ດີໃຈ ການທ່ອງທ່ຽວພາຍໃນ ຄຶກຄື້ນ

ໂດຍ:​ມຶກບໍ່ແຫ້ງ

ເຖິງວ່າຂະແໜງການທ່ອງທ່ຽວ ຈະໄດ້ຮັບຜົນກະທົບຫຼາຍທີ່ສຸດ ເມື່ອໂຄວິດລະບາດ ແຕ່ເລື່ອງ ດີແນວໜຶ່ງກໍຄື ເຮັດໃຫ້ ຄົນລາວຮູ້ຈັກແຫຼ່ງທ່ອງທ່ຽວປະເທດຕົນເອງຫຼາຍຂຶ້ນ ໃນເວລາທີ່ຈຳກັດການ ອອກນອກປະເທດ.

ຜ່ານມາທີ່ການເດີນທາງ ບໍ່ໄດ້ຈຳກັດ ເພາະບໍ່ມີ ໂຄວິດ 19 ນັ້ນ ພວກເຮົາ ເຫັນວ່າການທ່ອງທ່ຽວພາຍໃນປະເທດຂອງ ຄົນລາວ ບໍ່ຄຶກຄື້ນຫຼາຍ, ພວກເຮົາ ນິຍົມ ໄປທ່ຽວ ຢູ່ປະເທດອ້ອມຂ້າງ ຍ້ອນຫຼາຍປັດໄຈ ບໍ່ວ່າຈະເປັນ ຂອດການບໍລິການ, ສະຖານທີ່ທ່ອງທ່ຽວ ປອດໄພ, ຄ່າໃຊ້ຈ່າຍ ສົມເຫດສົມຜົນ ແລະອື່ນໆ ເຊິ່ງພາຍໃນປະເທດເຮົາຍັງຂາດ, ເປັນການສູນເສຍລາຍໄດ້ ແລະ ໂອກາດໃນການ ສ້າງຄວາມເຂັ້ມແຂງ ໃນຂະແໜງການທ່ອງທ່ຽວພາຍໃນປະເທດ

ພວກເຮົາ ທຸກຄົນຮູ້ດີຢູ່ແລ້ວວ່າ ສປປລາວ ມີທ່າແຮງຢ່າງຫຼວງຫຼາຍໃນການພັດທະນາການທ່ອງທ່ຽວ ໂດຍສະເພາະ ການທ່ອງທ່ຽວ ແບບອະນຸລັກ ທຳມະຊາດ ທີ່ປະເທດເຮົາຍັງມີຫຼາຍບ່ອນ ທີ່ໜ້າຄົ້ນຫາ ບໍ່ວ່າຈະເປັນ ສາຍນໍ້າ, ຖໍ້າ, ປ່າໄມ້, ສັດປ່າ, ດອກໄມ້ປ່າຫາຍາກ ແລະ ອື່ນໆ ທີ່ຕ້ອງການພັດທະນາ ພື້ນຖານໂຄງການລ່າງ ໂດຍສະເພາະການເຂົ້າເຖິງ, ການບໍລິການ ແລະ ອື່ນໆ.

ເມື່ອທັງໂລກ ຕ້ອງມາພົບພໍ້ກັບ ການລະບາດຂອງພະຍາດ ໂຄວິດ 19 ທີ່ຈຳກັດການເດີນທາງ ນັ້ນ ໄດ້ເຮັດໃຫ້ ການລາຍຮັບຂອງບັນດາປະເທດຕ່າງໆ ລວມທັງ ສປປລາວ ຈາກການທ່ອງທ່ຽວຫຼຸດລົງ. ດັ່ງທີ່ ມີການລາຍງານ ເມື່ອບໍ່ດົນຜ່ານມາວ່າ ການທ່ອງທ່ຽວຂອງຫຼວງພະບາງ ຫຼຸດລົງ 68% ໃນປີ 2020. ແລະ ຜ່ານມາ ພວກເຮົາກໍ ອີງອາໄສ ແຕ່ນັກທ່ອງທ່ຽວຕ່າງປະເທດ ພໍມາຮອດວິກິດ ກໍໄດ້ຮັບຜົນກະທົນໜັກ.

ຄຽງຄູ່ກັບດ້ານ ທ້າທາຍຂອງຂະແໜງການທ່ອງທ່ຽວໃນເວລາວິກິດ ກໍຍັງໄດ້ ສ້າງໂອກາດ ໃຫ້ຄົນພາຍໃນປະເທດ ໄດ້ມີໂອກາດໃນການຊອກຫາ ແຫຼ່ງທ່ອງທ່ຽວພາຍໃນປະເທດຫຼາຍຂຶ້ນ. ໂຊກດີຢ່າງໜຶ່ງທີ່ວ່າ ປະເທດເຮົາ ທີ່ທາງການ ສາມາດຄວບຄຸມການແຜ່ລະບາດຂອງພະຍາດ ໂຄວິດ ພາຍໃນປະເທດໄດ້ດີ ຈຶ່ງເຮັດ ໃຫ້ພວກເຮົາສາມາດໄປມາຫາສູ່ກັນ ພາຍໃນປະເທດ ໄດ້ເປັນປົກກະຕິ ອັນນີ້ ກໍແມ່ນ ເງື່ອນໄຂໜຶ່ງ ທີ່ອຳນວຍ ຄວາມສະດວກໃຫ້ ການທ່ອງທ່ຽວພາຍໃນ ຄ່ອຍໆດີຂຶ້ນຕາມລຳດັບ.

