ທຣຳ ເປີດເຜີຍຄວາມເສຍຫາຍ ຂອງອານາຈັກທຸລະກິດ ຈາກໂຄວິດ-19
ອານາຈັກທຸລະກິດຂອງ ທຣຳ ຖືກການລະບາດຂອງພະຍາດຖະຫຼົ່ມຢ່າງໜັກໜ່ວງ, ໃນຂະນະທີ່ລາຍຮັບຈາກໂຮງແຮມໃນ Washington ແລະLas Vegas ລ້ວນແຕ່ຕົກຕໍ່າ.
ໃນບົດລາຍງານຢ່າງເປັນທາງການ ໃນຖານະເປັນປະທານາທິບໍດີ, ທຣຳ ໄດ້ຈັດລຽງລາຍລະອຽດຂອງຄວາມເສຍຫາຍໃນທຸລະກິດຂອງຕົນ ໃນຈຸດເວລາທີ່ຫຼາຍຫົວໜ່ວຍທຸລະກິດໃນຂະແໜງການທ່ອງທ່ຽວ ຂາດນັກທ່ອງທ່ຽວ. ເຮັດໃຫ້ລາຍຮັບທຸລະກິດໂຮງແຮມຂອງ ທຣຳ ໃນວໍຊິງຕັນ ຊຶ່ງເປັນໂຮງແຮມ ທີ່ ທຣຳ ຈ່າວຂາຍນັ້ນ ຈາກ 40,5 ລ້ານໂດລາຫຼຸດລົງຍັງເຫຼືອພຽງ 15,1 ລ້ານໂດລາ.
ສ່ວນຢູ່ໃນລັດ Vegas ນັ້ນ ລາຍຮັບທຸລະກິດໂຮງແຮມຍັງເຫຼືອພຽງ 9,2 ລ້ານໂດລາ ຈາກ 23,3 ລ້ານໂດລາ. ສ່ວນທຸລະກິດ ອະສັງຫາລີມະຊັບຂອງ ທຣຳ ເຊັ່ນ Doral Golf Resort ທີ່ Miami ກໍມີລາຍຮັບພຽງແຕ່ 44 ລ້ານໂດລາ, ຈາກ 77 ລ້ານໂດລາ ຂອງປີກ່ອນໜ້ານີ້. ສະໜາມກ໊ອບ ຂອງ ທຣຳ ໃນອັງກິດ ແລະ ໄອແລນ ລາຍຮັບກໍຫຼຸດລົງ 2/3.
ລາຍຮັບຂອງ ທຣຳ ຫຼຸດລົງຍັງເຫຼືອພຽງ 273-308 ລ້ານໂດລາໃນໄລຍະປີ 2020 ແລະ 20 ວັນຂອງຕົ້ນປີ 2021. ທຣຳ ໃຫ້ຮູ້ວ່າ ໃນປີ 2017 ເຂົາມີລາຍຮັບທຸລະກິດຫຼາຍກວ່າ 528,9 ລ້ານໂດລາໃນໄລຍະ 15,5 ເດືອນ.
ຈຸດເດັ່ນອັນໜຶ່ງອີກ ໃນອານາຈັກທຸລະກິດຂອງ ທຣຳ ກໍຄື Mar-a-Lago club ຢູ່ໃນລັດ Florida ກໍມີລາຍຮັບພຽງ 24,2 ລ້ານໂດລາ, ເພີ່ມຂຶ້ນເມື່ອທຽບໃສ່ 21,4 ລ້ານໂດລາ ໃນປີກ່ອນໜ້ານັ້ນ. ນີ້ ແມ່ນທຸລະກິດທີ່ມີກຳໄລ ຂອງທຣຳ ທີ່ບໍ່ໄດ້ຮັບຜົນກະທົບຈາກ ໂຄວິດ-19.
ນອກຈາກນີ້, ທຣຳ ຍັງໃຫ້ຮູ້ວ່າ ທຸລະກິດຂາຍຍ່ອຍທາງອອນລາຍ ຖ້າທຽບໃສ່ປີຜ່ານມາ ແມ່ນເພີ່ມຂຶ້ນ 1,96 ລ້ານໂດລາ ໃນປີ 2019. ແຕ່ລາຍຮັບທຸລະກິດຈາກຮ້ານຄ້າ Trump Tower ໃນ New York City ຫຼຸດລົງເກືອບ 850.000 USD ເປັນ 166.000 USD ເພາະຍ້ອນຖືກປິດປະຕູ ອັນເນື່ອງມາຈາກມາດຕະການປິດເມືອງ.
ມູນຄ່າຊັບສິນທັງໝົດໃນທຸລະກິດຂອງ ທຣຳມີປະມານ 1,3-1,7 ຕື້ໂດລາ. ຂະນະນີ້ ທຣຳ ມີຊັບສິນທີ່ຂຶ້ນທະບຽນມີ 22 ລາຍການ, ໃນນັ້ນລວມີມີ Mar-a-Lago resort ແລະ Trump International Hotel ໃນ Washington.
Bloomberg Billionaires Index ໃຫ້ຮູ້ວ່າ ຂະນະນີ້ ທຣຳ ມີຊັບສິນທັງໝົດ 2,5 ຕື້USD, ຫຼຸດ 500 ລ້ານ USD. ເປັນໜີ້ດ້ານ ອະສັງຫາລີມະຊັບຫຼາຍກວ່າ 1 ຕື້ໂດລາ.
