ການນໍາຂັ້ນສູງພັກ-ລັດເຂົ້າວາງພວງມາລາ ຢູ່ອານຸສາວະລີນັກຮົບນິລະນາມດາວແດງ

ເພື່ອສະແດງຄວາມກະຕັນຍູຮູ້ບຸນຄຸນ ແລະ ຈາລຶກຄຸນງາມຄວາມດີຕໍ່ນາຍ ແລະ ພົນທະຫານ, ຕຳຫລວດ, ປະຊາຊົນລາວບັນດາເຜົ່າທີ່ເສຍສະຫລະເລືອດເນື້ອ ແລະ ຊີວິດໃນພາລະກິດຕໍ່ສູ້ກູ້ຊາດຕ້ານກັບຈັກກະພັດຜູ້ຮຸກຮານ ເພື່ອຍາດເອົາເອກະລາດ ແລະ ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໄດ້ນັບມື້ຮຸ່ງເຮືອງສີວິໄລ, ໃນວັນທີ 12 ມັງກອນນີ້ ການນໍາຂັ້ນສູງພັກ-ລັດໄດ້ເຂົ້າວາງພວງມາລາຢູ່ອານຸສາວະລີນັກຮົບນິລະນາມດາວແດງ ແລະ ວາງກະຕ່າດອກໄມ້ຢູ່ຫໍພິພິທະພັນ ປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ແລະ ເພື່ອຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 11 ຂອງພັກປະຊາຊົນປະຕິວັດລາວ ທີ່ຈະຈັດຂຶ້ນໃນວັນທີ 13-15 ມັງກອນນີ້.

ພິທີເລີ່ມຂຶ້ນໃນເວລາ 7 ໂມງເຊົ້າ ຢູ່ອະນຸສາວະລີນັກຮົບນິລະນາມ ໂດຍເລີ່ມຈາກຄະນະບໍລິຫານງານສູນກາງພັກປະຊາຊົນປະຕິວັດລາວ ນໍາໂດຍສະຫາຍ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ, ຕໍ່ມາແມ່ນຄະນະຜູ້ແທນສູນກາງ ແລະ ທ້ອງຖິ່ນ ນໍາໂດຍສະຫາຍ ຈະເລີນ ເຢຍປ່າວເຮີ ກໍາມະການສູນກາງພັກ, ລັດຖະມົນຕີປະຈໍາຫ້ອງວ່າການສໍານັກງານນາຍົກລັດຖະມົນຕີ, ໂຄສົກລັດຖະບານ. ຕໍ່ມາເວລາ 7:30 ໂມງ ທັງສອງຄະນະໄດ້ໄປວາງກະຕ່າດອກໄມ້ຢູ່ຫໍພິພິທະພັນປະທານໄກສອນ ພົມວິຫານ ຜູ້ນໍາທີ່ເເສນເຄົາລົບຮັກຂອງປວງຊົນລາວທັງຊາດ ເພື່ອສະແດງຄວາມກະຕັນຍູຮູ້ບຸນຄຸນຕໍ່ການອຸທິດເຫື່ອແຮງ ແລະ ສະຕິປັນຍາຕະຫລອດຊີວິດຂອງເພິ່ນເຂົ້າໃນພາລະກິດປະຕິວັດ, ນໍາພາປະຊາຊົນລາວບັນດາເຜົ່າຕໍ່ສູ້ຕ້ານກັບຈັກກະພັດຜູ້ຮຸກຮານຈົນສາມາດຍາດໄດ້ໄຊຊະຢ່າງສົມບູນ, ລົບລ້າງລະບອບລາຊາທິປະໄຕ ແລະ ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975.