ຣັດເຊຍມອບພາຫະນະເຕັກນິກຊ່າງແສງ ແລະຊຸດອຸປະກອນ ໃຫ້ແກ່ກະຊວງປ້ອງກັນປະເທດ

ວັນທີ 28 ມັງກອນ 2021 ທ່ານ ວະລາດີມີຣ ກາລີນິນ, ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສ.ຣັດເຊຍ ປະຈຳ ສປປ ລາວ ໄດ້ຕາງໜ້າເຂົ້າຮ່ວມພີທີມອບ-ຮັບ ພາຫະນະເຕັກນິກຊ່າງແສງ ແລະ ຊຸດອຸປະກອນເກັບຮັກສາພາຫະນະເຕັກນິກໄລຍະຍາວ ທີ່ກະຊວງປ້ອງກັນປະເທດແຫ່ງ ສ.ຣັດເຊຍ ໄດ້ໃຫ້ການຊ່ວຍເຫຼືອກະຊວງປ້ອງກັນປະເທດ ແຫ່ງ ສປປລາວ ໂດຍມີທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີ ກະຊວງປ້ອງກັນປະເທດເປັນຝ່າຍຮັບ.

ພາຫະນະ ແລະ ອຸປະກອບທີ່ມອບໃນຄັ້ງນີ້ປະກອບມີ:  ລົດຂຸດຂຸມຄອງຈໍານວນ 2 ຄັນ, ລົດສ້ອມແປງ (ບໍາລຸງຮັກ ສາ) ຈໍານວນ 2 ຄັນ, ລົດຕູ້ສ້ອມ ແປງ (ເຄື່ອນທີ່) ຈໍານວນ 2 ຄັນ, ລົດຈົກຕີນຢາງ ຈໍານວນ 1 ຄັນ, ເຮືອກາໂນ ຈໍານວນ 10 ລຳ, ລົດ ກວດມິນ ຈໍານວນ 2 ຄັນ, ຈັກໄຟ ຟ້າ ເຄື່ອນທີ່ 2 ເຄື່ອງ ແລະ ລົດ ຂຸດຂຸມຄອງ(M3-2) ຈໍານວນ 2 ຄັນ.

ທ່ານ ວະລາດີມີຣ ກາລີນິນໄດ້ກ່າວວ່າ:

ພວກເຮົາເຊື່ອໝັ້ນວ່າ ການມອບ-ຮັບ ພາຫະນະເຕັກນິກຊ່າງແສງຄັ້ງນີ້ ຈະເປັນການປະກອບສ່ວນອັນສຳຄັນ ເຮັດໃຫ້ຄວາມອາດສາມາດດ້ານປ້ອງກັນຊາດຂອງກອງທັບປະຊາຊົນລາວເຂັ້ມແຂງຂຶ້ນຊ່ວຍເຮັດ ໃຫ້ການປະຕິບັດໜ້າທີ່ປະສົບຜົນສາເລັດ, ລວມທັງແມ່ນການລາດຕະເວນຊາຍແດນ, ສະກັດກັ້ນການເຄື່ອນໄຫວຜິດກົດໝາຍປະເພດຕ່າງໆ, ລວມທັງການຄ້າຂາຍຢາເສບຕິດທີ່ຜິດກົດໝາຍ. ພາຫະນະເຕັກນິກຊ່າງແສງອທີ່ຖືກໂອນຍ້າຍຍັງຈະຊ່ວຍໃຫ້ຮັບມືກັບວຽກງານດ້ານມະນຸດສະທຳ ແລະ ສັນຕິພາບທີ່ສະຫງົບສຸກ. ໂດຍສະເພາະ, ເຕັກນິກນີ້ສາມາດຖືກນຳໃຊ້ເພື່ອການເກັບກູ້ລະເບີດ, ການຮັບມືຜົນສະທ້ອນຂອງໄພພິບັດທາງທຳມະຊາດ ແລະ ການສະໜອງຄວາມຊ່ວຍເຫລືອດ້ານມະນຸດສະທຳໃຫ້ແກ່ປະຊາຊົນໃນເຂດປະສົບໄພ.