ຢຸດຄິດ! ດື່ມເຫລົ້າແກ້ໜາວເປັນອັນຕະລາຍເຖິງຊີວິດ

ຄວາມເຊື່ອທີ່ວ່າ ການດື່ມເຫລົ້າຈະຊ່ວຍໃຫ້ຜ່ອນໜາວໃນຊ່ວງທີ່ອາກາດໜາວເຢັນນັ້ນ ອາດຈະບໍ່ແມ່ນຄວາມເຊື່ອທີ່ດີ ເພາະການກະທຳດັ່ງກ່າວຈະສົ່ງຜົນກະທົບຕໍ່ຮ່າງກາຍເປັນອັນຕະລາຍເຖິງຊີວິດໄດ້.

ການດື່ມເຄື່ອງດື່ມທີ່ມີທາດເຫລົ້າບໍ່ໄດ້ຊ່ວຍໃຫ້ຮ່າງກາຍອົບອຸ່ນ ແລະ ແກ້ອາກາດໜາວໄດ້ແຕ່ຢ່າງໃດ, ແຕ່ການດື່ມເຫລົ້າແກ່ໜາວຍິ່ງເລັ່ງໃຫ້ຮ່າງກາຍສູນເສຍຄວາມຮ້ອນ ສ່ວນທີ່ວ່າດື່ມແລ້ວຮູ້ສຶກຕົວອຸ່ນຂຶ້ນນັ້ນເປັນຍ້ອນຫລອດເລືອດຝອຍທີ່ຢູ່ໃຕ້ຜິວໜັງເກີດການຂະຫຍາຍຕົວຢ່າງແຮງ ເພື່ອໃຫ້ຄວາມຮ້ອນໃນຮ່າງກາຍຖືກລະບາຍອອກມາໄດ້ງ່າຍຂຶ້ນ, ເຊິ່ງເມື່ອຄວາມຮ້ອນໃນຮ່າງກາຍຖືກລະບາຍອອກມາຫລາຍເທົ່າໃດ ກໍຈະເຮັດໃຫ້ອຸນຫະພູມໃນຮ່າງກາຍຫລຸດຕໍ່າລົງກວ່າປົກກະຕິ, ຍິ່ງດື່ມຫລາຍເທົ່າໃດ ກໍຈະເຮັດໃຫ້ອຸນຫະພູມຮ່າງກາຍຫລຸດລົງຕໍ່າເທົ່ານັ້ນ ແລະ ເມື່ອເຮົາຫລັບ ຮ່າງກາຍທີ່ສຳພັດກັບອາກາດເຢັນເປັນເວລາດົນຈຶ່ງເຮັດໃຫ້ເສຍຊີວິດໄດ້.

ນອກຈາກນັ້ນ, ອາກາດທີ່ໜາວເຢັນລົງຈະເຮັດໃຫ້ປະສາດສ່ວນກາງເຮັດວຽກຜິດປົກກະຕິ ແລະ ເຮັດໃຫ້ອັດຕາການເຕັ້ນຂອງຫົວໃຈຜິດປົກກະຕິອີກດ້ວຍ, ພ້ອມທັງຮ່າງກາຍຈະຕ້ອງການອົກຊີເຈນຫລາຍຂຶ້ນ ຈຶ່ງສົ່ງຜົນກະທົບຕໍ່ຜູ່ປ່ວຍໂລກຫົວໃຈ, ຫລອດເລືອດສະໝອງ, ໂລກອຳມະພຶກອຳມະພາ ລວມທັງໂລກຄວາມດັນໂລຫິດ. ດັ່ງນັ້ນຈຶ່ງຕ້ອງກະກຽມຢາປະຈຳຕົວໃຫ້ພ້ອມ ແລະ ດູແລເບິ່ງແຍງສຸຂະພາບຂອງຕົນ, ຮັກສາຮ່າງກາຍໃຫ້ອົບອຸ່ນ.

ສ່ວນວິທີເບິ່ງແຍງຮັກສາສຸຂະພາບຮ່າງກາຍໃນຊ່ວງຍາມໜາວນີ້ ມີວິທີງ່າຍໆດັ່ງນີ້:

1. ດື່ມນ້ຳໃຫ້ພຽງພໍ
2. ຮັບປະທານອາຫານໃຫ້ຄົບ 5 ໝູ່
3. ອອກກຳລັງກາຍຢ່າງໜ້ອຍມື້ລະເຄິ່ງຊົ່ວໂມງ
4. ໃສ່ເສື້ອກັນໜາວເພື່ອໃຫ້ຄວາມອົບອຸ່ນຮ່າງກາຍ
5. ຖ້າຫາກເປັນຫວັດ ຖ້າຈະອອກນອກບ້ານໃຫ້ໃສ່ຜ້າອັດປາກ-ດັງ ເພື່ອປ້ອງກັນການຕິດເຊື້ອສູ່ຄົນອ້ອມຂ້າງ
6. ຖ້າຫາກຮ່າງກາຍປຽກນ້ຳໃຫ້ຟ້າວເຊັດຕົວ, ປ່ຽນເສື້ອຜ້າ ເພື່ອປ້ອງກັນພາວະປອດບວມ.