ຊາວບຣາຊິລອອກມາຮຽກຮ້ອງໃຫ້ຖອດຖອນຜູ້ນຳ ເຫດຮັບມືໂຄວິດ-19 ລົ້ມເຫລວ
ວັນທີ 24 ມັງກອນ 2021, ສຳນັກຂ່າວ AP ລາຍງານວ່າ: ຊາວບຣາຊິລຫລາຍພັນຄົນຕັດສິນໃຈອອກມາປະທ້ວງເປັນມື້ທີ 2 ເພື່ອຮຽກຮ້ອງໃຫ້ມີຂະບວນການຖອດຖອນປະທານາທິບໍດີ ຊາອີ ໂບລໂຊນາໂຣ ອອກຈາກຕຳແໜ່ງ ຈາກຄວາມບໍ່ພໍໃຈທີ່ຜູ້ນຳບຣາຊິລບໍ່ໃສ່ໃຈຈະແກ້ໄຂບັນຫາການລະບາດຂອງພະຍາດໂຄວິດ-19 ທີ່ຂ້າຊີວິດຊາວບຣາຊິລໄປແລ້ວ 216.000 ກວ່າຄົນ.
ປະຊາຊົນໃນເມືອງໃຫຍ່ ຄືຣິໂອ ເດິຈາເນໂຣ, ເຊົາເປົາໂລ ແລະ ເມືອງອື່ນໆ 10 ກວ່າເມືອງ ໃຊ້ວິທີຂັບລົດໄປຕາມຖະໜົນ ພ້ອມກັບຍົກທຸງ ແລະ ບີບແກ ລວມທັງຮ້ອງວ່າ: ໂບລໂຊນາໂຣ ອອກໄປ.
ໂດຍການຊຸມນຸມເລີ່ມຕົ້ນຂຶ້ນໃນວັນທີ 23 ມັງກອນ ເປັນການລວມຕົວຂອງຝ່າຍຊ້ານເສລີນິຍົມທີ່ບໍ່ພໍໃຈປະທານາທິບໍດີ ໂບລໂຊນາໂຣ, ສ່ວນວັນທີ 24 ມັງກອນ ເປັນການນັດລວມກັນຂອງຝ່າຍຂວາອະນຸລັກນິຍົມ ທີ່ຫລາຍຄົນເຄີຍລົງຄະແນນໃຫ້ທ່ານ ໂບລໂຊນາໂຣ ໃນການເລືອກຕັ້ງປີ 2018.
ປັດຈຸບັນທ່ານ ໂບລໂຊນາໂຣ ບໍລິຫານປະເທດມາໄດ້ເຄິ່ງທາງຂອງໄລຍະເວລາໃນການດຳລົງຕຳແໜ່ງ 4 ປີ ແລະ ມີເລື່ອງໃຫ້ຝ່າຍກົງກັນຂ້າມໂຈມຕີຢ່າງຕໍ່ເນື່ອງ ນັບແຕ່ການຮັບມືເຫດການໄຟໄໝ້ປ່າຄັ້ງໃຫຍ່ຢູ່ບໍລິເວນປ່າອາເມຊອນ ທີ່ທ່ານປະຕິເສດວ່າ: ບໍ່ກ່ຽວຂ້ອງກັບການທີ່ທ່ານອະນຸຍາດໃຫ້ຕັດໄມ້ທຳລາຍປ່າ ລວມທັງບໍ່ຍອມຮັບການຊ່ວຍເຫລືອຈາກຕ່າງປະເທດ ເນື່ອງຈາກຢ້ານຖືກແຊກແຊງ ຈົນເປັນເຫດໃຫ້ເນື້ອທີ່ປ່າຖືກທຳລາຍເປັນຈຳນວນຫລາຍ.
ຈົນມາເຖິງວິກິດຄັ້ງຫລ້າສຸດ ຄືໂຄວິດ-19 ທີ່ທ່ານ ໂບລໂຊນາໂຣ ບໍ່ຍອມຮັບວ່າພະຍາດນີ້ເປັນພະຍາດລະບາດຮ້າຍແຮງ ແລະ ບໍ່ຍອມໃສ່ຜ້າປິດປາກ-ດັງຢູ່ບ່ອນສາທາລະນະ ຈົນສຸດທ້າຍໄດ້ຮັບການຢືນຢັນວ່າມີຜົນການກວດເຊື້ອເປັນບວກ.
ແລະ ໃນປັດຈຸບັນທີ່ບຣາຊິລກຳລັງຈັດຫາວັກຊີນປ້ອງກັນພະຍາດໂຄວິດ-19 ໃຫ້ປະຊາຊົນ, ຜູ້ນຳບຣາຊິລຍັງປະຕິເສດວ່າ: ວັກຊີນເປັນສິ່ງທີ່ບໍ່ຈຳເປັນ ດ້ວຍການປະກາດວ່າ: ທ່ານຈະບໍ່ສັກວັກຊີນ ພ້ອມທັງກ່າວວ່າ: ການຮັບວັກຊີນເຂົ້າສູ່ຮ່າງກາຍອາດສົ່ງຜົນໃຫ້ກາຍຮ່າງເປັນຕົວປະຫລາດໄດ້.
