ຄຸນລັກສະນະຜູ້ແທນກອງປະຊຸມໃຫຍ່ຄັ້ງທີ XI ຂອງພັກ

ໃນມື້ທຳອິດຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ(13 ມັງກອນນີ້), ສະຫາຍ ຈັນສີ ໂພສີຄຳ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກໄດ້ຂຶ້ນລາຍງານຄຸນລັກສະນະຜູ້ແທນກອງປະຊຸມໃຫຍ່ ຄັ້ງທີ XI ຂອງພັກວ່າ: ຈຳນວນຜູ້ແທນສົມບູນເຂົ້າຮ່ວມກອງປະຊຸມໃຫຍ່ທັງໝົດມີ 768 ສະຫາຍ, ເພດຍິງ 116 ສະຫາຍປະກອບມີ 43 ຊົນ ເຜົ່າທີ່ເປັນຕົວແທນໃຫ້ແກ່ສະມາຊິກພັກທົ່ວປະເທດ 348.686 ສະຫາຍ, ທຽບໃສ່ຜູ້ແທນກອງປະຊຸມໃຫຍ່ຄັ້ງທີ X ຂອງພັກເພີ່ມຂຶ້ນ 12,28%, ໃນນັ້ນ ຄະນະບໍລິຫານງານສູນກາງພັກ ສະໄໝທີ X ມີ 65 ສະຫາຍ, ຍິງ 9 ສະຫາຍ, ຜູ້ແທນທີ່ໄດ້ເລືອກຈາກທ້ອງຖິ່ນຮາກຖານ 462 ສະຫາຍ, ຍິງ 57 ສະຫາຍ, ຈາກອ້ອມຂ້າງສູນກາງ306 ສະຫາຍ, ຍິງ 59 ສະຫາຍ ແລະ ຜູ້ແທນ ບົ່ງຕົວ 7 ສະຫາຍ, ຍິງ 2 ສະ ຫາຍ.

ຜູ້ແທນສົມບູນມາຈາກຂົງເຂດຕ່າງໆປະກອບມີ: ຈາກຂົງເຂດພັກ, ອົງການແນວລາວສ້າງຊາດ ແລະ ອົງການຈັດຕັ້ງມະຫາຊົນ  81 ສະຫາຍ, ຍິງ 19 ສະຫາຍ. ຈາກຂົງເຂດປ້ອງກັນຊາດ-ປ້ອງກັນຄວາມສະຫງົບ 71 ສະຫາຍ, ຍິງ 1 ສະຫາຍ. ຈາກຂົງເຂດເສດຖະກິດ  84 ສະຫາຍ, ຍິງ 20 ສະຫາຍ.ຈາກຂົງເຂດນິຕິບັນຍັດ, ຕຸລາການ ແລະ ວັດທະນະທໍາ-ສັງຄົມ 70 ສະຫາຍ, ຍິງ 19 ສະຫາຍ.ຈາກແຂວງ-ນະຄອນຫລວງວຽງຈັນ  462 ສະຫາຍ, ຍິງ 57 ສະຫາຍ. ຜູ້ມີອາຍຸສູງສຸດ ແມ່ນ 83 ປີ ແລະ ຕໍ່າສຸດ 35 ປີ, ອາຍຸສະເລ່ຍ 59 ປີ.ລະດັບການສຶກສາສາມັນ: ຊັ້ນປະຖົມມີ 1 ສະຫາຍ, ຊັ້ນມັດທະຍົມຕົ້ນ 18 ສະຫາຍ,  ຊັ້ນມັດທະຍົມປາຍ  749 ສະຫາຍ. ລະດັບວິຊາສະເພາະ: ຊັ້ນຕົ້ນມີ 3 ສະຫາຍ,  ຊັ້ນກາງ 30 ສະຫາຍ,  ຊັ້ນສູງມີ 99 ສະຫາຍ, ປະລິນຍາຕີ 204 ສະຫາຍ, ປະລິນຍາໂທ 341 ສະຫາຍ ແລະປະລິນຍາເອກມີ 91 ສະຫາຍ.

ລະດັບທິດສະດີ: ສ່ວນຫລາຍແມ່ນຊັ້ນສູງມີ 537 ສະຫາຍ, ຍິງ 86 ສະຫາຍ, ປະລິນຍາຕີ 57 ສະຫາຍ, ຍິງ 11 ສະຫາຍ; ປະລິນຍາໂທ 70 ສະ ຫາຍ, ຍິງ 8 ສະຫາຍ, ປະລິນຍາເອກ 24 ສະຫາຍ, ຍິງ 3 ສະຫາຍ. ຕໍາແໜ່ງພາຍໃນພັກ: ກໍາມະການກົມການເມືອງສູນກາງພັກ, ເລຂາທິການສູນກາງພັກມີ 14 ສະຫາຍ, ຍິງ 1 ສະຫາຍ. ກໍາມະການສູນກາງພັກມີ 51 ສະຫາຍ, ຍິງ 9 ສະຫາຍ.ເລຂາ, ຮອງເລຂາຄະນະພັກແຂວງ, ນະຄອນຫລວງ, ກະຊວງ-ອົງການມີ 64 ສະຫາຍ, ຍິງ 11 ສະຫາຍ. ຄະນະປະຈໍາພັກແຂວງ, ນະຄອນຫລວງ, ກະຊວງ-ອົງການ ມີ 184 ສະຫາຍ, ຍິງ 26 ສະຫາຍ. ຄະນະພັກແຂວງ, ນະຄອນຫລວງ, ກະຊວງ-ອົງການມີ 387 ສະຫາຍ, ຍິງ 61 ສະຫາຍ.ເລຂາ ແລະ ຄະນະພັກຮາກຖານມີ 62 ສະຫາຍ, ຍິງ 7 ສະຫາຍ. ສະມາຊິກພັກສົມບູນມີ 6 ສະຫາຍ, ຍິງ 1 ສະຫາຍ.

ຜ່ານການກວດກາຄຸນລັກສະນະຜູ້ແທນທີ່ມາຈາກອົງຄະນະພັກທົ່ວປະເທດຢ່າງລະອຽດແລ້ວ ເຫັນວ່າບັນດາສະຫາຍຜູ້ແທນທີ່ໄດ້ຮັບການເລືອກຕັ້ງ ແລະ ບົ່ງຕົວເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະ ເທດຄັ້ງນີ້ ລ້ວນແຕ່ປະຕິບັດຖືກຕ້ອງຕາມກົດລະບຽບຂອງພັກ ແລະ ແມ່ນຜູ້ທີ່ມີມາດຖານ-ເງື່ອນໄຂຄົບຖ້ວນ ສົມເປັນຕົວແທນໃຫ້ແກ່ສະມາຊິກພັກໃນທົ່ວປະເທດເຂົ້າຮ່ວມກອງປະຊຸມໃຫຍ່ຜູ້ແທນຄັ້ງທີ XI ຂອງພັກຢ່າງແທ້ຈິງ.