ບໍ່ມັກຜົວຊຸມແຊວ ແຕ່ຊໍ້າພັດບໍລິການຜົວເຕັມທີ່
ເມຍຂອງເພື່ອນຂ້ອຍ ແຕ່ງ ອາຫານການກິນບໍລິການໃຫ້ຜົວກັບແກ້ມ ຫຼັງຈາກນັ້ນກໍເອົາລົງໃນໜ້າສື່ສັງຄົມອອນລາຍ ພາຍພິງເຖິງເພື່ອນຂອງຜົວ. ຂ້ອຍຕົກຢູ່ໃນສະພາບກືນບໍ່ເຂົ້າ ຄາຍບໍ່ອອກ ໃນເມື່ອຕົກເປັນເປົ້າໝາຍວ່າ ເປັນຜູ້ຊັກຊວນ ຜົວຂອງຄົນອື່ນ ກິນ-ດຶ່ມ ກັບແກ້ມ ຊຸມແຊວແມວໂພງ.
ເລື່ອງມີຢູ່ວ່າ, ມີຄັ້ງໜຶ່ງ ຂ້ອຍໄດ້ໄປຢື້ຢາມຖາມຂ່າວ ແລະ ອວຍພອນປີໃໝ່ເພື່ອນຂອງຂ້ອຍ, ຂ້ອຍເວົ້າກັບເພື່ອນວ່າ: ກິນນໍ້າຊາ ກັບເຂົ້າໜົມກໍພໍແລ້ວ ບໍ່ຕ້ອງການ ເຫຼົ້າ-ເບຍຫຍັງດອກ. ແຕ່ເພື່ອນກໍບໍ່ຍອມ ຕ້ອງໄດ້ດຶ່ມເບຍຂ້າຄາວວ່າຊັ້ນ. ເມື່ອເຫັນຜູ້ເປັນຜົວດື່ມເບຍ ຢ່າງເອົາຈິງເອົາຈັງ ພ້ອມກັບຂອງແກ້ມຢ່າງຫ້າວຫັນ ກັບເພື່ອນ, ຜູ້ເປັນເມຍກໍເລີຍຍ່າງເຂົ້າໄປໃນເຮືອນຄົວ ສັບເອົາໄກ່ຕົ້ມ, ຂົ້ວຊີ້ນງົວ ອອກມາບໍລິການໃຫ້ຜູ້ເປັນຜົວ ກັບແກ້ມກັບເພື່ອນ ຢ້ານວ່າ ຜົວຈະເຈັບກະເພາະ.
ເມື່ອຂ້ອຍເມືອຮອດເຮືອນ, ເຫັນເມຍຂອງເພື່ອນເອົາຮູບທີ່ກິນດື່ມກັນນັ້ນລົງໃນສື່ສັງຄົມອອນລາຍ ພ້ອມທັງຈົ່ມທຸກວ່າ ຕ້ອງໄດ້ແຕ່ງຢູ່ຄົວກິນ ຮັບໃຊ້ຜົວ ຊຸມແຊວແມວໂພງກັບເພື່ອນ ວ່າຊັ້ນ. ທັງໆ ທີ່ຕົນເອງເປັນຜູ້ສະໝັກໃຈບໍລິການໃຫ້ຜົວໄດ້ຊຸມແຊວກັບເພື່ອນ ແຕ່ກັບມາວິພາກວິຈານແບບນັ້ນ ແມ່ນບໍ່ດີທີ່ສຸດ.
ຊຶ່ງເປັນສິ່ງທີ່ອັບອາຍ ໃນເມື່ອບໍ່ຢາກໃຫ້ຜົວ ກັບແກ້ມຊຸມແຊວກັບເພື່ອນ ແຕ່ຕົນເອງກັບເປັນຜູ້ບໍລິການໃຫ້ຜົວເສຍເອງ. ຖ້າບໍ່ມັກໃຫ້ຜົວ ກິນ-ດຶ່ມ ກັບແກ້ມຊຸມແຊວ, ເອື້ອຍນ້ອງແມ່ຍິງ ກໍຄວນຈະສະແດງທ່າທີອອກມາເຊັ່ນ: ເກັບເອົາກະປ໋ອງ, ແກ້ວເບຍ ຍັດເຂົ້າໃສ່ກະຖັງຂີ້ເຫຍື້ອ ຫຼື ອາດເວົ້າວ່າ: “ ຖ້າເຈົ້າຫາກຢາກກິນ-ດຶ່ມ ກັບແກ້ມແບບນີ້ ແມ່ນໃຫ້ກະກຽມ ແລະ ເຮັດເອົາເອງ, ຖ້າເປັນເຈັບເປັນໄຂກໍໃຫ້ໄປກວດຢູ່ໂຮງໝໍເອົາເອງ, ຂ້ອຍຈະບໍ່ສົນໃຈ”. ເມື່ອສະແດງຄືແນວນັ້ນອອກມາ ຈຶ່ງແມ່ນຜູ້ຍິງທີ່ເຂັ້ມແຂງ. ຖ້າຫາກຍັງໄປຮັບໃຊ້ໃຫ້ສິ່ງທີ່ຕົນເອງບໍ່ມັກ ແລ້ວ ວິຈານ ກໍຖືວ່າ ເປັນເສັ້ນປະສາດໄປແລ້ວ.
ເພື່ອບໍ່ໃຫ້ເສຍເວລາ ແຕ່ງຢູ່ຄົວກິນຮັບໃຊ່ແຂກຄົນໃນຍາມກຸດ, ກໍຄວນຈະນຳໃຊ້ເຄື່ອງອາຫານການກິນໃນຍາມກຸດທີ່ມີຢູ່ແລ້ວເຊັ່ນ: ສົ້ມຜັກ, ຢໍ່, ຕົ້ມເຄັມ, ເຂົ້າຕົ້ມ, ເຂົ້າໜົມ…ຈະສະດວກທີ່ສຸດ.
