ຍີ່ປຸ່ນຕັດສິດຜູ້ເຂົ້າສອບເສັງ ຫລັງໃສ່ຜ້າອັດປາກ-ດັງບໍ່ຖືກວິທີ
ສຳນັກຂ່າວ NHK ຂອງຍີ່ປຸ່ນລາຍງານວ່າ: ຜູ້ຊາຍຄົນໜຶ່ງທີ່ເຂົ້າສອບສັງລວມແບບໃໝ່ ເພື່ອສຶກສາຕໍ່ລະດັບມະຫາວິທະຍາໄລໃນຍີ່ປຸ່ນ ເມື່ອວັນທີ 16 ມັງກອນຜ່ານມາ ແຕ່ຖືກຕັດສິດການສອບເສັງ ເນື່ອງຈາກໃສ່ຜ້າອັດປາກ-ດັງບໍ່ເໝາະສົມ. ທັງນີ້ ການສອບເສັງມີຄວາມເຂັ້ມງວດໃນການປ້ອງກັນການແຜ່ລະບາດຂອງເຊື້ອໂຄວິດຫລາຍ ເພາະສາຍພັນໃໝ່ກຳລັງລະບາດໜັກຢູ່ຍີ່ປຸ່ນ.
ຊາຍອາຍຸ 49 ປີຄົນນີ້ ຖືກຕັດສິດເນື່ອງຈາກບໍ່ປະຕິບັດຕາມຄຳຂໍຮ້ອງຫລາຍເທື່ອວ່າໃຫ້ໃສ່ຜ້າອັດປາກ-ດັງໃຫ້ກວມດັງ, ແຕ່ລາວບໍ່ຍອມໃຫ້ການຮ່ວມມື ແລະ ເມື່ອເຈົ້າໜ້າທີ່ຂໍໃຫ້ຍ້າຍໄປສອບເສັງຫ້ງແຍກຕ່າງຫາກ ແຕ່ບໍ່ຍອມໄປ. ຈາກນັ້ນລາວຈຶ່ງລຸກ ແລະ ເຂົ້າໄປຂັງຕົນເອງໄວ້ໃນຫ້ອງນ້ຳ ຈຶ່ງເຮັດໃຫ້ລາວຖືກຈັບໃນຂໍ້ຫາຕ້ອງສົງໄສວ່າບຸກລຸກສະຖານທີ່ຢ່າງຜິດກົດໝາຍ. ຕຳຫລວດກຳລັງຢູ່ລະຫວ່າງການສອບສວນກໍລະນີດັ່ງກ່າວ.
