ປະເທດ ນໍເວ ແຈ້ງຂ່າວວ່າ ມີຜູ້ເສຍຊີວິດ 23 ຄົນ ຈາກການສັກວັກຊີນ ປ້ອງກັນ ໂຄວິດ-19
ລາຍງານຂ່າວຈາກຕ່າງປະເທດ ເມື່ອວັນທີ 18 ມັງກອນນີ້ວ່າ ວັນທີ 5 ມັງກອນນີ້, ອົງການອາຫານ ແລະ ຢາ ຂອງປະເທດ ນໍເວ ແຈ້ງຂ່າວໃຫ້ຮູ້ວ່າ ມີ 2 ຄົນເສຍຊີວິດຍ້ອນສັກວັກຊີນປ້ອງກັນໂຄວິດ-19.
ລັດຖະບານ ນໍເວ ເລີ່ມສັກວັກຊີນປ້ອງກັນໂຄວິດ-19 ຂອງບໍລິສັດ Pfizer/BioNTech ໃຫ້ປະຊາຊົນແຕ່ວັນທີ 27 ທັນວາ 2020. ເມື່ອມາເຖິງວັນທີ 15 ມັງກອນນີ້, ມີເຖິງ 23 ຄົນແລ້ວທີ່ເສຍຊີວິດຈາກການສັກວັກຊີນດັ່ງກ່າວ.
ລັດຖະບານ ນໍເວ ແຈ້ງໃຫ້ຮູ້ວ່າ ໃນຈຳນວນ 23 ກໍລະນີເສຍຊີວິດຂ້າງເທິງນັ້ນ, ມີ 13 ສົບ ຖືກຜ່າຕັດເພື່ອຊັນນະສູດຫາສາເຫດທີ່ແທ້ຈິງຂອງການເສຍຊີວິດ. ຜົນສັນລະສູດເບື້ອງຕົ້ນໃຫ້ຮູ້ວ່າ ແມ່ນເນື່ອງມາຈາກເກີດຜົນຂ້າງຄຽງທີ່ຮ້າຍແຮງຈາກການສັກວັກຊີນ ໂດຍສະເພາະແມ່ນຜູ້ສູງອາຍຸ ແລະ ຈຳພວກທີ່ມີພະຍາດປະຈຳຕົວ ຫຼື ພະຍາດຊໍ້າເຮື້ອ.
ວັນທີ 6 ມັງກອນນີ້, ສູນຄວບຄຸມ ແລະ ປ້ອງກັນພະຍາດຂອງສະຫະລັດ ໃຫ້ຮູ້ວ່າ ມີປະມານ 1/100.000 ຄົນທີ່ສັກທົດລອງວັກຊີນຂອງບໍລິສັດ Pfizer/BioNTech ເກີດອາການຊ໊ອກຢ່າງຮ້າຍແຮງ, ແຕ່ກໍຢືນຢັນວ່າ ພູມຄຸ້ມກັນພະຍາດຂອງວັກຊີນ ແມ່ນສູງກວ່າການເກີດອາການຂ້າງຄຽງຫຼາຍເທົ່າ.
