ເລັ່ງຈັບຕົວຄົນບໍ່ດີໃຊ້ໃບບິນເກັບເງິນຄ່າຂີ້ເຫຍື້ອປອມແປງເອົາ ເງິນນຳປະຊາຊົນ

ນັບວ່າເປັນເລື່ອງໄກ້ຕົວທີ່ສຸດ, ສຳລັບກໍລະນີມີຄົນບໍ່ດີໄດ້ປອມແປງໃບບິນ ເກັບເງິນຄ່າຂີ້ເຫຍື້ອນຳປະຊາຊົນໃນນະຄອນຫລວງວຽງຈັນ, ໂດຍສະເພາະຢູ່ເຂດເມືອງສີສັດຕະນາກ, ຊຶ່ງມີຜູ້ເສຍຫາຍແລ້ວຫລາຍລາຍ.

ຕໍ່ກໍລະນີດັ່ງກ່າວ ນັກຂ່າວພວກເຮົາໄດ້ສອບຖາມທ່ານ ແສງພະຈັນ ສິມມາລາວົງ ອຳນວຍການບໍລິສັດຮັບເໝົາເກັບມ້ຽນຂີ້ເຫຍື້ອ ໃນເຂດພື້ນທີ່ດັ່ງກ່າວ, ເຊິ່ງໃຫ້ຮູ້ວ່າ: ໄດ້ມີປະກົດການບໍ່ດີດັ່ງກ່າວເກີດຂຶ້ນໜັກ, ໂດຍມີຄົນບໍ່ດີຈຳນວນໜຶ່ງ ໄດ້ນຳໃຊ້ບິນເກັບເງິນປອມແປງທີ່ຄ້າຍຄືໃບບິນຂອງບໍລິສັດຕົນ ໄປເກັບເງິນນຳລູກຄ້າ, ຊຶ່ງມີຜູ້ຕົກເປັນເຫຍື່ອແລ້ວ 4 ລາຍ ແລະ ຈາກການຕິດຕາມພາບໃນກ້ອງວົງຈອນປິດ ສາມາດຮູ້ໄດ້ວ່າ: ຄົນຮ້າຍທີ່ກໍ່ເຫດແມ່ນເປັນຄົນດຽວກັນ, ຊຶ່ງເປັນເພດຊາຍ, ຈ່ອຍສູງ, ແຕ່ງຕົວສຸພາບຮຽບຮ້ອຍ. ປັດຈຸບັນ ໄດ້ແຈ້ງໃຫ້ເຈົ້າໜ້າທີ່ຕິດຕາມຄົນຮ້າຍນີ້ມາດຳເນີນຄະດີໂດຍໄວ. ພ້ອມທັງຝາກເຕືອນສັງຄົມ ກໍຄືລູກຄ້າໃຫ້ມີສະຕິລະວັງຕົວ, ຄວນສັງເກດໃບບິນເກັບເງິນດີໆກ່ອນຈະຈ່າຍເງິນ, ຊຶ່ງໃບບິນຂອງແທ້ຈະມີກາຈໍ້າສີແດງ, ລາຍເຊັນເຈົ້າຂອງບໍລິສັດ, ຊື່ເຈົ້າຂອງເຮືອນທີ່ຖືກຕ້ອງ, ລາຄາທີ່ໄດ້ຕົກລົງ, ວັນທີເດືອນປີຕາມສັນຍາເກັບເງິນໃນແຕ່ລະງວດ ແລະ ສິ່ງສຳຄັນພະນັກງານເກັບເງິນທຸກຄົນຕ້ອງຖືບັດພະນັກງານຂອງບໍລິສັດທຸກຄັ້ງ ແລະ ຖ້າພົບເຫັນຄົນຮ້າຍດັ່ງກ່າວແມ່ນສາມາດແຈ້ງໄປຫາບໍລິສັດໂດຍທັນທີໝາຍເລກ 020 22436666 ແລະ 020 22426660.