5 ປີຕໍ່ໜ້າ ກະຊວງ ຮສສ ກຳນົດ 6 ເປົ້າໝາຍພັດທະນາວຽກງານໃຫ້ມີປະສິດທິພາບ
ກະຊວງແຮງງານ ແລະ ສະຫວັດດີການສັງຄົມ (ຮສສ) ສຳເລັດກອງປະຊຸມແຮງງານ ແລະ ສະຫວັດດີການສັງຄົມ ປະຈໍາປີ 2020 ໃນວັນທີ 28 ມັງກອນ 2021, ເຊິ່ງກອງປະຊຸມໄດ້ພ້ອມກັນຄົ້ນຄວ້າ, ປຶກສາຫາລື, ປະກອບຄຳຄິດເຫັນຕ່າງໆ ຢ່າງກວ້າງຂວາງ ແລະ ເຫັນດີເປັນເອກະພາບ ຕໍ່ການປະເມີນຜົນການຈັດຕັ້ງປະຕິບັດແຜນພັດທະນາແຮງງານ ແລະ ສະຫວັດດີການສັງຄົມ 5 ປີ ຄັ້ງທີ IV ໄລຍະແຕ່ 2016-2020 ທີ່ຜ່ານມາ, ເຊິ່ງໄດ້ມີຜົນສໍາເລັດຫລາຍດ້ານ, ພ້ອມທັງ ໄດ້ກຳນົດທິດທາງໜ້າທີ່ລວມ 6 ເປົ້າໝາຍ ເພື່ອພັດທະນາແຮງງານ ແລະ ສະຫວັັດດີການສັງຄົມ 5 ປີ ຄັ້ງທີ V ໄລຍະປີ 2021-2025ຄື: ກໍາລັງແຮງງານໄດ້ຮັບການພັດທະນາສີມື, ມີຄວາມຫລາກຫລາຍສາຂາວິອາຊີບ, ມີຄວາມຊໍານານງານ, ມີລະ ບຽບວິໄນ, ມີວຽກເຮັດງານທໍາທີ່ໝັ້ນທ່ຽງ ແລະ ມີລາຍໄດ້ສູງຂຶ້ນ; ປະຊາຊົນທີ່ດ້ອຍໂອກາດ, ຜູ້ອອກແຮງງານພາກວິສາຫະກິດ, ຜູ້ປະກອບອາຊີບສ່ວນບຸກຄົນ ແລະ ຜູ້ມີຜົນງານໃນພາລະກິດປະຕິວັດຊາດປະ ຊາທິປະໄຕ ໄດ້ເຂົ້າເຖິງການບໍລິການປົກປ້ອງສັງຄົມ ທີ່ມີປະສິດທິພາບທີ່ດີຂຶ້ນ; ເພີ່ມທະວີການປ້ອງກັນ, ການຄວບຄຸມ ແລະ ການຟື້ນຟູຫລັງໄພພິບັດໃຫ້ມີປະສິດທິຜົນ; ເພີ່ມທະວີການຄຸ້ມຄອງ ແລະ ການຈັດ ຕັ້ງປະຕິບັດວຽກລະເບີດຕົກຄ້າງບໍ່ທັນແຕກ ໃຫ້ມີປະສິດທິຜົນ; ສ້າງຄວາມເຂັ້ມແຂງໃນການຄຸ້ມຄອງວຽກກາແດງລາວ ໃຫ້ສາມາດບໍລິການສັງຄົມ ຢ່າງກວ້າງຂວາງ; ປັບປຸງການຄຸ້ມຄອງບໍລິການວຽກແຮງງານ ແລະ ສະຫວັດດີການສັງຄົມ ຕາມທິດຄຸ້ມຄອງຂະແໜງການດ້ວຍກົດໝາຍ ແລະ ລະບຽບການ ໃຫ້ມີຄວາມສັກສິດ.
ການຈັດຕັ້ງປະຕິບັດແຜນພັດທະນາແຮງງານ ແລະ ສະຫວັດດີການສັງຄົມ 5 ປີ ທີ່ຜ່ານມາ ເຫັນວ່າມີຜົນສໍາເລັດຫລາຍດ້ານ ເປັນຕົ້ນໄດ້ສ້າງ ແລະ ປັບປຸງກົດໝາຍ 4 ສະບັບ; ສ້າງ ແລະ ປັບປຸງດໍາລັດ ແລະ ຄໍາສັ່ງ 11 ສະບັບ; ຂໍ້ຕົກລົງ, ຄໍາແນະນໍາ, ແຈ້ງການຂອງຂະແໜງການ ລວມ 22 ສະບັບ;ພ້ອມກັນນີ້, ຍັງມີຜົນສໍາເລັດຂອງຍຸດທະສາດການປົກປ້ອງສັງຄົມແຫ່ງຊາດ, ຍຸດທະສາດຄົນພິການ, ຍຸດທະສາດແຫ່ງຊາດ ເພື່ອການສົ່ງເສີມວຽກເຮັດງານທໍາຢູ່ຊົນນະບົດ ແລະ ຮ່າງຍຸດທະສາດແຫ່ງຊາດວ່າດ້ວຍການຫລຸດຜ່ອນຄວາມສ່ຽງໄພພິບັດ ພ້ອມທັງໄດ້ປະຕິບັດບັນດາຄາດໝາຍມະຫາພາກດ້ານແຮງງານ, ປະກັນສັງຄົມ ແລະ ລະເບີດບໍ່ທັນແຕກ ທີ່ສະພາແຫ່ງຊາດໄດ້ຮັບຮອງໃນແຕ່ລະປີ ລວມທັງຄາດໝາຍແຕ່ລະດ້ານໃນຂະແໜງການ, ການປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານ ແລະ ຜູ້ໃຊ້ແຮງງານ, ການຂະຫຍາຍອັດຕາປົກຄຸມປະກັນສັງຄົມ ແລະ ການບໍລິການອຸດໜູນປະກັນສັງຄົມ, ການປະຕິບັດນະໂຍບາຍສະແດງຄວາມກະຕັນຍູຕໍ່ຜູ້ມີຜົນງານ, ການຊ່ວຍເຫລືອໃຫ້ກຸ່ມຄົນດ້ອຍໂອກາດ, ຜູ້ທຸກຍາກ ແລະ ຜູ້ປະສົບໄພພິບັດຕ່າງໆ, ການແກ້ໄຂລະເບີດບໍ່ທັນແຕກທີ່ຕົກຄ້າງ ແລະ ການສະໜອງເລືອດທີ່ປອດໄພໃຫ້ແກ້ສັງຄົມ ແລະ ອື່ນໆ.
