ສຳເລັດກອງປະຊຸມສາທາລະນະສຸກທົ່ວປະເທດ ພ້ອມສຸມໃສ່ ພັດທະນາວຽກງານໃຫ້ບັນລຸຜົນ
ວັນທີ 29 ມັງກອນນີ້, ກອງປະຊຸມວຽກງານສາທາລະນະສຸກທົ່ວປະເທດຄັ້ງທີ VIII ຍົກສູງຄຸນນະພາບການບໍລິການສຸຂະພາບ ໄດ້ອັດລົງດ້ວຍຜົນສຳເລັດອັນຈົບງາມ ຢູ່ການຮ່ວມມືສາກົນ ແລະ ເຝີກອົບຮົມ (ICTI) ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ນາຍົກລັດຖະມົນຕີ ທອງລຸນ ສີສຸລິດ.
ໃນພິທີປິດກອງປະຊຸມດັ່ງກ່າວ, ທ່ານ ລັດຖະມົນຕີກະຊວງສາທາລະນະສຸກ ໄດ້ກ່າວວ່າ: ຜ່ານການດຳເນີນກອງປະຊຸມເປັນເວລາ 2 ມື້, ເຊິ່ງກອງປະຊຸມໄດ້ຄົ້ນຄວ້າ ແລະ ປະກອບຄວາມຄິດ ຄວາມເຫັນ ຢ່າງກົງໄປກົງມາ ເພື່ອຊອກໃຫ້ເຫັນໄດ້ ດ້ານດີ, ຂໍ້ຄົງຄ້າງ, ສິ່ງທ້າທາຍ ແລະ ສາຍເຫດ ຕໍ່ການຈັດຕັ້ງປະຕິບັດວຽກງານໃນໄລຍະ 5 ປີ. ພ້ອມທັງໄດ້ເປັນເອກະພາບໃນການຜັນຂະຫຍາຍມະຕິກອງປະຊຸມໃຫ່ຍຄັ້ງທີ IX ຂອງອົງຄະນະພັກກະຊວງສາທາລະນະສຸກ, ມະຕິ 03/ກມສພ ຂອງກົມການເມືອງ ວ່າດ້ວຍວຽກງານສາມສ້າງ ແລະ ມະຕິຂອງສະພາແຫ່ງຊາດ ສະບັບເລກທີ 103/ສພຊ ວ່າດ້ວຍການຮັບຮອງເອົາການຊີ້ແຈງຂອງລັດຖະບານ ກ່ຽວກັບການປັບປຸງຄຸນນະພາບການບໍລິການ ການປິ່ນປົວຢູ່ໂຮງໝໍ, ສຸກສາລາ ແລະ ມະຕິຂອງສະພາແຫ່ງຊາດ ສະບັບເລກທີ 099/ ສພຊ ວ່າດ້ວຍການຮັບຮອງເອົາ 11 ຕົວຊີວັດ ທີ່ມອບໃຫ້ກະຊວງສາທາລະນະສຸກ ເຂົ້າໃນແຜນພັດທະນາສາທາລະນະສຸກ 5 ປີ ຄັ້ງທີ IX (2021-2025) ແລະ ປະຈໍາປີ 2021 ໃຫ້ເປັນຮູບປະທຳ; ເອກະພາບຮັບຮອງເອົາ ບົດສະຫລຸບການຈັດຕັ້ງປະຕິບັດຍຸດທະສາດປະຕິຮູບສາທາລະນະສຸກ ໄລຍະທີ II (2016-2020) ແລະ ແຜນຍຸດທະສາດປະຕິຮູບສາທາລະນະສຸກ ໄລຍະທີ III (2021-2025); ຮັບຮອງເອົາ ບົດສະຫລຸບການຈັດຕັ້ງປະຕິບັດວຽກງານສາທາລະນະສຸກ 5 ປີ ຄັ້ງທີ VIII (2016-2020) ແລະ ວຽກງານປະຈໍາປີ 2020; ຮັບຮອງເອົາ ແຜນພັດທະນາສາທາລະນະສຸກ 5 ປີ ຄັ້ງທີ IX (2021-2025) ແລະ ແຜນປະຈໍາປີ 2021.
ໂດຍສະເພາະ, ການປະຕິບັດຕົວຊີ້ບອກຂອງຂະແໜງສາທາລະນະສຸກການຈັດຕັ້ງປະຕິບັດເພື່ອຕອບໂຕ້ການລະບາດຂອງພະຍາດໄຂ້ຍຸງລາຍ ແລະ ພະຍາດ Covid-19 ການຈັດຕັ້ງປະຕິບັດວຽກງານ 5 ດີ 1 ພໍໃຈ, ປະຕິບັດວຽກງານພັດທະນາຊັບພະຍາກອນມະນຸດ, ປະຕິບັດວຽກງານປະກັນສຸຂະພາບ, ປະຕິບັດວຽກງານແຜນການໃນການຈັດສັນງົບປະມານໃຫ້ແຂວງ, ເມືອງ ແລະ ໂຮງໝໍນ້ອຍ, ປະຕິບັດ ແລະ ລາຍງານຂໍ້ມູນຂ່າວສານຜ່ານລະບົບ DHIS 2 ແລະ ປະຕິບັດເພື່ອຕອບໂຕ້ໄພພິບັດ ແລະ ໃຫ້ການຊ່ວຍເຫລືອຜູ້ທີ່ປະສົບເຄາະຮ້າຍ.
