ພົບເຊື້ອໄວຣັສໂຄວິດ-19 ກາຍພັນໃໝ່ອີກຊະນິດ ໃນຜູ້ທີ່ເດີນທາງມາຈາກບຣາຊິລເຂົ້າຍີ່ປຸ່ນ 4 ຄົນ
ກະຊວງສາທາລະນະສຸກຍີ່ປຸ່ນຖະແຫລງວ່າ: ພົບນັກເດີນທາງຈາກລັດອາມາໂຊນັສຂອງປະເທດບຣາຊິລ 4 ຄົນຕິດເຊື້ອໂຄວິດ-19 ສາຍພັນໃໝ່ທີ່ມີຄວາມແຕກຕ່າງຈາກສາຍພັນກາຍພັນທີ່ພົບຢູ່ອັງກິດ ແລະ ອາຟຣິກາໃຕ້ກ່ອນໜ້ານີ້.
ທ່ານ ທາຄາຈິ ວາກິຕະ ຫົວໜ້າສະຖາບັນແຫ່ງຊາດວ່າດ້ວຍພະຍາດຕິດເຊື້ອຂອງຍີ່ປຸ່ນ (NIID) ລະບຸວ່າ: ປັດຈຸບັນຍັງບໍ່ມີຫລັກຖານທີ່ສະແດງວ່າເຊື້ອກໍ່ໂຣກສາຍພັນໃໝ່ທີ່ພົບໃນບຣາຊິລມີຄວາມສາມາດໃນການແຜ່ລະບາດສູງ. ເຖິງຢ່າງໃດກໍຕາມ, ກະຊວງສາທາລະນະສຸກຂອງບຣາຊິລລະບຸວ່າ: ໄດ້ຮັບການແຈ້ງຈາກເຈົ້າໜ້າທີ່ທາງການຍີ່ປຸ່ນແລ້ວວ່າ: ໄວຣັສສາຍພັນໃໝ່ມີການກາຍພັນທັງໝົດ 12 ຈຸດ ແລະ ໜຶ່ງໃນ 12 ຈຸດນັ້ນພົບໃນໄວຣັສສາຍພັນອັງກິດ ແລະ ສາຍພັນອາຟຣິກາໃຕ້ ເຊິ່ງບົ່ງບອກວ່າໄວຣັສສາຍພັນບຣາຊິລອາດມີຄວາມສາມາດໃນການແຜ່ລະບາດທີ່ສູງໄດ້.
ກະຊວງສາທາລະນະສຸກຍີ່ປຸ່ນກຳລັງສຶກສາວ່າ: ວັກຊີນທີ່ມີຢູ່ມີປະສິດທິພາບຊໍ່າໃດໃນການຮັບມືກັບໄວຣັສສາຍພັນໃໝ່ນີ້.
ນອກຈາກນີ້, ກະຊວງສາທາລະນະສຸກຍີ່ປຸ່ນຍັງລະບຸວ່າ: ນັກເດີນທາງຈາກປະເທດບຣາຊິລກຸ່ມດັ່ງກ່າວເດີນທາງເຖິງສະໜາມບິນຮາເນດະໃນນະຄອນຫລວງໂຕກຽວເມື່ອວັນທີ 2 ມັງກອນ, ຄົນທຳອິດເປັນຜູ້ຊາຍທີ່ມີອາຍຸລະຫວ່າງ 40-49 ປີ ແລະ ມີບັນຫາດ້ານການຫາຍໃຈ, ຄົນຕໍ່ມາເປັນຜູ້ຍິງອາຍຸລະຫວ່າງ 30-39 ປີ ມີອາການເຈັບຫົວ ແລະ ເຈັບຄໍ, ຄົນຕໍ່ມາເປັນໄວລຸ້ນຊາຍທີ່ມີໄຂ້ ແລະ ຄົນສຸດທ້າຍເປັນໄວລຸ້ນຍິງທີ່ບໍ່ມີອາການ ທັງໝົດຖືກກວດເຊື້ອໂຄວິດ-19 ຢູ່ບໍລິເວນຈຸດກັກຕົວຂອງສະໜາມບິນ ແລະ ໄດ້ຜົນເປັນບວກ ຫລັງການກວດສອບຢ່າງລະອຽດໂດຍ NIID ພົບວ່າໄວຣັສກໍ່ພະຍາດໂຄວິດ-19 ທີ່ນັກເດີນທາງເຫລົ່ານີ້ຕິດເຊື້ອເປັນສາຍພັນໃໝ່, ທາງກະຊວງຍັງພົບວ່າມີຜູ້ສຳຜັດອີກ 3 ຄົນທີ່ສຳຜັດໃກ້ຊິດກັບໜຶ່ງໃນຜູ້ຕິດເຊື້ອໂຄວິດ-19 ສາຍພັນໃໝ່ຈາກບຣາຊິລນີ້ ທີ່ຕິດເຊື້ອສາຍພັນອັງກິດນຳອີກ.
ຈາກກໍລະນີດັ່ງກ່າວ, ກະຊວງສາທາລະນະສຸກຂອງບຣາຊິລໄດ້ຕິດຕໍ່ຂໍຂໍ້ມູນກ່ຽວກັບເຊື້ອໂຄວິດ-19 ສາຍພັນໃໝ່ດັ່ງກ່າວທີ່ພົບໃນນັກເດີນທາງກຸ່ມນີ້ຈາກລັດຖະບານຍີ່ປຸ່ນເຊັ່ນ: ລຳດັບພັນທຸກຳ ລວມທັງຂໍຂໍ້ມູນຂອງນັກເດີນທາງກຸ່ມດັ່ງກ່າວ ເພື່ອສອບສວນການສຳຜັດກັບບຸກຄົນອື່ນ ແລະ ໄດ້ໃຊ້ມາດຕະການປ້ອງກັນພະຍາດທີ່ຈຳເປັນເຊັ່ນ: ການແຈ້ງເຕືອນຫາອົງການພາຍໃນປະເທດທີ່ກ່ຽວຂ້ອງ ເຊິ່ງຢູ່ບຣາຊິລເອງປັດຈຸບັນຢູ່ລະຫວ່າງການລະບາດຮອບທີສອງ ໂດຍມີຜູ້ທີ່ມີຜົນກວດໂຄວິດ-19 ເປັນບວກຕໍ່ວັນສະເລ່ຍຫລາຍກວ່າ 50.000 ຄົນໃນເດືອນມັງກອນ ແລະ ພົບວ່າມີຜູ້ຕິດເຊື້ອໂຄວິດ-19 ສາຍພັນອັງກິດ ແລະ ອາຟຣິກາໃຕ້ຢູ່ບຣາຊິລແລ້ວເຊັ່ນກັນ.
ສ່ວນສະຖານະການຢູ່ຍີ່ປຸ່ນໃນປັດຈຸບັນ ລັດຖະບານໄດ້ປະກາດສະຖານະການສຸກເສີນຢູ່ນະຄອນຫລວງໂຕກຽວ ແລະ 3 ແຂວງໃກ້ຄຽງໄປເມື່ອອາທິດກ່ອນ ຫລັງຈຳນວນຜູ້ຕິດເຊື້ອເພີ່ມສູງຂຶ້ນ ໂດຍສຳນັກຂ່າວ NHK ລະບຸວ່າ: ຈຳນວນຜູ້ຕິດເຊື້ອສະສົມຢູ່ຍີ່ປຸ່ນ ໃນວັນທີ 10 ມັງກອນຜ່ານມາ ມີປະມານ 289.000 ຄົນ ແລະ ຜູ້ເສຍຊີວິດສະສົມ 4.067 ຄົນ.
