ກຽມຈິດໃຈໄປປ່ອນບັດເລືອກຕັ້ງເອົາຜູ້ແທນປະຊາຊົນ
ໂດຍ: ທິດກໍ່າ
ຍັງບໍ່ພໍເທົ່າໃດວັນ ການປ່ອນບັດເລືອກຕັ້ງເອົາຜູ້ແທນສະພາແຫ່ງຊາດ ຊຸດທີ IX ແລະ ຜູ້ແທນສະພາຂັ້ນແຂວງ ແລະ ນະຄອນຫລວງວຽງຈັນ ຊຸດທີ II ກໍຈະໄດ້ມີຂຶ້ນຕາມວາລະທີ່ກຳນົດໄວ້. ການປ່ອນບັດເລືອກຕັ້ງຄັ້ງນີ້ຈະໄດ້ຈັດຂຶ້ນໃນວັນທີ 21 ກຸມພາ 2021 ເຊິ່ງກົງກັບວັນອາທິດພໍດີ. ຕໍ່ຈາກນັ້ນ, ວັນທີ 22 ມີນາ ກໍຈະມີກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX. ໃນໂອກາດກອງປະຊຸມຄັ້ງນີ້ ຈະໄດ້ພິຈາລະນາຮັບຮອງເອົາບັນຫາຂອງຊາດຫລາຍດ້ານ ເປັນຕົ້ນຮັບຮອງເອົາກົງຈັກ ແລະ ບຸກຄະລາກອນຄະນະສະພາແຫ່ງຊາດ, ແຕ່ງຕັ້ງຮັບຮອງເອົາປະທານປະເທດ, ນາຍົກລັດຖະມົນຕີ, ປະທານໄອຍະການສູງສຸດ, ປະທານສານສູງສຸດ, ອົງການກວດສອບແຫ່ງລັດ ແລະ ຮັບຮອງເອົາບາງມະຕິ ແລະ ກົດໝາຍຈຳນວນໜຶ່ງ. ການປ່ອນບັດເລືອກຕັ້ງເອົາຜູ້ແທນສະພາແຫ່ງ ຊຸດທີ IX ຖືເປັນເຫດການດ້ານປະຫວັດສາດ ແລະ ເຫດການດ້ານການເມືອງປະຈຳປີ 2021 ເຊິ່ງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກຫາກໍສຳເລັດເສັດສິ້ນລົງໃນວັນທີ 15 ມັງກອນ 2021 ທີ່ຜ່ານມານີ້ເອງ.
ກໍດັ່ງພວກເຮົາໄດ້ຮັບຮູ້ມານຳກັນແລ້ວວ່າ, ສະພາແຫ່ງຊາດແມ່ນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ເປັນອົງການສູງສຸດແຫ່ງອຳນາດລັດ, ເປັນອົງການນິຕິບັນຍັດ, ປະຕິບັດພາລະບົດບາດຮັບຮອງເອົາລັດຖະທຳມະນູນ ແລະ ກົດໝາຍ, ຕົກລົງບັນຫາພື້ນຖານຂອງປະເທດຊາດ ແລະ ຕິດຕາມກວດກາການເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍຂອງບັນດາອົງການລັດ. ຕົວຢ່າງພິຈາລະນາຮັບຮອງເອົາລັດຖະທຳມະນູນ ແລະ ກົດໝາຍ, ເລືອກຕັ້ງເອົາຕຳແໜງຂັ້ນສູງສຸດຂອງອົງການອຳນາດລັດເຊັ່ນ: ປະທານສະພາແຫ່ງຊາດ, ຮອງປະທານສະພາແຫ່ງຊາດ, ກຳມະການຄະນະປະຈຳສະພາແຫ່ງຊາດ, ປະທານປະເທດ, ຮອງປະທານປະເທດ, ນາຍົກລັດຖະມົນຕີ, ຫົວໜ້າໄອຍະການປະຊາຊົນສູງສຸດ, ປະທານສານປະຊາຊົນສູງສຸດ ແລະ ປະທານອົງການກວດສອບແຫ່ງລັດ. ນອກຈາກນັ້ນ ຍັງພິຈາລະນາຮັບຮອງເອົາການແຕ່ງຕັ້ງ, ຍົກຍ້າຍ ຫລື ປົດຕຳແໜ່ງຂັ້ນສູງສຸດຂອງອົງການອຳນາດລັດເຊັ່ນ: ປະທານ, ຮອງປະທານ, ກຳມາທິການສະພາແຫ່ງຊາດ, ຮອງນາຍົກລັດຖະມົນຕີ ແລະ ສະມາຊິກລັດຖະບານ, ສະມາຊິກສະພາ, ຜູ້ພິພາກສາຂອງສານປະຊາຊົນສູງສຸດ. ອັນສຳຄັນທີ່ສຸດ ກໍແມ່ນຮັບຮອງເອົາແຜນຍຸດທະສາດ, ແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນດັດແກ້ງົບປະມານແຫ່ງລັດ ນັບທັງໂຄງປະກອບກົງຈັກຂອງລັດຖະບານ, ການແຕ່ງຕັ້ງຍຸບເລີກ, ໂຮມເຂົ້າ, ແຍກອອກບັນດາກະຊວງ, ອົງການລັດທຽບເທົ່າ, ນະຄອນຫລວງຕາມການສະເໜີຂອງນາຍົກລັດຖະມົນຕີ ແລະ ບັນຫາອື່ນໆກ່ຽວກັບໜ້າທີ່ອັນສຳຄັນຂອງຊາດ.
