ອົງການອະນາໄມໂລກ ກ່າວວ່າ ການສັກວັກຊີນໃຫ້ບັນດາປະເທດທຸກຍາກ ອາດຈະເລີ່ມຂຶ້ນ ໃນເດືອນກຸມພາ

ສຳນັກຂ່າວ ຣອຍເຕີ ລາຍງານ ເມື່ອວັນທີ 12 ມັງກອນນີ້ວ່າ ທີ່ປຶກສາລະດັບສູງຂອງອົງການອະນາໄມໂລກ, ທ່ານ Bruce Aylward ໃຫ້ຮູ້ວ່າ ອົງການການແພດຂອງສະຫະປະຊາຊາດ ຫວັງຢ່າງຍິ່ງວ່າ ໃນເດືອນກຸມພາ 2021 ນີ້ ອາດຈະໄດ້ເລີ່ມສັກວັກຊີນໃຫ້ກັບບັນດາປະເທດທີ່ທຸກຍາກ.

ທ່ານກ່າວຢໍ້າວ່າ: ເຖິງຢ່າງໃດກໍຕາມ ພວກເຮົາບໍ່ສາມາດທີ່ຈະເຮັດສິ່ງດັ່ງກ່າວຕາມລຳພັງໄດ້ແຕ່ຝ່າຍດຽວ, ພວກເຮົາຕ້ອງການການຮ່ວມມືຈາກຜູ້ຜະລິດວັກຊີນ ເພື່ອແຈກຢາຍວັກຊີນໃຫ້ກັບໂຄງການ ໂຄແວັກ(COVAX).

ເຖິງຂະນະນີ້, ໂຄງການໂຄແວັກ ໂດຍໄດ້ຮັບການຊ່ວຍໜູນຈາກ ອົງການອະນາໄມໂລກ, ສະຫະພັນວັກຊີນ GAVI ແລະ ສະຫະພັນປະດິດສ້າງປ້ອງກັນ ແລະ ຮັບມືກັບການລະບາດຂອງພະຍາດ(CEPI)  ລະດົມໄດ້ 6 ຕື້ໂດລາແລ້ວ ແລະ ຈອງຊື້ແລ້ວປະມານ 2 ຕື້ໂດສ ວັກຊີນຕ້ານໂຄວິດ-19, ບວກກັບ 1 ຕື້ໂດສ ໃນທາງເລືອກອື່ນ.

ມາເຖິງຂະນະນີ້, ມີເຖິງ 40 ປະເທດແລ້ວ ທີ່ໄດ້ເລີ່ມສັກວັກຊີນຕ້ານໂຄວິດ-19 ໃຫ້ກັບປະຊາຊົນ. ວັກຊີນທີ່ໄດ້ຮັບອະນຸມັດຫຼາຍທີ່ສຸດກໍຄື Pfizer/BioNTech, Moderna, AstraZeneca ແລະ ວັກຊີນຈາກ ລັດເຊຍ ແລະ ຈີນ ແລະ ປະເທດເຫຼົ່ານັ້ນ ກໍລ້ວນແຕ່ແມ່ນປະເທດທີ່ມີລາຍຮັບສູງ ແລະ ປານກາງ. ສ່ວນ 92 ປະເທດທີ່ມີລາຍຮັບຕໍ່າ ແລະ ເກືອບປານກາງ ອາດຈະມີຄວາມຈຳກັດເຂົ້າເຖິງວັກຊີນ.