4 ນັກເຕະຂອງບຣາຊິລຕິດເຊື້ອໂຄວິດ ຊ້ຳຮ້າຍເຮືອບິນຕົກ ເສຍຊີວິດທັງໝົດ
ວົງການບານເຕະບຣາຊິລເກີດໂສກນາດຕະກຳອີກ ເມື່ອ 4 ຜູ້ຫລິ້ນ ແລະ ປະທານສະໂມສອນຂອງທີມລະດັບ 4 ລວມທັງນັກບິນ ປະສົບອຸປະຕິເຫດເຮືອບິນຕົກເສຍຊີວິດທັງໝົດ ໂດຍ 4 ນັກເຕະໃໝ່ຫາກໍຍ້າຍມາຮ່ວມທີມ ກຳລັງເດີນທາງໄປສົມທົບກັບທີມ ເພື່ອກຽມແຂ່ງຂັນ ວິລາ ໂນວາ ໃນລາຍການ ໂຄປາ ແວຣເດ ໂດຍທີມຕ້ອງແຍກເດີນທາງ ເພາະນັກເຕະກຸ່ມນີ້ຕິດເຊື້ອໂຄວິດຫາກໍຄົບກຳນົດກັກຕົວ ແລະ ຈະໄດ້ລົງແຂ່ງນັດທຳອິດ ແຕ່ໂຊກຮ້າຍບໍ່ມີໂອກາດລົງຫລິ້ນໃຫ້ທີມ. ທາງການບຣາຊິລຢູ່ລະຫວ່າງການສອບສວນຫາສາເຫດຂອງການເກີດອຸປະຕິເຫດຄັ້ງນີ້.
ວັນທີ 25 ມັງກອນ 2021, ສຳນັກຂ່າວຣອຍເຕີລາຍງານວ່າ: ສະໂມສອນພັລມາສ ທີມໃນລະດັບ 4 ຂອງບຣາຊິລ ປະກາດຂ່າວເສົ້າວ່າ: ລູຄັສ ເມຣາ ປະທານສະໂມສອນ ພ້ອມດ້ວຍ 4 ຜູ້ຫລິ້ນຂອງທີມຄື ລູຄັສ ປຣາເຊເດສ, ກິລເຍເມ ໂນເອ, ຣານູເລ ແລະ ມາຣຄຸສ ໂມລິນາຣີ ລວມທັງ ວາກເນີ ນັກບິນ ປະສົບອຸປະຕິເຫດເຮືອບິນຕົກ ເສຍຊີວິດທັງໝົດ ໃນວັນທີ 24 ມັງກອນຜ່ານມາ.
ທັງນີ້, ເຮືອບິນລຳດັ່ງກ່າວເປັນເຮືອບິນສ່ວນບຸກຄົນ ເຊິ່ງພາທີມພັລມາສເດີນທາງໄປເມືອງໂກຍາເນຍ ປະເທດບຣາຊິລ ໄລຍະທາງປະມານ 800 ກິໂລແມັດ ເພື່ອລົງແຂ່ງຂັນ ວິລາ ໂນວາ ໃນລາຍການໂຄປາ ແວຣເດ ເຊິ່ງເປັນການແຂ່ງຂັນລະຫວ່າງ 24 ທີມທາງຕອນເໜືອ ແລະ ຕອນກາງໃນເຂດຕາເວັນຕົກຂອງປະເທດບຣາຊິລ.
ທັງນີ້ເມື່ອປີ 2016 ຊາເປໂດເອນເຊ ທີມດັງໃນລີກສູງສຸດຂອງບຣາຊິລເຄີຍປະສົບອຸປະຕິເຫດເຮືອບິນຕົກເຊັ່ນດຽວກັນໃນລະຫວ່າງເດີນທາງໄປແຂ່ງຂັນໃນລາຍການໂຄປາ ຊູດາເມຣິການາ ຮອບຊີງຊະນະເລີດ ຢູ່ປະເທດໂຄລອມເບຍ ເຊິ່ງເທື່ອນັ້ນຜູ້ໂດຍສານໃນຖ້ຽວບິນດັ່ງກ່າວເສຍຊີວິດເກືອບທັງໝົດ, ສ່ວນໃນປີ 2014 ແຟຣນັນດາ ອະດີດກັບຕັນທີມອິນເຕີນາຊິອອງນາລ ກໍເສຍຊີວິດຈາກອຸປະຕິເຫດເຮລິກອບແຕຕົກຢູ່ລັດໂກຍາສ.