ບວກໃສ່ກັບວ່າ ປະເທດເຮົາ ຫາກໍເປີດ ທາງດ່ວນ ສາຍທຳອິດ ແຕ່ນະຄອນຫຼວງວຽງຈັນ ຫາ ວັງວຽງນັ້ນ ກໍສາມາດ ກະຕຸ້ນການເດີນທາງໄປທ່ອງທ່ຽວ ບໍ່ວ່າຈະເປັນ ເມືອງວັງວຽງ ທີ່ເປັນ ທ່ອງທ່ຽວ ຢູ່ແລ້ວ ແລະ ເຂດອື່ນໆ ໄດ້ຫຼາຍຂຶ້ນ ອັນເປັນເລື່ອງທີ່ດີທີ່ສຸດ.

ພ້ອມນັ້ນ ພວກເຮົາ ກໍຍັງສັງເກດ ເຫັນວ່າ ສະຖານທີ່ ທ່ອງທ່ຽວ ຊົມຄວາມງາມຂອງທຳະຊາດຂອງ ປະເທດເຮົາ ກໍນັບມື້ ນັບໄດ້ຮັບການພັດທະນາ ທາງດ້ານພື້ນຖານໂຄງລ່າງ ທີ່ຫຼາກຫຼາຍ, ເຮັດໃຫ້ ຄົນພາຍໃນປະເທດ ມີທາງເລືອກຫຼາຍຂຶ້ນ ແລະ ທັງເປັນການກະຕຸ້ນການແຂ່ງຂັນ ຂອງຜູ້ລົງທຶນ ທີ່ຈະຕ້ອງເນັ້ນຄຸນນະພາບທີ່ດີຂຶ້ນ ດ້ວຍ ຄ່າບໍລິການທີ່ສົມເຫດສົມຜົນ.

ແຕ່ແນວໃດ ກໍຕາມ ຜູ້ຂຽນ ເຄີຍໄດ້ລົມນຳ ນັກລົງທຶນ ບາງທ່ານທີ່ມີຊື່ສຽງດ້ານການທ່ອງທ່ຽວ ແບບອະນຸກລັກນັ້ນ ເພິ່ນກໍຈົ່ມວ່າ ການດຳເນີນທຸລະກິດ ການທ່ອງທ່ຽວແບບອະນຸລັກ ກໍ ມີຄ່າທຳນຽມຫຼາຍອັນ ທີ່ທາງພາກສ່ວນກ່ຽວຂ້ອງ ໄດ້ເກັບນຳ ເຊິ່ງ ກໍເປັນ ຈຳນວນຫຼາຍສົມຄວນ ອັນນີ້ ກໍອາດເປັນ ອຸປະສັກ ອັນໜຶ່ງ ທີ່ຄວນຕ້ອງໄດ້ຮັບການພິຈາລະນາຄືນ, ແທນທີ່ ຈະເປັນການຊຸກຍູ້ ແຕ່ ສ້າງຄວາມໜັກໃຈໃຫ້ຜູ້ລົງທຶນ ນັ້ນກໍບໍ່ສົມຄວນ.

ນອກນັ້ນ, ຜູ້ລົງທຶນ ບາງທ່ານ ທີ່ມັກຮັກໃນການ ທ່ອງທ່ຽວແບບອະນຸລັກ ທີ່ເຫັນຄຸນຄ່າຂອງ ຊັບພະຍາກອນ ທີ່ມໍລະດົກທາງທຳມະຊາດຂອງປະເທດເຮົານີ້ ກໍໄດ້ຮຽກຮ້ອງວ່າ ພວກເຮົາຄວນເຊົາໄດ້ແລ້ວ ທີ່ຈະອະນຸຍາດ ບັນດາໂຄງການພັດທະນາ ທີ່ຈະທຳລາຍຄວາມສວຍງາມຂອງ ທຳມະຊາດພວກເຮົາ ທີ່ບໍ່ມີທາງ ສ້າງຂຶ້ນມາໃໝ່ໄດ້ ແຕ່ຈົ່ງພະຍາຍາມ ພັກດັນ ເອົາຄວາມງາມເຫຼົ່ານັ້ນ ມາສ້າງເປັນລາຍຮັບເຂົ້າປະເທດ, ສ້າງຄວາມອຸດົມສົມບູນ ທາງດ້ານລະບົບນິເວດ, ສ້າງວຽກເຮັດງານທຳ ແກ່ຄົນທ້ອງຖິ່ນ ຜ່ານການສົ່ງເສີມ ການທ່ອງທ່ຽວແບບອະນຸລັກ ຢ່າງຄົບວົງຈອນ ເພື່ອຄວາມຍືນຍົງ.