ສຶກສາອົບຮົມສາວຂາຍປະເວນີ ແລະ ເຈົ້າຂອງຮ້ານ ເຂດບ້ານຕານມີໄຊ ເມືອງໄຊທານີ ນວ

ວັນທີ 1 ກຸມພາ 2021 ນີ້ ພັທ ທອງພັນ ທີລະສັກ ຫົວໜ້າພະແນກຕໍາຫຼວດຕ້ານການຄ້າມະນຸດ ນວ ໃຫ້ຮູ້ວ່າ: ໃນອາທິດຜ່ານມາພາກສ່ວນກ່ຽວຂ້ອງໄດ້ສຶກສາອົບຮົມເຈົ້າຂອງຮ້ານອາຫານ ແລະຮ້ານກີນດື່ມທີ່ແອບແຝງການຄ້າຂາຍປະເວນີ ຈໍານວນ 3 ຮ້ານ ພ້ອມດ້ວຍສາວຂາຍປະເວນີ ຈໍານວນ 20 ຄົນ. ເຂດບ້ານຕານມີໄຊ ເມືອງໄຊທານີ ນວ ມາສຶກສາອົບຮົມ ແລະ ດໍາເນີນຄະດີຕາມລະບຽບກົດໝາຍອາຍາມາດຕາ 254 ວ່າດ້ວຍການຄ້າປະເວນີຂອງບຸກຄົນອື່ນ ແລະ ກົດໝາຍອາຍາມາດຕາ 260 ວ່າດ້ວຍການຂາຍປະເວນີ; ພ້ອມທັງໃຫ້ຢຸດເຊົາພຶດຕິກໍາດັ່ງກ່າວທັນທີ ຫັນມາປະກອບອາຊິບທີ່ສຸດຈະລິດ ເປັນຄົນດີຂອງສັງຄົມ.

ເບື້ອງຕົ້ນແມ່ນໄດ້ລົງກວດກາ ຮ້ານອາຫານ ແລະຮ້ານກີນດື່ມ ທີ່ແອບແຝງການຄ້າຂາຍປະເວນີ ດັ່ງກ່າວຈຶ່ງໄດ້ນໍາຕົວພວກຜູ້ກ່ຽວມາສອບສວນ ແລະ ພວກຜູ້ກ່ຽວໄດ້ຮັບສາລະພາບວ່າ: ໄດ້ເຊົ່າສະຖານທີ່ດັ່ງກ່າວເພື່ອເປີດຮ້ານກິນດື່ມ ແລ້ວຮັບເອົາຍິງສາວມາເສີບອາຫານ ແລະ ເຄື່ອງດື່ມແບບລັກສະນະບໍມີເງິນເດືອນ, ກິນຢູ່ພັກເຊົານໍາເຈົ້າຂອງຮ້ານ ໂດຍຈະໄດ້ຮັບຄ່າຕອບແທນເປັນເປີເຊັນຂາຍເບຍ ພ້ອມທັງ ອາໄສສະຖານທີ່ດັ່ງກ່າວເປັນບ່ອນພົວພັນ ຄ້າ-ຂາຍ ປະເວນີ;

ບຸກຄົນໃດຫາກຫາກິນດ້ວຍການຂາຍປະເວນີໃຫ້ຜູ້ອື່ນເສບສົມ ຈະຖືກລົງໂທດຕາມລະບຽບກົດໝາຍ ແລະ ຍັງໄດ້ຮຽກຮ້ອງໃຫ້ບັນດາຊາຍໜຸ່ມ, ຍິງສາວທີ່ມາຈາກຕ່າງແຂວງ, ນັບທັງໃນຕົວເມືອງ ທີ່ມີຈຸດປະສົງມາຊອກຫາວຽກເຮັດງານທໍາ ຢູ່ນະຄອນຫຼວງວຽງຈັນ ຈົ່ງມີສະຕິເຄົາລົບຕໍ່ລະບຽບກົດໝາຍ ແລະ ຮີດຄອງປະເພນີອັນດີງາມຂອງຊາດລາວ.