ເພາະສະນັ້ນ, ຈຶ່ງຖືວ່າການປ່ອນບັດເພື່ອຄັດເລືອກເອົາຜູ້ແທນສະພາທີ່ຈະເປັນຜູ້ຕາງໜ້າປະຊາຊົນເຂົ້າໄປມີບົດບາດໜ້າທີ່ຕໍ່ສະພາ ກໍຄືເປັນຜູ້ຕາງໜ້າປະຊາຊົນເຮັດໜ້າທີ່ເພື່ອປະຊາຊົນນັ້ນຕ້ອງໄດ້ສັນຫາເອົາຜູ້ທີ່ດີ, ມີຄວາມຮູ້ຄວາມສາມາດ, ມີຄຸນສົມບັດ ແລະ ມີເງື່ອນໄຂພຽບພ້ອມ ສົມກັບວ່າເປັນຜູ້ແທນສະພາປະຊາຊົນສະໄໝທີ I ຊຸດທີ IX. ສ່ວນຜູ້ສະໝັກເປັນຜູ້ແທນສະພາແຫ່ງຊາດ ຊຸດທີ IX ຄັ້ງນີ້ມີຈຳນວນທັງໝົດ 224 ທ່ານ ຄັດເລືອກເອົາພຽງ 164 ທ່ານ. ຜູ້ສະໝັກເລືອກຕັ້ງສະພາຂັ້ນແຂວງຊຸດທີ II ມີຈຳນວນທັງໝົດ 789 ທ່ານ ຄັດເລືອກເອົາພຽງ 492 ທ່ານ. ຂໍຮຽກຮ້ອງເຊີນຊວນປວງຊົນລາວທັງຊາດ ໂດຍສະເພາະຜູ້ມີສິດປ່ອນບັດເລືອກຕັ້ງຈົ່ງໄດ້ໄປໃຊ້ສິດຂອງຕົນເພື່ອເລືອກຕັ້ງເອົາຜູ້ແທນສະພາແຫ່ງຊາດຊຸດທີ IX ແລະ ສະພາຂັ້ນແຂວງຊຸດທີ II ໃນວັນອາທິດ ກົງກັບວັນທີ 21 ກຸມພາ 2021 ທີ່ຈະມາເຖິງນີ້ໃຫ້ເປັນຂະບວນຟົດຟື້ນ ແລະ ໄດ້ຮັບຜົນສຳເລັດທຸກປະການ.
ເຖິງຢ່າງໃດກໍດີ, ພວກເຮົາຫວັງຢ່າງຍິ່ງວ່າ ຜູ້ແທນສະພາແຫ່ງຊາດ ຊຸດທີ IX ແລະ ຜູ້ແທນສະພາປະຊາຊົນຂັ້ນແຂວງ ຊຸດທີ II ຈະເຮັດວຽກຢ່າງເຕັມທີ່ ເພື່ອສຳເລັດພາລະກຳປະຫວັດສາດທີ່ຊາດ ແລະ ຊາຊົນໄດ້ມອບໝາຍໃຫ້. ສິ່ງທີ່ປະຊາຊົນຢາກໃຫ້ຜູ້ແທນສະພາແກ້ໄຂກໍແມ່ນບັນຫາຊີວິດການເປັນຢູ່, ຄວາມທຸກຍາກຂອງປະຊາຊົນ ນັບທັງການປາບປາມບັນຫາການສໍ້ລາດບັງຫລວງຂອງພະນັກງານລັດ, ບັນຫາຢາເສບຕິດ ແລະ ປາກົດການຫຍໍ້ທໍ້ອື່ນໆທີ່ຈະເປັນຕົ້ນເຫດກະທົບກະເທືອນເຖິງຄວາມສະຫງົບສຸກຂອງບ້ານເມືອງ ແລະ ກະທົບເຖິງຊີວິດການເປັນຢູ່ຂອງປະຊາຊົນ.
