ປະຊາຊົນບ້ານ ອາຣອງ ໄດ້ຮັບການຊ່ວຍເຫລືອຈາກອົງການກາແດງລາວ

ໃນວັນທີ 24 ມັງກອນນີ້, ອົງການກາແດງລາວ ໄດ້ຊ່ວຍເຫລືອສິ່ງຂອງເຄື່ອງບັນເທົາທຸກໃຫ້ແກ່ປະຊາຊົນບ້ານ ອາຣອງ ທີ່ຍົກຍ້າຍ ຖິ່ນຖານ ມາຢູ່ບ້ານ ຫ້ວຍປຶງ ເມືອງກະລຶມ ແຂວງເຊກອງ ເພື່ອລໍຖ້າການຈັດສັນທີ່ຢູ່ໃໝ່, ເນື່ອງຈາກວ່າທີ່ຢູ່ເກົ່າແມ່ນຫ່າງໄກສອກຫລີກ, ການທຳມາຫາກິນ ຂອງປະຊາຊົນ ແມ່ນພົບຄວາມຫຍຸ້ງຍາກຂາດເຂີນ, ພັກ-ລັດຖະບານຈຶ່ງໄດ້ເອົາໃຈໃສ່ເພື່ອພັດທະນາຄຸນນະພາບຊີວິດການເປັນຢູ່ໃຫ້ດີຂຶ້ນເພື່ອໃຫ້ຕົວເມືອງ ແລະ ຊົນນະບົດຫຍັບມໍ່ເຂົ້າໃກ້ເທົ່າທຽມກັນເທື່ອລະກ້າວ, ເຊິ່ງມີ 29 ຄອບຄົວ, ພົນລະເມືອງ 187 ຄົນ. ໂດຍການມອບຂອງທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ.

ເຄື່ອງທີ່ນຳມາຊ່ວຍເຫລືອໃນຄັ້ງນີ້ປະກອບມີ: ເຂົ້າສານ, ນ້ຳດື່ມ, ຜ້າຫົ່ມ, ມຸ້ງ, ສາດ, ເຄື່ອງໃຊ້ພາຍໃນຄົວເຮືອນ, ເຄື່ອງນຸ່ງຫົ່ມປະສົມ, ເຄື່ອງອຸປະໂພກ ແລະ ເຄື່ອງສຸຂະອະນາໄມ ລວມມູນຄ່າຫລາຍກວ່າ 20 ລ້ານກີບ.

ໂອກາດດັ່ງກ່າວ, ທ່ານຮອງເຈົ້າເມືອງ ກໍໄດ້ກ່າວສະແດງຄວາມຂອບໃຈ ມາຍັງອົງການກາແດງລາວ ທີ່ເຫັນໄດ້ເຖິງຄວາມສຳຄັນໃນການຊ່ວຍເຫລືອ ປະຊາຊົນໃນຄັ້ງນີ້ ເພື່ອໃຫ້ເຂົາເຈົ້າມີຊີວິດການເປັນຢູ່ທີ່ດີຂຶ້ນກວ່າເກົ່າ ເພື່ອເຮັດໃຫ້ເຂົາເຈົ້າມີກຳລັງໃຈໃນການສ້າງພັດທະນາ ຊີວີດການເປັນຢູ່ໃຫ້ດີຂຶ້ນກວ່າເກົ່າ.