸກຍາກໃຫ້ໄດ້ ກ່ອນອື່ນໝົດຕ້ອງສຸມໃສ່ແກ້ໄຂຈຳນວນຄອບຄົວທຸກຍາກທີ່ຍັງເຫລືອໃຫ້ໄດ້ເສຍກ່ອນ ຈິ່ງຈະກ້າວໄປເຖີງການແກ້ໄຂບ້ານທຸກຍາກທີ່ຍັງເຫລືອໃຫ້ໝົດໄປໄດ້.